କୋଲକାତା,୧।୧୦ : ଦୁର୍ଗା ପୂଜାର ମହାଷଷ୍ଠୀ ପୂଜା ପଶ୍ଚିମବଙ୍ଗରେ ଆରମ୍ଭ ହୋଇଛି। ବିଭିନ୍ନ ପୂଜା ପେଣ୍ଡାଲ ଭିନ୍ନ ଭିନ୍ନ ପୌରାଣିକ ବିଷୟବସ୍ତୁ ଉପରେ ଆଧାରିତ ହୋଇଛି। ତେବେ ଗୋଟିଏ ପୂଜା ପେଣ୍ଡାଲରେ ଶାସକ ତୃଣମୂଳ କଂଗ୍ରେସ (ଟିଏମସି)ପତାକା ଦେବୀ ଦୁର୍ଗାଙ୍କ ହାତରେ ତ୍ରିଶୂଳ ବଦଳରେ ରହିଛି।
ଏହାକୁ ନେଇ ରାଜନୈତିକ ବିତର୍କ ଆରମ୍ଭ ହୋଇଛି। ଭାଜପା ଏହାକୁ କଡ଼ା ସ୍ବରରେ ନିନ୍ଦା କରିଛି। ସୂଚନାନୁସାରେ, ହୁଗୁଲି ଜିଲାର ଗୁଡାପ ପଞ୍ଚାୟତରେ ଏକ ପୂଜାପେଣ୍ଡାଲରେ ଏଭଳି ଭାବେ ଦେବୀଙ୍କୁ ପ୍ରତିଷ୍ଠା କରାଯାଇଛି।
ଭାଜପାର ଅଭିଯୋଗ ପରେ ପଞ୍ଚାୟତ ସଦସ୍ୟମାନେ କହିଛନ୍ତି, ମୁଖ୍ୟମନ୍ତ୍ରୀ ମମତା ବାନାର୍ଜୀ ମନ୍ଦ ଶକ୍ତିଗୁଡ଼ିକୁ ନଷ୍ଟ କରି ରାଜ୍ୟର ବିକାଶ କରୁଛନ୍ତି। ଆମେ ତାଙ୍କ ଦ୍ୱାରା ଅନୁପ୍ରାଣିତ। ଦେବୀ ଦୁର୍ଗା ମନ୍ଦ ଶକ୍ତିମାନଙ୍କୁ ଧ୍ୱଂସ କରିଥାନ୍ତି। ଏହି ରାଜ୍ୟରେ ଭାଜପା ନାମକ ଏକ ମନ୍ଦ ଶକ୍ତି ଅଛି। ବିଧାନସଭା ନିର୍ବାଚନରେ ମମତା ତାଙ୍କ ବିରୋଧରେ ଲଢ଼ିଥିଲେ ଏବଂ ଜିତିଥିଲେ। ସେଥିପାଇଁ ଏଥର ଆମର ଦୁର୍ଗା ମୂର୍ତ୍ତିରେ ମହିଷାସୁରକୁ ତ୍ରିଶୂଳ ବଦଳରେ ଟିଏମସି ପତାକା ଦ୍ୱାରା ବଧ କରାଯାଇଥିବା ଦର୍ଶାଯାଇଛି।
ଏନେଇ ଭାଜପା ନେତା ତୁଷାର ମଜୁମଦାର କହିଛନ୍ତି ଏହା ଦ୍ୱାରା ପଶ୍ଚିମବଙ୍ଗର ସଂସ୍କୃତି ଓ ଧାର୍ମିକ ପରମ୍ପରା ନଷ୍ଟ ହୋଇଛି। ମୁଖ୍ୟମନ୍ତ୍ରୀ ରାଜ୍ୟରେ ହିନ୍ଦୁ ଧର୍ମକୁ ନଷ୍ଟ କରୁଛନ୍ତି। ବର୍ତ୍ତମାନ ତ୍ରିଶୂଳ ସ୍ଥାନରେ ତୃଣମୂଳ ପତାକା ଦେବୀ ଦୁର୍ଗାଙ୍କ ହାତରେ ଧରାଇ ଦିଆଯାଇଛି। ଆମେ ଏଭଳି କାର୍ଯ୍ୟର ଦୃଢ଼ ନିନ୍ଦା କରୁଛୁ।
