ଟୋକିଓ,୨୮।୨ : ବୁଧବାର ଠାରୁ ଭାରତରେ ଆରମ୍ଭ ହେବାକୁ ଥିବା ଜି-୨୦ ଦେଶର ବୈଦେଶିକ ମନ୍ତ୍ରୀଙ୍କ ବୈଠକରେ ଜାପାନର ବୈଦେଶିକ ମନ୍ତ୍ରୀ ୟୋସିମାସା ହାୟାଶି ଯୋଗଦେବେ ନାହିଁ। ଜାପାନ ସଂସଦରେ ବଜେଟ ଉପରେ ଆଲୋଚନା ହେବ। ସେହି କାରଣରୁ ଜାପାନର ବ ବୈଦେଶିକ ମନ୍ତ୍ରୀ ଜି-୨୦ ବୈଠକ ପାଇଁ ଭାରତ ଗସ୍ତକୁ ବାତିଲ କରିଛନ୍ତି।
ତେବେ ଜାପାନ ବୈଦେଶିକ ମନ୍ତ୍ରୀ ଶୁକ୍ରବାର ଦିନ କ୍ୱାଡ ଦେଶର ବୈଠକରେ ଯୋଗଦେବେ କି ନାହିଁ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଜାପାନର ଗଣମାଧ୍ୟମ ରିପୋର୍ଟ ଅନୁଯାୟୀ ଜାପାନର ବୈଦେଶିକ ମନ୍ତ୍ରୀଙ୍କ ସ୍ଥାନରେ ଜଣେ ଉପ ମନ୍ତ୍ରୀ ଏହି ବୈଠକରେ ଯୋଗ ଦେଇପାରନ୍ତି।
ଦେଶରେ ଜାପାନ ସରକାରଙ୍କ ଏହି ପଦକ୍ଷେପକୁ ବିରୋଧ ଆରମ୍ଭ ହୋଇଛି। ଜାପାନ ଗଣମାଧ୍ୟମ କହିଛି ଯେ ଜାପାନ ଚୀନ ବିରୋଧରେ ଏହାର ସୁରକ୍ଷା ତଥା ଭାରତ ସହ ସହଭାଗିତାକୁ ମଜବୁତ କରିବାରେ ବ୍ୟସ୍ତ ଅଛି। ଏଥି ସହିତ ରୁଷିଆ ଏବଂ ୟୁକ୍ରେନ ମଧ୍ୟରେ ଯୁଦ୍ଧ ଚାଲିଛି, ଏପରି ସମୟରେ ଜାପାନର ବୈଦେଶିକ ମନ୍ତ୍ରୀ ଜି-୨୦ ବୈଠକରେ ଅଂଶଗ୍ରହଣ ନ କଲେ ଜି-୨୦ ଦେଶକୁ ଭୁଲ ବାର୍ତ୍ତା ଯିବ। ଜାପାନର ବହୁ ଜନ ପ୍ରତିନିଧୀ ଏବଂ ସେଠାରେ ଥିବା ଲୋକମାନେ ମଧ୍ୟ ବିଶ୍ୱାସ କରନ୍ତି ଯେ ଭାରତରେ ଆୟୋଜିତ ହେବାକୁ ଥିବା ଜି-୨୦ ବୈଠକରେ ଯୋଗ ନ ଦେଇ ବୈଦେଶିକ ମନ୍ତ୍ରୀ ଏକ ଭଲ ସୁଯୋଗ ହରାଉଛନ୍ତି।