ଭୁବନେଶ୍ୱର,୧୦ା୫: ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ଘରୋଇ ବଜାରର ଅଳଙ୍କାର ପ୍ରତିଷ୍ଠାନଗୁଡ଼ିକ ପକ୍ଷରୁ ‘ଅକ୍ଷୟ ତୃତୀୟା ମହୋତ୍ସବ’ର ଆୟୋଜନ କରାଯାଇଛି। ଅକ୍ଷୟ ତୃତୀୟା ଉପଲକ୍ଷେ ଅଳଙ୍କାର ପ୍ରତିଷ୍ଠାନଗୁଡ଼ିକ ପକ୍ଷରୁ ଆକର୍ଷଣୀୟ ଅଫର ଓ ରିହାତି ସାଙ୍ଗକୁ ଉପହାର ଓ ଲକି ଡ୍ର’ର ବ୍ୟବସ୍ଥା ମଧ୍ୟ ହୋଇଛି। ବିଶେଷକରି ଶୁକ୍ରବାର ଚଳିତ ବର୍ଷର ଅକ୍ଷୟ ତୃତୀୟା ସାରା ରାଜ୍ୟରେ ପାଳନ କରାଯାଉଛି।
ରାଜ୍ୟର ଅଗ୍ରଣୀ ଅଳଙ୍କାର ପ୍ରତିଷ୍ଠାନଗୁଡିକର ସୂଚନା ଅନୁଯାୟୀ ଶୁକ୍ରବାର ଘରୋଇ ବଜାରର ସୁନା ଦର ୨୪ କ୍ୟାରେଟ ପ୍ରତି ୧୦ଗ୍ରାମ ପିଛା ୭୨,୨୭୦ ଟଙ୍କା ଥିଲାବେଳେ ୨୨ କ୍ୟାରେଟ ସୁନା ପ୍ରତି ୧୦ ଗ୍ରାମ ପିଛା ୬୬,୨୫୦ ଟଙ୍କାରେ କାରବାର ହେଉଛି। ଘରୋଇ ବଜାରରେ କ୍ରମାଗତ ଭାବେ ଦର ପରିବର୍ତ୍ତନ ହେଉଥିଲାବେଳେ ଗତ କିଛି ସପ୍ତାହ ହେବ ସୁନା ଓ ରୁପା ଦର ହ୍ରାସ ପାଉଛି। ଏପରିକି ହୀରା ଓ ମୂଲ୍ୟବାନ୍ ଅଳଙ୍କାର ଏବଂ ରତ୍ନପଥର ମୂଲ୍ୟରେ ମଧ୍ୟ ସୁଧାର ଆସିଛି। ଫଳରେ ଅକ୍ଷୟ ତୃତୀୟା କାରବାର ପାଇଁ ଉଭୟ ଗ୍ରାହକ ଓ ବ୍ୟବସାୟୀଙ୍କ ମଧ୍ୟରେ ଉତ୍ସାହ ଦେଖାଦେଇଛି।
