ଭୁବନ,୨୯।୫(ଡି.ଏନ୍.ଏ.): ଡିଲର ପଏଣ୍ଟରେ ଜବରଦସ୍ତ ଆଦାୟ ହେଉଛି ପରିମଳ ଟିକସ। ଯେଉଁମାନେ ଏଥିରେ ଅସମର୍ଥ ପ୍ରକାଶ କରୁଛନ୍ତି, ସେମାନଙ୍କୁ ଚାଉଳ ଦିଆଯାଉନାହିଁ। ଢେଙ୍କାନାଳ ଜିଲା ଭୁବନ ଏନ୍ଏସିରେ ଏଭଳି ବିଚିତ୍ର ସ୍ଥିତି ଦେଖିବାକୁ ମିଳିଛି। ପରିମଳ ଟିକସ ଆଦାୟରେ ବିଫଳ ଏନ୍ଏସି କର୍ତ୍ତୃପକ୍ଷ ଟାର୍ଗେଟ ପୂରଣ ପାଇଁ ସ୍ବଚ୍ଛସାଥୀଙ୍କୁ ଏହି କାର୍ଯ୍ୟରେ ନିୟୋଜିତ କରିଥିବାବେଳେ ସେମାନେ ନାଲିଆଖି ଦେଖାଇ ନାଲି ରସିଦ କାଟିବାକୁ ବାଧ୍ୟ କରିବା ଗରିବଙ୍କ ପେଟରେ ଲାତ ବୋଲି ହିତାଧିକାରୀମାନେ ଅଭିଯୋଗ କରିଛନ୍ତି।
ଭୁବନ ଏନ୍ଏସିର ୧୫ ଓ୍ବାର୍ଡର ପରିମଳ ବ୍ୟବସ୍ଥା ତଦାରଖ କରିବା ପାଇଁ ୧୫ଜଣ ସ୍ବଚ୍ଛସାଥୀଙ୍କୁ ନିଯୁକ୍ତି ଦିଆଯାଇଛି। ଏଥିସହ ଏକ ଘରୋଇ ଠିକାସଂସ୍ଥାକୁ ସହର ସଫେଇ ଦାୟିତ୍ୱ ଦିଆଯାଇଛି। ଏଥିରେ ମାସିକ ୮ ଲକ୍ଷ ଟଙ୍କା ଖର୍ଚ୍ଚ ହେଉଛି। ଏହାକୁ ବାଦ୍ଦେଲେ
ଆବର୍ଜନା ସଂଗ୍ରହ ବାବଦକୁ ପ୍ରତି ଘରୁ ମାସିକ ୧୫ ଟଙ୍କା ଟିକସ ଆଦାୟ କରାଯାଉଛି। ହେଲେ ପରିମଳ ସଫେଇ ଠିକ୍ ଭାବେ କରାଯାଉ ନ ଥିବା ଅଭିଯୋଗ କରି ବହୁ ପରିବାର ଟିକସ ଦେଉନାହାନ୍ତି। ସେମାନଙ୍କୁ ବୁଝାଇଶୁଝାଇ ଟିକସ ଆଦାୟ କରିବାରେ ସ୍ବଚ୍ଛସାଥୀ ବିଫଳ ହେଉଛନ୍ତି। ଟିକସ ଟାର୍ଗେଟ୍ ପୂରଣ କରିବା ପାଇଁ ସେମାନେ ଏବେ ସାଧାରଣ ବଣ୍ଟନ ବ୍ୟବସ୍ଥା (ପିଡିଏସ୍)ରେ ସାମଗ୍ରୀ ପ୍ରଦାନ କରାଯାଉଥିବା ଡିଲର ପଏଣ୍ଟରେ ଅପେକ୍ଷା କରୁଛନ୍ତି ଏବଂ ହିତାଧିକାରୀଙ୍କୁ ପରିମଳ କର ଦେବାକୁ ବାଧ୍ୟ କରୁଛନ୍ତି। କେବଳ ଏତିକି ନୁହେଁ, ଟିକସ ଦେଉଥିବା ହିତାଧିକାରୀଙ୍କୁ ସେମାନେ ଏକ ନାଲି ରଙ୍ଗର ରସିଦ ଧରାଇଦେଉଛନ୍ତି। ଡିଲରଙ୍କୁ ଏହା ଦେଖାଇବା ପରେ ଚାଉଳ ମିଳୁଛି। ଯେଉଁମାନେ ଏଥିରେ ଅସହାୟତା ପ୍ରକାଶ କରୁଛନ୍ତି, ସେମାନେ ମାସିକ ଚାଉଳ କୋଟାରୁ ବଞ୍ଚତ୍ତ ହେଉଛନ୍ତି। ସମସ୍ୟା ସମ୍ପର୍କରେ ସେମାନେ ଯୋଗାଣ ବିଭାଗ ଅଧିକାରୀଙ୍କୁ ଫୋନ୍ ମାଧ୍ୟମରେ ଅଭିଯୋଗ କରିଛନ୍ତି। ଏନ୍ଏସି ପ୍ରଶାସନ ଏବଂ ଯୋଗାଣ ବିଭାଗ ଏ ଦିଗରେ ପଦକ୍ଷେପ ନ ନେଲେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବାକୁ ବାଧ୍ୟ ହେବେ ବୋଲି ଚାଉଳରୁ ବଞ୍ଚତ୍ତ ହିତାଧିକାରୀମାନେ ଚେତାବନୀ ଦେଇଛନ୍ତି।
ଏ ସଂକ୍ରାନ୍ତରେ ବ୍ଲକ ଯୋଗାଣ ବିଭାଗ ଅଧିକାରୀ ବେଡ଼ା ବେସ୍ରା କୁହନ୍ତି, ଏଭଳି ଟିକସ ଆଦାୟ କରିବା ଲାଗି କୌଣସି ସରକାରୀ ନିର୍ଦ୍ଦେଶ ନାହିଁ। ଯେଉଁମାନେ ଏଭଳି କାର୍ଯ୍ୟ କରୁଛନ୍ତି, ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏନ୍ଏସି ନିର୍ବାହୀ ଅଧିକାରୀ ଶ୍ୟାମସୁନ୍ଦର ସାହୁ କୁହନ୍ତି, ସ୍ବଚ୍ଛସାଥୀଙ୍କୁ ଘର ଘର ବୁଲି ଲୋକଙ୍କୁ ବୁଝାଶୁଝା କରି ପରିମଳ ଟିକସ ଆଦାୟ କରିବାକୁ କୁହାଯାଇଛି। ହେଲେ ଏଥିଲାଗି ଗରିବ ହିତାଧିକାରୀଙ୍କ ଯୋଗାଣ ସାମଗ୍ରୀ ବନ୍ଦ କରିବା ଦଣ୍ଡନୀୟ ଅପରାଧ। ଏଭଳି ବେନିୟମ କାର୍ଯ୍ୟ କରୁଥିବା ସ୍ବଚ୍ଛସାଥୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।