ଭୁବନେଶ୍ୱର, ୧୧।୧ (ତପନ ସ୍ବାଇଁ): କଟକର ଜବାହରଲାଲ ନେହେରୁ ଇନ୍ଡୋର ଷ୍ଟାଡିୟମରେ ଚାଲିଥିବା ଅଲ୍ଟିମେଟ ଖୋ ଖୋ ସିଜନ-୨ର ୨ଟି ଯାକ ସେମିଫାଇନାଲ ଗୁରୁବାର ଅନୁଷ୍ଠିତ ହେବ। ସନ୍ଧ୍ୟା ୭ଟା ୩୦ରେ ହେବାକୁଥିବା ପ୍ରଥମ ସେମିଫାଇନାଲରେ ଗୁଜରାଟ ଜାଏଣ୍ଟ୍ସକୁ ଭେଟିବ ଡିଫେଣ୍ଡିଂ ଚାମ୍ପିୟନ ଓଡ଼ିଶା ଜଗରନଟ୍ସ। ରାତି ୮ଟା ୩୦ରେ ଦ୍ୱିତୀୟ ସେମିଫାଇନାଲରେ ଚେନ୍ନାଇ କୁଇକ୍ ଗନ୍ସ ଓ ତେଲୁଗୁ ଯୋଦ୍ଧାସ ମଧ୍ୟରେ ମୁକାବିଲା ହେବ। ତୃତୀୟ ସ୍ଥାନ ପାଇଁ ପ୍ଲେ-ଅଫ୍ ଓ ଫାଇନାଲ ୧୩ ତାରିଖରେ ଖେଳାଯିବ।
ଓଡ଼ିଶା ଜଗରନଟ୍ସ ଏଥର ଦ୍ୱିତୀୟ ସ୍ଥାନରେ ରହି ଲିଗ୍ ପର୍ଯ୍ୟାୟ ଶେଷ କରିଥିଲା। ଏହି ଦଳ ଖେଳିଥିବା ୧୦ ମ୍ୟାଚରୁ ୬ ବିଜୟ, ୨ ପରାଜୟ ଓ ୨ ଡ୍ର ସହ ୨୩ ପଏଣ୍ଟ ପାଇଥିଲା। ସବୁଠାରୁ ଉଲ୍ଲେଖନୀୟ ହେଲା ଶେଷ ୫ ମ୍ୟାଚରେ ଅପରାଜେୟ ରହିଛି ଘରୋଇ ଦଳ। ଏହା ମଧ୍ୟରେ ୪ ବିଜୟ ଅନ୍ତର୍ଭୁକ୍ତ। ନିଜର ଶେଷ ଲିଗ୍ ମ୍ୟାଚରେ ଏହି ଦଳ ମୁମ୍ବାଇ ଖିଲାଡିଜ୍କୁ ୩୪-୨୪ ପଏଣ୍ଟରେ ହରାଇ ଦେଇଥିଲା। ଚଳିତ ସିଜନର ଅନ୍ୟତମ ଶ୍ରେଷ୍ଠ ବଜିର ଦୀପକ ସାହୁ, ଗୌତମ ଏମ.କେ. ଓ ଦିଲୀପ ଖାଣ୍ଡଭିଙ୍କ ଭଳି ଖେଳାଳିମାନେ ଗୁରୁତ୍ୱପୂର୍ଣ୍ଣ ସମୟରେ ଦଳ ପାଇଁ ଉନ୍ନତ ପ୍ରଦର୍ଶନ କରିବାରେ ସକ୍ଷମ ହୋଇଛନ୍ତି। ଘରୋଇ ଦର୍ଶକଙ୍କ ସମ୍ମୁଖରେ ସେମିଫାଇନାଲରେ ଏମାନଙ୍କ ପ୍ରଦର୍ଶନ ଆହୁରି ଉତ୍ସାହଜନକ ରହିବା ଆଶା କରାଯାଉଛି। ଗୁଜରାଟ ଜାଏଣ୍ଟ୍ସ ୧୦ ମ୍ୟାଚ ଖେଳିଥିବାବେଳେ ୬ ବିଜୟ, ୩ ପରାଜୟ ଓ ୧ ଡ୍ର ସହ ୨୧ ପଏଣ୍ଟରେ ରହି ଲିଗ୍ ପର୍ଯ୍ୟାୟ ଶେଷ କରିଛି। ଏହି ଦଳ ଯେଉଁ ଦଳଠାରୁ ପରାଜିତ ହୋଇଥିଲା ପରିବର୍ତ୍ତୀ ରିଭର୍ସ ମ୍ୟାଚରେ ତାକୁ ହରାଇ ପ୍ରତିଶୋଧ ନେବାରେ ସକ୍ଷମ ହୋଇଛି। ତେଣୁ ଓଡ଼ିଶା ଜଗରନଟ୍ସ ନିଜ ଗୁଜରାଟ ପ୍ରତିଦ୍ୱନ୍ଦ୍ୱୀକୁ ଗୁରୁତ୍ୱର ସହ ନେଉଛି। ଡିସେମ୍ବର ୩୦ରେ ଅନୁଷ୍ଠିତ ଲିଗ୍ ମ୍ୟାଚରେ ଓଡ଼ିଶା ଦଳ ୨୯-୩୪ରେ ଗୁଜରାଟଠାରୁ ହାରି ଯାଇଥିଲା। ଦୁଇ ଦଳ ମଧ୍ୟରେ ଜାନୁୟାରୀ ୬ରେ ଅନୁଷ୍ଠିତ ଦ୍ୱିତୀୟ ମୁକାବିଲାରେ କିନ୍ତୁ ଓଡ଼ିଶା ଜଗରନଟ୍ସ ୩୦-୨୭ରେ ଗୁଜରାଟକୁ ହରାଇବାରେ ସକ୍ଷମ ହୋଇଥିଲା। ତେଣୁ ଦୁଇ ସମକକ୍ଷ ପ୍ରତିଦ୍ୱନ୍ଦ୍ୱୀଙ୍କ ମଧ୍ୟରେ ଆଗାମୀ ମୁକାବିଲା ସଂଘର୍ଷପୂର୍ଣ୍ଣ ହେବା ଆଶା କରାଯାଉଛି। ଅଲ୍ଟିମେଟ ଖୋ ଖୋ ସୋନି ସ୍ପୋଟର୍ସ ନେଟଓ୍ବର୍କ ଓ ସୋନି ଲିଭ୍ରେ ପ୍ରସାରିତ ହେଉଛି।
