ଭୁବନେଶ୍ୱର,୧୨ା୪(ବ୍ୟୁରୋ):୩ ବର୍ଷ ପରେ ଓଡ଼ିଶା ସଚିବାଳୟ ସେବା ସଂଘର ମୋଟ ୯ ପଦବୀ ନିର୍ବାଚନ ମଙ୍ଗଳବାର ଅନୁଷ୍ଠିତ ହେବ। ୟୁନିଟ୍-୩ସ୍ଥିତ ଖାରବେଳ ନଗରରେ ଥିବା ସଂଘ କାର୍ଯ୍ୟାଳୟଠାରେ ସକାଳ ୮ଟାରୁ ଅପରାହ୍ନ ୪ଟା ମଧ୍ୟରେ ଭୋଟ ଗ୍ରହଣ କରାଯିବ। ଦୀର୍ଘଦିନ ପରେ ନିର୍ବାଚନ ହେଉଥିବାରୁ ଦୁଇ ଗୋଷ୍ଠୀ ନିର୍ବାଚନ ମଇଦାନକୁ ଓହ୍ଲାଇଛନ୍ତି। ଏହି ନିର୍ବାଚନରେ ବରିଷ୍ଠ ବନାମ କନିଷ୍ଠ ପ୍ରାର୍ଥୀଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା ଜୋର୍ଦାର ହେଉଛି। ତେବେ ଅଭିଜ୍ଞତା ଦୃଷ୍ଟିରୁ ବରିଷ୍ଠ ପ୍ରାର୍ଥୀମାନେ କନିଷ୍ଠଙ୍କଠାରୁ ଆଗରେ ଥିବା ନେଇ ଚର୍ଚ୍ଚା ହେଉଛି।
ବରିଷ୍ଠ ଗୋଷ୍ଠୀ ମଧ୍ୟରେ ପଦ୍ମଲୋଚନ ନାୟକ ସଭାପତି ଭାବେ ପ୍ରତିଦ୍ୱନ୍ଦ୍ୱିତା କରୁଥିବା ବେଳେ ଅସିତ୍ ଜେନା, ରଶ୍ମିରଞ୍ଜନ ଜେନା ଉପସଭାପତି, ସାଧାରଣ ସମ୍ପାଦକ ଭାବେ ବିବେକାନନ୍ଦ ସାମଲ, ସମ୍ପାଦକ ଭାବେ ପଙ୍କଜ ସାହୁ, ମାନସ ରଞ୍ଜନ ସୂତାର, ଲଲାଟେନ୍ଦୁ କେଶରୀ ରାଉତ, ସମୀର କୁମାର ପ୍ରଧାନ ଏବଂ ଅଡିଟର ପଦବୀରେ ବିଜୟିନୀ ହେମ୍ବ୍ରମ୍ ପ୍ରତିଦ୍ୱନ୍ଦ୍ୱିତା କରୁଛନ୍ତି। ସାଧାରଣ ସମ୍ପାଦକ ଭାବେ ବିବେକାନନ୍ଦ ସାମଲ ଗତ ନିର୍ବାଚନରେ ବିଜୟୀ ହୋଇ ପୁଣି ନିର୍ବାଚନ ମଇଦାନକୁ ଓହ୍ଲାଇଛନ୍ତି।
ସେହିପରି ଅନ୍ୟ ଏକ ଗୋଷ୍ଠୀରୁ ସଭାପତି ପଦ ପାଇଁ ଅଜୟ କୁମାର ସ୍ବାଇଁ, ଉପସଭାପତି ଭାବେ ଅକ୍ଷୟ କୁମାର ପରିଡ଼ା ଓ ପ୍ରତ୍ୟୁଷ କୁମାର ପରିଡ଼ା, ସାଧାରଣ ସମ୍ପାଦକ ଭାବେ ପ୍ରଜ୍ୟୋତ୍ନ ବରାଳ, ସମ୍ପାଦକ ଭାବେ ବିବେକାନନ୍ଦ ସାହୁ, ଅମିତ କୁମାର ମହାନ୍ତି, ବିଷ୍ଣୁ ଚରଣ ନାଏକ, ଚିରଞ୍ଜୀବୀ ସ୍ବାଇଁ ଏବଂ ଅଡିଟର ଭାବେ ଲଳିତ ମୋହନ ଦାସ ପ୍ରତିଦ୍ୱନ୍ଦ୍ୱିତା କରୁଛନ୍ତି।
ପ୍ରାର୍ଥୀମାନେ ନିଜ ନିଜ ସପକ୍ଷରେ ମତଦାନ କରିବାକୁ ସଚିବାଳୟରେ କ୍ୟାମ୍ପେନିଂକୁ ଜୋର୍ଦାର କରିଛନ୍ତି। ସଚିବାଳୟରେ ଏଏସ୍ଓଠାରୁ ଆରମ୍ଭ କରି ଅତିରିକ୍ତ ଶାସନ ସଚିବ ପର୍ଯ୍ୟନ୍ତ ୨ ହଜାର କର୍ମଚାରୀ ନିର୍ବାଚନରେ ମତ ସାବ୍ୟସ୍ତ କରିବେ। ଏଏସ୍ଓ ପଦବୀକୁ ସହାୟକ ସଚିବ ପଦବୀରେ ନାମିତ କରାଯିବା ସହ ସେମାନଙ୍କ ଗ୍ରେଡ୍ ପେ’ ୪ ହଜାର ୬୦୦ ଟଙ୍କା କରିବା ନେଇ ୧୯ ଦଫା ନିର୍ବାଚନ ଇସ୍ତାହାର ଜାରି କରାଯାଇଛି। ସୂଚନାଯୋଗ୍ୟ, ସେବା ସଂଘ ନିର୍ବାଚନ ଶେଷଥର ପାଇଁ ୨୦୧୭ରେ ହୋଇଥିଲା। ପ୍ରତି ୨ ବର୍ଷରେ ଥରେ ନିର୍ବାଚନ ହେବା କଥା। ମାତ୍ର ୨୦୧୯ରେ କୋଭିଡ୍ ମହାମାରୀ ପାଇଁ କଟକଣା ଲାଗିବାରୁ ନିର୍ବାଚନ ସ୍ଥଗିତ ରହିଥିଲା। କୋଭିଡ୍ କଟକଣା ହଟିବା ପରେ ମଙ୍ଗଳବାର ନିର୍ବାଚନ ହେବାକୁ ଦିନ ଧାର୍ଯ୍ୟ କରାଯାଇଛି।