କୁଜଙ୍ଗ,୧୭।୪(ଡି.ଏନ୍.ଏ.): ଏରସମା ତହସିଲ ଅନ୍ତର୍ଗତ ଢିଙ୍କିଆ ଚାରିଦେଶର ଜନସାଧାରଣ ଶାନ୍ତିପ୍ରିୟ ଓ ନିରୀହ ହୋଇଥିବାବେଳେ ବାହାର ଅଞ୍ଚଳର କେତେଜଣ ନ୍ୟସ୍ତସ୍ବାର୍ଥ ବ୍ୟକ୍ତି ନିଜକୁ ଜନ ଆନ୍ଦୋଳନର ନେତା କହି ସ୍ଥାନୀୟ ଲୋକଙ୍କ ମଧ୍ୟରେ ବିଭ୍ରାନ୍ତି ସୃଷ୍ଟି କରୁଛନ୍ତି। ସେମାନଙ୍କ ପ୍ରରୋଚନାରେ ପଡ଼ି ଢିଙ୍କିଆରେ ରକ୍ତପାତ ହେବା ସହ ଭାଇଚାରା ନଷ୍ଟ ହେଉଛି ବୋଲି ଢିଙ୍କିଆ ମା’ଫୁଲଖାଇ ସୁରକ୍ଷା କମିଟି ପକ୍ଷରୁ ଅଭିଯୋଗ କରାଯାଇଛି। ଢିଙ୍କିଆ ପଞ୍ଚାୟତ ସମିତି କାର୍ଯ୍ୟାଳୟ ପରିସରରେ ଶନିବାର କମିଟି ପକ୍ଷରୁ ଏକ ଖବରଦାତା ସମ୍ମିଳନୀ ଆୟୋଜନ କରାଯାଇଥିଲା। ଏଥିରେ ସୁରକ୍ଷା କମିଟି ଉପଦେଷ୍ଟା ନିର୍ଭୟ ସାମନ୍ତରାୟ ଅଧ୍ୟକ୍ଷତା କରିଥିଲେ। ପୂର୍ବତନ ସରପଞ୍ଚ ଶିଶିର ମହାପାତ୍ର, ଗ୍ରାମ କମିଟି ସଭାପତି ନୃସିଂହ ରାଉତ ପ୍ରମୁଖ ଯୋଗଦେଇ ଗ୍ରାମରେ ବିଶୃଙ୍ଖଳା ସୃଷ୍ଟି କଲେ ଜନ ଆନ୍ଦୋଳନର ନେତା କହୁଥିବା ବ୍ୟକ୍ତିମାନଙ୍କ ପରିସ୍ଥିତି ଭୟାବହ ହେବ ବୋଲି ଚେତାବନୀ ଦେଇଥିଲେ। ଏଥିସହ ଢିଙ୍କିଆକୁ ବିଶ୍ୱଦରବାରରେ ନିନ୍ଦିତ ନ କରିବାକୁ ସେମାନେ ନିବେଦନ କରିଛନ୍ତି।
କମିଟି ପକ୍ଷରୁ ସମ୍ମିଳନୀରେ କୁହାଯାଇଛି, ଢିଙ୍କିଆବାସୀ ଏବେ କୃଷିନୀତିକୁ ଛାଡ଼ି ଶିଳ୍ପନୀତି ଧରିବାକୁ ଯାଉଛନ୍ତି। ମାତ୍ର ପୋସ୍କୋ ସମୟରୁ ପ୍ରସ୍ତାବିତ ଜେଏସ୍ଡବ୍ଲ୍ୟୁ ପ୍ରକଳ୍ପ ପର୍ଯ୍ୟନ୍ତ କେତେଜଣ ବ୍ୟକ୍ତି ଗ୍ରାମକୁ ଆସି ଲୋକଙ୍କୁ ଉସ୍କାଇ ଶିଳ୍ପବିରୋଧୀ କାର୍ଯ୍ୟ କରୁଛନ୍ତି। ପୋସ୍କୋ ସମୟରେ ଏଭଳି ତଥାକଥିତ ଜନ ଆନ୍ଦୋଳନକାରୀ ନେତାଙ୍କ ପାଇଁ ୫ ଜଣଙ୍କ ମୁଣ୍ଡ ଗଡ଼ିଥିଲା। ସେମାନଙ୍କ ପାଇଁ ଜାନୁୟାରୀ ୧୪ରେ ଜେଏସ୍ଡବ୍ଲ୍ୟୁ ପ୍ରକଳ୍ପକୁ ନେଇ ପୋଲିସ ଓ ଗ୍ରାମବାସୀଙ୍କ ମଧ୍ୟରେ ସଂଘର୍ଷ ହୋଇଥିଲା। ଏସବୁ ନେତାମାନେ ସାଧାରଣ ଲୋକଙ୍କୁ ମୋହର କରି ନିଜ ସମ୍ପତ୍ତି ବଢ଼େଇ ଚାଲିଥିବାବେଳେ ନିରୀହ ଜନତା କଷ୍ଟ ପାଉଛନ୍ତି। ଅନ୍ୟମାନଙ୍କ ମଧ୍ୟରେ ଏହି ଖବରଦାତା ସମ୍ମିଳନୀରେ ନିତ୍ୟାନନ୍ଦ ସ୍ବାଇଁ, ଅକ୍ଷୟ ବେହେରା, ସଂଗ୍ରାମ ସ୍ବାଇଁ, ପ୍ରଶାନ୍ତ ଲେଙ୍କା, ପୁଷ୍କକ ଦାସ, ରାଜୀବ ସାହୁ, ବିବେକ ସ୍ବାଇଁ, ଅକ୍ଷୟ ଦାସ ଓ କୁମର ମଲ୍ଲିକଙ୍କ ସମତେ ଶତାଧିକ ଗ୍ରାମବାସୀ ଉପସ୍ଥିତ ଥିଲେ।
