ଖୋର୍ଦ୍ଧା ଅଫିସ,୨୪ା୩: ପୌର ନିର୍ବାଚନ ପାଇଁ ଗୁରୁବାର ଭୋଟ ଗ୍ରହଣ ହେବ। ୩ବର୍ଷ ପରେ ନିର୍ବାଚନ ଅନୁଷ୍ଠିତ ହେଉଥିବାରୁ ସମସ୍ତଙ୍କ ମଧ୍ୟରେ ରହିଛି ଉତ୍କଣ୍ଠା। କିଏ ବାଜି ମାରିବ ତାହାକୁ ନେଇ ଚାଲିଛି ଚର୍ଚ୍ଚା। ଚଳିତ ନିର୍ବାଚନରେ ପୌର ଅଧ୍ୟକ୍ଷ ଆସନ ପାଇଁ ସିଧାସଳଖ ଭୋଟ ହେଉଛି। ଏଥର ପୌର ନିର୍ବାଚନରେ ନୋଟା (ଏଥିରୁ କୌଣସିଟି ନୁହେଁ) ରହିଛି। ପୌରାଧ୍ୟକ୍ଷା ପାଇଁ ୩ ପ୍ରମୁଖ ରାଜନୈତିକ ଦଳ ବିଜେଡି, ଭାଜପା ଏବଂ କଂଗ୍ରେସ ମଧ୍ୟରେ ଲଢେଇ ହେବ। ବିଜେଡିର କନକଲକ୍ଷ୍ମୀ ମହାନ୍ତି, ଭାଜପାର କୁନିଲତା ସ୍ବାଇଁ ଏବଂ କଂଗ୍ରେସରୁ ବିନୋଦିନୀ ମହାପାତ୍ର ରଣାଙ୍ଗନରେ ଅବତୀର୍ଣ୍ଣ ହୋଇଛନ୍ତି।
ବିଜେଡି ଓ ଭାଜପା ପ୍ରାର୍ଥୀଙ୍କ ମଧ୍ୟରେ କଡା ଟକ୍କର ହେବା ସମ୍ଭାବନା ରହିଛି। ବିଜେଡିର ପୌରାଧ୍ୟକ୍ଷା ପ୍ରାର୍ଥୀଙ୍କୁ ନେଇ ପୂର୍ବରୁ ଦଳରେ ଅସନ୍ତୋଷ ବଢିଥିବା ବେଳେ ପରବର୍ତ୍ତୀ ସମୟରେ ଅସନ୍ତୁଷ୍ଟମାନେ ଦଳୀୟ ନିଷ୍ପତ୍ତିକୁ ସମ୍ମାନ ଜଣାଇ ପ୍ରାର୍ଥୀଙ୍କ ସପକ୍ଷରେ ପ୍ରଚାର କରିଥିଲେ। ଏପରିକି ବେଗୁନିଆ ବିଧାୟକ ଏବଂ ଖୋର୍ଦ୍ଧା ବିଧାୟକ ଗୋଟିଏ ମଞ୍ଚରେ ଏକାଠି ହୋଇଥିଲେ। ତେବେ ଦଳରେ ଅସନ୍ତୋଷ ପାଇଁ ବିଜୟ ପଥରେ କଣ୍ଟା ସାଜିପାରେ ବୋଲି ଚର୍ଚ୍ଚା ହେଉଛି। ସେହିପରି ଭାଜପା ପ୍ରାର୍ଥୀ କୁନିଲତା ପୂର୍ବରୁ ୩ଥର କାଉନସିଲର ଓ ଉପାଧ୍ୟକ୍ଷ ରହିଥିଲେ। ତାଙ୍କ ଅଭିଜ୍ଞତା କାମ ଦେବ ବୋଲି କୁହାଯାଉଛି।
ସେହିପରି ମହିଳାଙ୍କ ଭୋଟ ତାଙ୍କ ସପକ୍ଷରେ ଅଧିକ ଯାଇପାରେ ବୋଲି ଆଲୋଚନା ହେଉଛି। ଭାଜପାା ପୂର୍ବତନ ଜିଲା ସଭାପତି ନିକୁଞ୍ଜ ପଟ୍ଟନାୟକ କହିଛନ୍ତି, ଜନାଦେଶ ଆମ ସାଥିରେ ରହିଛି ପୌର ଅଧ୍ୟକ୍ଷ ସମେତ ଏକାଧିକ ୱାର୍ଡରେ ଭାଜପା ପ୍ରାର୍ଥୀ ବିଜୟ ଲାଭ କରିବେ। ଅନ୍ୟପଟେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଯାଦୁ ଆଗରେ ବିରୋଧୀଙ୍କ ରଣନୀତି କାମ କରିବ ନାହିଁ ବୋଲି ବିଧାୟକ ଜ୍ୟୋତିରୀନ୍ଦ୍ର ନାଥ ମିତ୍ର କହିଛନ୍ତି। ଖୋର୍ଦ୍ଧା ପୌର ପରିଷଦ ପୁଣି ବିଜେଡି ଦଖଲ କରିବ ବୋଲି ସେ ଦୃଢୋକ୍ତି ପ୍ରକାଶ କରିଛନ୍ତି। ଏକ ମନରେ ଦଳ ପାଇଁ କାମ କରିବା ସହ ପ୍ରାର୍ଥୀଙ୍କୁ ବିଜୟ କରାଇବା ଲାଗି ଆହ୍ବାନ ଦିଆଯାଇଛି। ପୌର ଅଧ୍ୟକ୍ଷା ଆସନ ହାତେଇବା ଦଳ ପାଇଁ ଚ୍ୟାଲେଞ୍ଜ ପାଲଟିଛି। ମିଶନ ମହିଳା ଏସ୍ଏଚ୍ଜି ଗ୍ରୁପ, ବସ୍ତି ଭୋଟ ବିଜେଡି ହାତରେ ରହିଛି।