ରାୟଗଡ଼ା ଅଫିସ,୧୮।୫: ରାୟଗଡ଼ା ଜିଲା ନିୟମଗିରି ପାଦଦେଶରେ ବସବାସ କରୁଥିବା ୧୭ ଡଙ୍ଗରିଆ ଆଦିବାସୀ କରୋନା ସଂକ୍ରମିତ ଚିହ୍ନଟ ହେବାପରେ ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇଛି। ଚିହ୍ନଟଙ୍କ ମଧ୍ୟରେ ଜିଲାର କଲ୍ୟାଣସିଂହପୁର ବ୍ଲକ୍ ଅଞ୍ଚଳରୁ ସର୍ବାଧିକ ୧୫ ରହିଛନ୍ତି। ତେଣୁ ସଂକ୍ରମଣକୁ ରୋକିବା ନିମନ୍ତେ ସୋମବାର କଲ୍ୟାଣସିଂହପୁର ବିଡିଓ କାଳୁଚରଣ ନାୟକ ଏବଂ ସ୍ବାସ୍ଥ୍ୟ ବିଭାଗର ଏକ ଟିମ୍ ସ୍ବାବ୍ ପରୀକ୍ଷା ପାଇଁ ସମ୍ପୃକ୍ତ ଅଞ୍ଚଳରେ ପହଞ୍ଚିଥିଲେ। ହେଲେ ନିୟମଗିରି ରାଜାଙ୍କୁ ପୂଜା କରୁଛୁ, ଆମର କିଛି ଅସୁବିଧା ହେବନାହିଁ ବୋଲି ଡଙ୍ଗରିଆମାନେ କହି କରୋନା ପରୀକ୍ଷାକୁ ବିରୋଧ କରିଥିଲେ। ଏଥିସହିତ ପାର୍ସାଲିରେ ହୋଇଥିବା ମିନି କଣ୍ଟେନ୍ମେଣ୍ଟ ଜୋନ୍କୁ ଭାଙ୍ଗି ଦେଇଥିଲେ।
ସୂଚନା ଅନୁଯାୟୀ, ବିଡିଓ, ପାର୍ସାଲିସ୍ଥିତ ଡଙ୍ଗରିଆ କନ୍ଧ ଉନ୍ନୟନ ସଂସ୍ଥା (ଡିକେଡିଏ) ର ସ୍ପେଶାଲ ଅଫିସର ମଦନ ମୋହନ ଦଳବେହେରା, ଆଶା, ଅଙ୍ଗନଓ୍ବାଡି କର୍ମୀ ଓ ଫାର୍ମାସିଷ୍ଟ ପାର୍ସାଲି ଗ୍ରାମକୁ ଯାଇ ଡଙ୍ଗରିଆମାନଙ୍କୁ କରୋନାର ଭୟାବହତା ବିଷୟରେ ବୁଝାଇଥିଲେ। ସେମାନଙ୍କୁ କରୋନା ପରୀକ୍ଷା କରାଇବା ନିମନ୍ତେ ଉତ୍ସାହିତ କରି ସ୍ବାବ୍ ସଂଗ୍ରହ କରିବାକୁ ଡାକିଥିଲେ। ଠିକ୍ ସମୟରେ ପରୀକ୍ଷା କରାଇ ଔଷଧ ଖାଇଲେ ସୁସ୍ଥ ହୋଇପାରିବେ ବୋଲି ସେମାନଙ୍କୁ ବୁଝାଇଥିଲେ। ହେଲେ ମାତ୍ର ୩ ଜଣ
ସ୍ବାବ୍ ଦେଇଥିବାବେଳେ ଅନ୍ୟମାନେ ରୋକ୍ଠୋକ୍ ମନା କରିଥିଲେ। ଫଳରେ ଟିମ୍ ଅନ୍ୟମାନଙ୍କ ସ୍ବାବ୍ ପରୀକ୍ଷା କରି ନ ପାରି ଫେରିବାକୁ ବାଧ୍ୟ ହୋଇଥିଲା। ଆମେ ଏଠାରେ ଯେମିତି ଅଛୁ ଭଲରେ ଅଛୁ, ଆମର କୌଣସି ପରୀକ୍ଷାର ଆବଶ୍ୟକ ନାହିଁ ବୋଲି ଡଙ୍ଗରିଆମାନେ କହିଥିବା ବିଡିଓ ସୂଚନା ଦେଇ କହିଛନ୍ତି। ସେହିପରି ଡାକ୍ତରଖାନାରେ ରୋଗୀଙ୍କ କିଡ୍ନୀ, ଆଖି ବାହାର କରାଯାଉଥିବା ଏବଂ ମୃତଦେହ ଫେରାଯାଉ ନ ଥିବା ନେଇ ବିଭିନ୍ନ ମିଥ୍ୟା ଭିଡିଓ ଦେଖି ଡଙ୍ଗରିଆମାନେ ଭୟଭୀତ ଥିବା ଜଣାଇଥିବା ଡିକେଡିଏର ସ୍ପେଶାଲ ଅଫିସର କହିଛନ୍ତି। ଏମିତିକି ଏହା ଏକ ବିଦେଶୀ ରୋଗ, ଆମକୁ ଏହା ଛୁଇଁପାରିବନି ବୋଲି ଗ୍ରାମବାସୀ ଅନ୍ଧବିଶ୍ୱାସରେ ରହିଛନ୍ତି। ଏଭଳି ପରିସ୍ଥିତିରେ ଏମାନଙ୍କୁ ବୁଝାଇବା ପ୍ରଶାସନ ପାଇଁ ବଡ଼ ଚ୍ୟାଲେଞ୍ଜ ହୋଇଛି। ପ୍ରଶାସନ ପକ୍ଷରୁ ଡଙ୍ଗରିଆମାନଙ୍କ ନେତା ଲଦ ସିକକାଙ୍କ ସହ ଆଲୋଚନା କରାଯାଇ ଗ୍ରାମବାସୀଙ୍କୁ ବୁଝାଇବା ନିମନ୍ତେ କୁହାଯାଇଛି। ମଙ୍ଗଳବାର ସ୍ବାସ୍ଥ୍ୟ ବିଭାଗ ଟିମ୍ ପୁଣି ସ୍ବାବ୍ ସଂଗ୍ରହ ନିମନ୍ତେ ଯିବେ ବୋଲି ସୂଚନା ମିଳିଛି।