ନୂଆଦିଲ୍ଲୀ: କେନ୍ଦ୍ର ବଜେଟ ୨୦୨୧ ପହିଲାରେ ଆସିବାକୁ ଥିବା ବେଳେ ପ୍ରତିବର୍ଷ ପ୍ରଥା ଅନୁସାରେ ଚାଲି ଆସୁଥିବା ହାଲୁଆ ସେରିମନି ଶନିବାର ଅନୁଷ୍ଠିତ ହେବ। କେନ୍ଦ୍ର ବଜେଟ ଦସ୍ତାବିଜ ଛପାହେବାର ଆରମ୍ଭ ଦିନରେ ଏଭଳି କାର୍ଯ୍ୟକ୍ରମ ଆୟୋଜନ କରାଯାଇଥାଏ। କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ ଏହି କାର୍ଯ୍ୟକ୍ରମକୁ ଶୁଭାରମ୍ଭ କରିବେ। ନର୍ଥ ବ୍ଲକରେ ଅନୁଷ୍ଠିତ ହେବାକୁ ଥିବା ଏହି କାର୍ଯ୍ୟକ୍ରମ ଅବସରରେ ଅର୍ଥମନ୍ତ୍ରୀଙ୍କ ସମେତ ଅର୍ଥ ରାଷ୍ଟ୍ରମନ୍ତ୍ରୀ ଅନୁରାଗ ଠାକୁର, ଅର୍ଥ ମନ୍ତ୍ରଣାଳୟର ସଚିବ ଏବଂ ବରିଷ୍ଟ ଅଧିକାରୀମାନେ ଯୋଗଦେବା କାର୍ଯ୍ୟକ୍ରମ ରହିଛି।
ବଜେଟ ପ୍ରସ୍ତୁତିର ଅଂଶ ବିଶେଷ ଭାବେ ନର୍ଥ ବ୍ଲକର ବେସ୍ମେଣ୍ଟରେ ରହିଥିବା ପ୍ରକୋଷ୍ଟକୁ କର୍ମଚାରୀମାନେ ୧୦ ଦିନ ଲାଗି ଚାଲିଯାନ୍ତି। ବଜେଟ ଉପସ୍ଥାପନ ହୋଇ ସାରିବା ପରେ ସେମାନେ ବାହାରକୁ ଆସିଥାନ୍ତି। ସାଧାରଣ ବଜେଟ ପ୍ରସ୍ତୁତିରେ ଏହି କର୍ମଚାରୀମାନେ କାର୍ଯ୍ୟ କରିଥାନ୍ତି। ବଜେଟ ସଂକ୍ରାନ୍ତ ସୂଚନା ଯେଭଳି ସାଧାରଣରେ ପ୍ରଘଟ ନ ହୁଏ ତାକୁ ରୋକିବା ଲାଗି ଏହି କର୍ମଚାରୀଙ୍କ ସଂଯୋଗ ବାହାର ଦୁନିଆ ସହ ରହେନାହିଁ। ବଜେଟ ପ୍ରସ୍ତୁତିର ଅଂଶ ବିଶେଷ ରହୁଥିବା ପ୍ରତି କର୍ମଚାରୀଙ୍କ ଉଦ୍ୟମକୁ ସମ୍ମାନ ଜଣାଇ ଏଭଳି ହାଲୁଆ ସେରିମନି ଆୟୋଜନ କରାଯାଇଥାଏ।
ଛପା ହେବନି ବଜେଟ ଦସ୍ତାବିଜ
ଚଳିତ ବର୍ଷ କରୋନା ମହାମାରୀ ଯୋଗୁ ବଜେଟ ଦସ୍ତାବିଜ ଛପା ହେବ ନାହିଁ। ସେହିଭଳି ଚଳିତ ମାସ ୨୯ରେ ଉପସ୍ଥାପନ ହେବାକୁ ଥିବା ଅର୍ଥନୈତିକ ସର୍ଭେ ରିପୋର୍ଟ ମଧ୍ୟ ଛପା ହେବନାହିଁ ବୋଲି ଜଣାପଡିଛି। ଜାନୁୟାରୀ ୨୯ରେ ବଜେଟର ପ୍ରଥମ ଭାଗ ଶୁଭାରମ୍ଭ ହେବ ବୋଲି ମଙ୍ଗଳବାର ଲୋକ ସଭା ବାଚସ୍ପତି ଓମ୍ ବିର୍ଲା ସୂଚନା ଦେଇଛନ୍ତି। ସେହିଭଳି ବଜେଟର ଦ୍ୱିତୀୟ ଭାଗ ମାର୍ଚ୍ଚ ୮ରୁ ଏପ୍ରିଲ ୮ ଯାଏ ଅନୁଷ୍ଠିତ ହେବ। ପୂର୍ବାହ୍ନ ୯ରୁ ଅପରାହ୍ନ ୨ ଯାଏ ରାଜ୍ୟ ସଭା ଏବଂ ଅପରାହ୍ନ ୪ରୁ ରାତି ୯ଟା ଯାଏ ଲୋକ ସଭା ଚାଲିବ ବୋଲି ସୂଚନା ମିଳିଛି। ଏଥିରେ ପ୍ରଶ୍ନକାଳ ଏବଂ ଶୂନ୍ୟକାଳ ମଧ୍ୟ ରହିଛି। କୋଭିଡ୍-୧୯କୁ ଧ୍ୟାନରେ ରଖି ଆର୍ଟି-ପିସିଆର୍ ଟେଷ୍ଟ କରାଇବାକୁ ଏମ୍ପିମାନଙ୍କୁ କୁହାଯାଇଛି।