ପୁରୁଣା ଭୁବନେଶ୍ୱର,୧୪ା୧୦(ସୁବାସ ଚନ୍ଦ୍ର ପ୍ରଧାନ)ରବିବାର ବିଶ୍ୱ ଧଳାବାଡ଼ି ଦିବସ। ଏହି ଦିବସ ପାଳନ ପୂର୍ବରୁ ଅର୍ଥାତ୍ ଶନିବାର ରାଜାରାଣୀ ମନ୍ଦିର ପରିସରରେ ଫୁଲ, ଚନ୍ଦନ, ସିନ୍ଦୂର ଦେଇ ଧଳାବାଡ଼ିକୁ ସମ୍ମାନର ସହ ପୂଜା କରିଛନ୍ତି ରାଜ୍ୟର କେତେଜଣ ଦୃଷ୍ଟିବାଧିତ ଖେଳାଳି। ଧଳାବାଡ଼ି ହେଉଛି ହୃଦୟର ସ୍ପନ୍ଦନ, ଆମ ସ୍ବାଭିମାନ ଓ ବନ୍ଧୁପରି। ସର୍ବଦା ଏହା ବିପଦଆପଦରେ ସାହା ହୋଇଥାଏ। ଏହି ବାଡ଼ି ଦ୍ୱାରା ବିଶ୍ୱକୁ ଜିଣିପାରିବା ବୋଲି ଯୋଗଦେଇଥିବା ଖେଳାଳିମାନେ ମତବ୍ୟକ୍ତ କରିଥିଲେ। ଦୃଷ୍ଟିବାଧିତଙ୍କ ବିକାଶ ଲାଗି କାର୍ଯ୍ୟ କରୁଥିବା ସାମାଜିକ ଅନୁଷ୍ଠାନ ‘ବୁଲ୍ସଆଇ’ ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମରେ ଅନୁଷ୍ଠାନର ସମ୍ପାଦକ ତଥା ରାଜ୍ୟର ପ୍ରଥମ ଦୃଷ୍ଟିବାଧିତ ପାରାସେଲର ବାପିନା ନାୟକ ଯୋଗଦେଇ କହିଥିଲେ, ରାଜ୍ୟରେ ପାଖାପାଖି ୭୦ପ୍ରତିଶତ ଦୃଷ୍ଟିବାଧିତ ବ୍ୟକ୍ତି ଧଳାବାଡ଼ି ବ୍ୟବହାର କରନ୍ତି ନାହିଁ। ରାଜ୍ୟ ସରକାର ଦୃଷ୍ଟିବାଧିତଙ୍କୁ ମାଗଣାରେ ଧଳାବାଡ଼ି ଯୋଗାଇ ଦେଉଛନ୍ତି। କିନ୍ତୁ ଏହି ବାଡ଼ିକୁ ଧରି ଚାଲିବାର ଯେଉଁସବୁ ପ୍ରଶିକ୍ଷଣ କୌଶଳ ଆବଶ୍ୟକ ଥାଏ ତାହା ରାଜ୍ୟରେ ଉପଲବ୍ଧ ନାହିଁ। ଓରିଏଣ୍ଟେଶନ ମୋବିଲିଟି ଟ୍ରେନିଂ କିମ୍ବା ଦକ୍ଷ ପ୍ରଶିକ୍ଷକ ନାହାନ୍ତି। ତେବେ ପ୍ରତି ଜିଲାରେ ପ୍ରଶିକ୍ଷଣ କେନ୍ଦ୍ର ଖୋଲିବାକୁ ସାମାଜିକ କର୍ମୀ ସୁଶାନ୍ତ ସାହୁ ସରକାରଙ୍କ ନିକଟରେ ଦାବି କରିଛନ୍ତି। ଉକ୍ତ କାର୍ଯ୍ୟକ୍ରମରେ ‘ବୁଲ୍ସଆଇ’ର ଅଧ୍ୟକ୍ଷ ତ୍ରିଲୋଚନ ବେଉରା, କୋଷାଧ୍ୟକ୍ଷ ପ୍ରିୟବ୍ରତ ପଣ୍ଡା, ବରିଷ୍ଠ ପରାମର୍ଶଦାତା ଚନ୍ଦ୍ରଶେଖର ପାଲ୍, ଅମରନାଥ ସିଂସାମନ୍ତ ଯୋଗଦେଇ ଧଳାବାଡ଼ିର ମହତ୍ୱ ଉପରେ ଆଲୋକପାତ କରିଥିଲେ। ସାମାଜିକ କର୍ମୀ ସନ୍ତୋଷ କୁମାର ଜେନା, ଚନ୍ଦନ କୁମାର ପାହାଡ଼ସିଂ, ରଞ୍ଜନ ଦଳେଇ ପ୍ରମୁଖ ସହଯୋଗ କରିଥିଲେ।
