କୋଲକତା, ୨୫।୧୧: ପଶ୍ଚିମବଙ୍ଗରେ ଆସନ୍ତା ବର୍ଷ ହେବାକୁ ଥିବା ବିଧାନସଭା ନିର୍ବାଚନ ପାଇଁ ଏବେଠୁ ପ୍ରସ୍ତୁତି ଆରମ୍ଭ ହୋଇସାରିଛି। ଦୀର୍ଘ ଦିନ ଧରି ଚର୍ଚ୍ଚା ହେଉଛି ଯେ ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ ସୌରଭ ଗାଙ୍ଗୁଲି ରାଜନୀତିରେ ପ୍ରବେଶ କରି ପଶ୍ଚିମବଙ୍ଗରେ ଭାଜପାର ଏକ ନୂଆ ଚେହେରା ହେବେ। ଏହି କଳ୍ପନାଜଳ୍ପନାକୁ ନେଇ ତୃଣମୂଳ କଂଗ୍ରେସ ଏମ୍ପି ସୌଗତ ରାୟ କହିଛନ୍ତି ଯେ ଯଦି ସୌରଭ ଏଭଳି ନିଷ୍ପତ୍ତି ନିଅନ୍ତି ତେବେ ସେ ଅତ୍ୟନ୍ତ ଦୁଃଖିତ ହେବେ। ସୌରଭ ଗାଙ୍ଗୁଲି ସମସ୍ତ ବଙ୍ଗୀୟମାନଙ୍କ ପାଇଁ ଏକ ଆଇକନ। ଯଦି ସେ ରାଜନୀତିରେ ପ୍ରବେଶ କରନ୍ତି ତେବେ ମୁଁ ଖୁସି ହେବି ନାହିଁ। ସେ ବଙ୍ଗଳାର ଏକମାତ୍ର କ୍ରିକେଟ ଅଧିନାୟକ ଥିଲେ। ଟିଭି ଶୋ’ ଯୋଗୁ ମଧ୍ୟରେ ସେ ବିଖ୍ୟାତ ଥିଲେ। ରାଜନୀତିରେ ତାଙ୍କର କୌଣସି ପୃଷ୍ଠଭୂମି ନାହିଁ, ତେଣୁ ସେ ଏଠାରେ ତିଷ୍ଠି ପାରିବେ ନାହିଁ। ଗାଙ୍ଗୁଲି ଦେଶ ତଥା ଗରିବ ଲୋକଙ୍କ ସମସ୍ୟା ବିଷୟରେ ଜାଣି ନାହାଁନ୍ତି। ପଶ୍ଚିମବଙ୍ଗରେ ମୁଖ୍ୟମନ୍ତ୍ରୀ ପଦ ପାଇଁ ଭାଜପାର କୌଣସି ପ୍ରାର୍ଥୀ ନାହାଁନ୍ତି, ସେଥିପାଇଁ ସେ ଏପରି କଥା ଆଲୋଚନା କରୁଛନ୍ତି ବୋଲି ସେ କହିଛନ୍ତି। ସୂଚନାଯୋଗ୍ୟ, ଦୀର୍ଘ ଦିନ ଧରି ସୌରଭ ଗାଙ୍ଗୁଲି ଭାଜପାର ମୁଖ୍ୟମନ୍ତ୍ରୀ ପ୍ରାର୍ଥୀ ହୋଇପାରନ୍ତି ବୋଲି ଅନୁମାନ କରାଯାଉଛି। ତେବେ ଏହାର କୌଣସି ନିଶ୍ଚିତତା ନାହିଁ। ନିକଟରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ପଶ୍ଚିମବଙ୍ଗରେ ଥିବାବେଳେ ତାଙ୍କୁ ମଧ୍ୟ ଏ ବିଷୟରେ ପଚରାଯାଇଥିଲା। କିନ୍ତୁ ଅମିତ ଶାହା ଏହାର ଉତ୍ତର ନ ଦେଇ କହିଛନ୍ତି ଯେ ଏପର୍ଯ୍ୟନ୍ତ କୌଣସି ଘଟଣା ଘଟି ନାହିଁ, ଯେତେବେଳେ ବି ନିଷ୍ପତ୍ତି ନିଆଯିବ ସୂଚନା ଦିଆଯିବ।