ଭୁବନେଶ୍ୱର, ୮।୨(ବ୍ୟୁରୋ): ରାଜ୍ୟରେ ସୋମବାରଠାରୁ ନବମ ଓ ଏକାଦଶ ଶ୍ରେଣୀ ଖୋଲିବ। ଦୀର୍ଘ ୧୦ମାସ ପରେ ପିଲା ସ୍କୁଲ୍ ଯାଇ ପାଠପଢ଼ିବେ। ସୋମବାରରୁ ଶନିବାର ପ୍ରତ୍ୟହ ସକାଳ ୮ଟା ୩୦ରୁ ୧୦ଟା ୩୦ ପର୍ଯ୍ୟନ୍ତ ପାଠପଢ଼ା ହେବ। ୩ଟି ପିରିୟଡ଼ରେ ଶିକ୍ଷାଦାନ ଦିଆଯିବ। ଏହା ମଧ୍ୟରେ କୌଣସି ମଧ୍ୟାନ୍ତର ରହିବ ନାହିଁ। ରବିବାର ପାଠପଢ଼ା ହେବ ନାହିଁ। ମାର୍ଚ୍ଚ ଦ୍ୱିତୀୟ ସପ୍ତାହରେ ଏକ ୟୁନିଟ୍ ପରୀକ୍ଷା ହେବ। ଏପ୍ରିଲ ଶେଷ ସପ୍ତାହରେ ବାର୍ଷିକ ପରୀକ୍ଷା ହେବ। ତେବେ ଏହି ପିଲାଙ୍କ ପାଠପଢ଼ା ସମୟରେ କୋଭିଡ୍ ଗାଇଡ୍ଲାଇନର ସବୁ ନିୟମକୁ ଅନୁପାଳନ କରିବା ପାଇଁ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ସମସ୍ତ ସ୍କୁଲ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦିଆଯାଇଛି।
ସୂଚନାଯୋଗ୍ୟ, କରୋନା ମହାମାରୀ ପାଇଁ ଗତ ମାର୍ଚ୍ଚରୁ ରାଜ୍ୟରେ ସମସ୍ତ ଶିକ୍ଷାନୁଷ୍ଠାନ ବନ୍ଦ ରହିଥିଲା। ଧୀରେ ଧୀରେ ସ୍ଥିତି ସୁଧୁରିବା ପରେ ପିଲାଙ୍କ ପାଠପଢ଼ା ଓ ବୋର୍ଡ ପରୀକ୍ଷାକୁ ଗୁରୁତ୍ୱ ଦେଇ ରାଜ୍ୟ ସରକାର ପ୍ରଥମେ ଦଶମ ଓ ଦ୍ୱାଦଶ ଶ୍ରେଣୀ ପିଲାଙ୍କ ପାଇଁ ସ୍କୁଲ ଖୋଲିଛନ୍ତି। ଗତ ଜାନୁୟାରୀ ୮ରୁ ଏହି ଦୁଇ ଶ୍ରେଣୀର ପିଲାଙ୍କ ପାଠପଢ଼ା ଚାଲିଛି। ରବିବାର ବି ସ୍କୁଲ ଖୋଲା ରହିବା ସହ ପାଠପଢ଼ା ହେଉଛି। ୧୦୦ଦିନ ପାଠପଢ଼ା ପରେ ସେମାନଙ୍କ ପରୀକ୍ଷା ହେବ। ତେବେ ଇତିମଧ୍ୟରେ ମେ’ ୩ରୁ ମାଟ୍ରିକ ପରୀକ୍ଷା ହେବ ବୋଲି ବିଭାଗ ପକ୍ଷରୁ ସୂଚନା ଦିଆଯାଇଛି। ନବମ ଓ ଏକାଦଶ ପାଠପଢ଼ା ଆରମ୍ଭ ହେଲେ ସ୍କୁଲ ପରିସର ଏଣିକି ଚଳଚଞ୍ଚଳ ହୋଇପଡିବ।
