କୋଲକାତା,୧୨।୧୧: ପଶ୍ଚିମବଙ୍ଗରେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସରକାରରେ ସଙ୍କଟ ସୃଷ୍ଟି ହେବାର ଆଶଙ୍କା ବଢ଼ିବାରେ ଲାଗିଛି। ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କ ପଶ୍ଚିମବଙ୍ଗ ଗସ୍ତ ପରେ ମମତାଙ୍କ ସରକାରରେ ପରିବହନ ମନ୍ତ୍ରୀ ଥିବା ଶୁଭେନ୍ଦୁ ଅଧିକାରୀଙ୍କ ହାବଭାବରେ ବହୁ ପରିବର୍ତ୍ତନ ହୋଇଛି। ୩ ଦିନ ତଳେ ସେ ନନ୍ଦିଗ୍ରାମରେ ଏକ ଅଲଗା ରାଲି କରିଥିଲେ। ରାଲିରେ ମମତାଙ୍କ ପୋଷ୍ଟର ନ ଥିଲା କି ତୃଣମୂଳ ବ୍ୟାନର ବି ନ ଥିଲା। ଏନେଇ ରାଜ୍ୟ ରାଜନୀତିରେ ଚର୍ଚ୍ଚା ଆରମ୍ଭ ହୋଇଛି। ଗୁରୁବାର ଆୟୋଜିତ କ୍ୟାବିନେଟ୍ ବୈଠକରେ ଶୁଭେନ୍ଦୁ ଅନୁପସ୍ଥିତ ରହିବା ନେଇ ନାନା କଳ୍ପନା ଜଳ୍ପନା ପ୍ରକାଶ ପାଇଛି। ଅନ୍ୟ ୩ ମନ୍ତ୍ରୀ ରାଜୀବ ବାନାର୍ଜୀ, ଗୌତମ ଦେବ ଏବଂ ରବୀନ୍ଦ୍ରନାଥ ଘୋଷ ମଧ୍ୟ ବୈଠକରେ ଯୋଗଦେଇ ନାହାନ୍ତି। ଗୌତମ କରୋନାରେ ଆକ୍ରାନ୍ତ ହୋଇଥିବା ବେଳେ ରବୀନ୍ଦ୍ର ଅସୁସ୍ଥ ଥିବା କୁହାଯାଉଛି।ଭାଜପାରେ ଯୋଗଦେବା ପାଇଁ ଦଳ ପକ୍ଷରୁ ଶୁଭେନ୍ଦୁଙ୍କୁ ଅଫର ଦିଆ ସରିଛି। ଶୁଭେନ୍ଦୁ ଭାଜପାରେ ଯୋଗ ଦେବେ କି ବୋଲି ପ୍ରଶ୍ନର ଉତ୍ତରରେ ରାଜ୍ୟ ଭାଜପା ପକ୍ଷରୁ ମନା କରାଯାଇ ନାହିଁ। ମାତ୍ର ଭାଜପାର ବରିଷ୍ଠ ନେତା ନୀରବତା ଅବଲମ୍ବନ କରିଛନ୍ତି। ସୂଚନାଯୋଗ୍ୟ, ୨୦୨୧ରେ ପଶ୍ଚିମବଙ୍ଗରେ ବିଧାନସଭା ନିର୍ବାଚନ ହେବ। ଏହା ପୂର୍ବରୁ ତୃଣମୂଳ କଂଗ୍ରେସରେ ବିଦ୍ରୋହ ନେଇ ମମତାଙ୍କୁ ଚିନ୍ତା ବଢ଼ିବାରେ ଲାଗିଛି
