ନୂଆଦିଲ୍ଲୀ, ୮।୩ : ଭାଜପା ନେତା ଜ୍ୟୋତିରାଦିତ୍ୟ ସିନ୍ଧିଆ କଂଗ୍ରେସରୁ ମୁଖ୍ୟମନ୍ତ୍ରୀ ହୋଇପାରିଥାନ୍ତେ। କିନ୍ତୁ ଏବେ ସେ ଭାଜପାର ଜଣେ ପଛରେ ବସୁଥିବା (ବ୍ୟାକବେଞ୍ଚର) ନେତା। ଏଭଳି କହିଛନ୍ତି ପୂର୍ବତନ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ।
ଦଳର ଯୁବ ଶାଖା ସହ କଂଗ୍ରେସ ସଂଗଠନର ଗୁରୁତ୍ୱ ସମ୍ପର୍କରେ ସୋମବାର ଆଲୋଚନାବେଳେ ରାହୁଲ କହିଛନ୍ତି, କଂଗ୍ରେସ ସହ ଯୋଡ଼ି ହୋଇ ରହିଥିଲେ ସିନ୍ଧିଆ ମୁଖ୍ୟମନ୍ତ୍ରୀ ହୋଇପାରିଥାନ୍ତେ। ଭାଜପାରେ ତାଙ୍କୁ ଏବେ କେହି ପଚାରୁ ନାହାନ୍ତି। କଂଗ୍ରେସ କର୍ମୀଙ୍କ ସହ କାମ କରି ସଂଗଠନକୁ ଶକ୍ତିଶାଳୀ କରିବା ପାଇଁ ତାଙ୍କ ପାଖରେ ବିକଳ୍ପ ଥିଲା। ମୁଁ ତାଙ୍କୁ କହିଥିଲି, ଦିନେ ତୁମେ ମୁଖ୍ୟମନ୍ତ୍ରୀ ହେବ। ମାତ୍ର ସେ ବାଛି ନେଲେ ଅଲଗା ବାଟ। ଓଏନାଡ ଏମ୍ପି ଆହୁରି କହିଛନ୍ତି, ଲେଖି ରଖ ସେ କଦାପି ମୁଖ୍ୟମନ୍ତ୍ରୀ ହୋଇପାରିବେ ନାହିଁ। ତାଙ୍କୁ ଫେରିବାକୁ ପଡ଼ିବ। ଉଲ୍ଲେଖଥାଉ କି, ସିନ୍ଧିଆ ଗତବର୍ଷ ମାର୍ଚ୍ଚରେ କଂଗ୍ରେସ ଛାଡ଼ି ଭାଜପାରେ ଯୋଗଦେଇଥିଲେ।
