ପୁରୀ ଅଫିସ,୨।୭: ଗୁରୁବାର ଆଷାଢ଼ ଶୁକ୍ଳ ଦ୍ୱାଦଶୀ। ଏହି ପବିତ୍ର ତିଥିରେ ମହାପ୍ରଭୁଙ୍କ ସୁନାବେଶ ବା ବଡ଼ ତଢ଼ାଉ ବେଶ ହେବ। ରଥାରୂଢ଼ ଦାରୁବିଗ୍ରହ ମହଣ ମହଣ ସୁନାରେ ସଜେଇ ହେବେ। ତେବେ ମହାପ୍ରଭୁଙ୍କ ଏହି ଦୁଲର୍ଲଭ ବେଶ ଭକ୍ତମାନେ ଦେଖିପାରିବେ ନାହିଁ। ଏଥିରେ ବାଧକ ସାଜିଛି କରୋନା। ଏହି ମହାମାରୀ ପାଇଁ ଏଥର ସମ୍ପୂର୍ଣ୍ଣ ଘୋଷଯାତ୍ରାକୁ ଭକ୍ତଶୂନ୍ୟ ରଖାଯାଇଛି। ଅନ୍ୟପକ୍ଷରେ ସୁନାବେଶ ଲାଗି ପ୍ରଶାସନ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଛି। ରଥ ଉପରେ ହେଉଥିବା ଏହି ବେଶକୁ ବଡ଼ ତଢ଼ାଉ ବେଶ ମଧ୍ୟ କୁହାଯାଏ। ଗଜପତି ମହାରାଜା କପିଳେନ୍ଦ୍ର ଦେବଙ୍କ ସମୟରୁ ଏହି ବେଶ ହୋଇଆସୁଥିବା ଶୁଣିବାକୁ ମିଳେ। ଗୁରୁବାର ପୂର୍ବାହ୍ନରେ ମହାପ୍ରଭୁଙ୍କ ରତ୍ନଭଣ୍ଡାର (ବାହାର ଭଣ୍ଡାର) ଖୋଲାଯିବ। ସେଥିରୁ ସୁନାବେଶ ଲାଗି ଆବଶ୍ୟକ ଅଳଙ୍କାର ବାହାର କରାଯିବ। ଭଣ୍ଡାର ମେକାପ ଓ ବଣିଆଙ୍କ ଉପସ୍ଥିତିରେ ଅଳଙ୍କାରଗୁଡ଼ିିକୁ ସଫା କରାଯିବ। ରଥ ଉପରେ ମହାପ୍ରଭୁଙ୍କ ମଇଲମ ଓ ମେକାପ ସର୍ବାଙ୍ଗ ନୀତି ବଢ଼ିବା ପରେ ସୁନାବେଶ ଆରମ୍ଭ ହେବ। ଅପରାହ୍ନ ୪ଟାରୁ ସାଢେ ୫ଟା ମଧ୍ୟରେ ଠାକୁରଙ୍କ ସୁନାବେଶ ସଜା ସମ୍ପନ୍ନ ହେବ। ଏଥର ଭକ୍ତଙ୍କୁ ଦର୍ଶନ ସୁଯୋଗ ନ ଥିବାରୁ ୨ରୁ ୩ ଘଣ୍ଟା ଏହି ବେଶ ରହିବ। ଶ୍ରଦ୍ଧାଳୁମାନେ ଟିଭି ମାଧ୍ୟମରେ ଏହାର ସିଧା ପ୍ରସାରଣ ଦେଖିପାରିବେ ବୋଲି ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. କ୍ରିଷନ କୁମାର କହିଛନ୍ତି। ଗୁଣ୍ଡିଚା ଓ ବାହୁଡ଼ା ନୀତିକାନ୍ତି ଭଳି ସୁନାବେଶ ନୀତି ସଅଳ ହେବ ବୋଲି କୁହାଯାଉଛି। ଏଥର ସୁନାବେଶ ଦର୍ଶନ ଲାଗି ଭକ୍ତଙ୍କୁ ବାରଣ କରାଯାଇଥିବାରୁ ସେମିତି କୌଣସି ସ୍ବତନ୍ତ୍ର ବ୍ୟବସ୍ଥା ନାହିଁ। କିନ୍ତୁ ଦିନତମାମ୍ ମାର୍କେଟ ଛକରୁ ସିଂହଦ୍ୱାର ପର୍ଯ୍ୟନ୍ତ ଅଞ୍ଚଳରେ କର୍ଫ୍ୟୁ ରହିବ। ଶ୍ରୀମନ୍ଦିର ଭଣ୍ଡାର ଘରୁ ରଥକୁ ସ୍ବର୍ଣ୍ଣ ଅଳଙ୍କାର ଆସିବା ସମୟରେ ପୋଲିସ ପକ୍ଷରୁ ସୁରକ୍ଷା ଯୋଗାଯିବ। ପ୍ରତି ରଥ ଚତୁଃପାର୍ଶ୍ୱରେ ପୋଲିସ ଫୋର୍ସ ମୁତୟନ ରହିବେ।
