କୋଲକାତା,୧୩।୧୧: ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଉପରେ ଆପତ୍ତିଜନକ ମନ୍ତବ୍ୟ ଦେଇଥିବା ପଶ୍ଚିମବଙ୍ଗ ମନ୍ତ୍ରୀ ଅଖିଳ ଗିରିଙ୍କ ବିରୋଧରେ ଜୋରଦାର ବିକ୍ଷୋଭ ପ୍ରଦର୍ଶନ ଚାଲିଛି। ଆଦିବାସୀ ସମାଜର ଲୋକେ ମଧ୍ୟ ଅଖିଳ ଗିରିଙ୍କୁ ବିରୋଧ କରି ରାସ୍ତାକୁ ଓହ୍ଲାଇଛନ୍ତି। ରବିବାର ବହୁ ଆଦିବାସୀ କମିଟିର ସମର୍ଥକମାନେ ଖଟଣ୍ଡା ଓ ବାଙ୍କୁରା ରାସ୍ତାକୁ ଓହ୍ଲାଇ ବିକ୍ଷୋଭ ପ୍ରଦର୍ଶନ କରିଛନ୍ତି। ଏହି ସମୟରେ ସେ ପଶ୍ଚିମବଙ୍ଗ ସରକାରରେ ମନ୍ତ୍ରୀ ଜ୍ୟୋତ୍ସା ମାଣ୍ଡିଙ୍କ କାର୍କୁ ଅଟକାଇ ବିରୋଧ ଜାରି କରିଥିଲେ। ଏଥିରେ ମନ୍ତ୍ରୀ ଜ୍ୟୋତ୍ସା ରାଗିଯାଇଥିଲେ। ଏହି ସମୟରେ ଭିଡିଓ ରେକର୍ଡିଂ କରୁଥିବା ସ୍ଥାନୀୟ ଖବରଦାତାଙ୍କ ମୋବାଇଲ ଛଡ଼ାଇ ନେଇ ତାଙ୍କୁ ଗାଳି ଦେଇଥିଲେ। ବିରୋଧ କରୁଥିବା ଲୋକମାନେ ତାଙ୍କୁ ଆଗକୁ ଯିବାକୁ ଦେଉ ନ ଥିଲେ ତେଣୁ ସେ କାରରୁ ଓହ୍ଲାଇଥିଲେ। ଏହା ପରେ ସେ ପରିସ୍ଥିତିକୁ ନିୟନ୍ତ୍ରଣ କରିବାକୁ ଚେଷ୍ଟା କରିଥିଲେ କିନ୍ତୁ ଭିଡିଓ ପ୍ରସ୍ତୁତ କରୁଥିବା ଖବରଦାତାଙ୍କ ମୋବାଇଲ ସେ ଛଡାଇନେଇଥିଲେ।
ସୂଚନାଯୋଗ୍ୟ, ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ଟିଏମ୍ସି ମୁଖ୍ୟ ମମତା ବାନାର୍ଜୀଙ୍କ କ୍ୟାବିନେଟ ମନ୍ତ୍ରୀ ଅଖିଲ ଗିରି ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ସୌନ୍ଦର୍ଯ୍ୟକୁ ନେଇ କଟାକ୍ଷ କରିଥିଲେ। ଶୁକ୍ରବାର ଅପରାହ୍ନରେ ନନ୍ଦିଗ୍ରାମଠାରେ ଏକ ଜନସମାବେଶକୁ ସମ୍ବୋଧିତ କରି ମନ୍ତ୍ରୀ କହିଥିଲେ, ଆମେ ଚେହେରା ଆଧାରରେ କାହାକୁ ବିଚାର କରୁନାହୁଁ। ଆମେ ରାଷ୍ଟ୍ରପତିଙ୍କ ପଦବୀକୁ ସମ୍ମାନ କରୁ। ହେଲେ ଆମ ରାଷ୍ଟ୍ରପତି କେମିତି ଦେଖାଯାଆନ୍ତି ବୋଲି ତାତ୍ସଲ୍ୟଭରା କଣ୍ଠରେ କହିଥିଲେ। ଅଖିଳ ଗିରିଙ୍କ ଆପତ୍ତିଜନକ ମନ୍ତବ୍ୟର ୧୭ ସେକେଣ୍ଡ ଅବଧିର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ଏହାକୁ ନେଇ ବିବାଦ ଉପୁଜିବାରୁ ଶେଷରେ ୬୩ ବର୍ଷୀୟ ଅଖିଳ ଶନିବାର କ୍ଷମା ମାଗିଥିଲେ।
