କସାରାଗୋଡ: ମୌସୁମୀ ବର୍ଷାରେ ୨ବର୍ଷ ତଳେ ଘର ଭାଙ୍ଗିଯିବା ପରେ ବାସହୀନ ହୋଇଥିଲେ ଦୁଇ ଛାତ୍ରୀଛାତ୍ର(ଭଉଣୀ-ଭାଇ)। ତେବେ ଦୁଇ ସ୍କୁଲ ଏକାଠି ହୋଇ ସେମାନଙ୍କ ପାଇଁ ଏକ ଘର ତିଆରି କରିଛନ୍ତି। କେରଳର କସାରାଗୋଡ ଜିଲାରୁ ଆସିଛି ଏପରି ଏକ ଭଲ ଖବର। କାୟୁର୍-ଚେମେନି ପଞ୍ଚାୟତର ପୋଡାଭୋର୍ ଅଞ୍ଚଳର ସୁଜିତ୍ ଏମ୍. କୋଡାକ୍କଡ଼ସ୍ଥିତ କେ.ଏମ୍. ଭୋକେସନାଲ ହାୟର ସେକେଣ୍ଡାରି ସ୍କୁଲରେ ପଢ଼ୁଥିବାବେଳେ ଭଉଣୀ ନିବେଦିୟା ଏମ୍ ପୋଡାଭୋର୍ ଅନୁଦାନପ୍ରାପ୍ତ ୟୁପି ସ୍କୁଲରେ ପଢ଼ୁଛନ୍ତି। ୨୦୧୮ ଜୁଲାଇରେ ପ୍ରବଳବର୍ଷା ଯୋଗୁ ଏକ ନଡ଼ିଆଗଛ ୨ ଛାତ୍ରୀଛାତ୍ରଙ୍କ ଘର ଉପରେ ପଡ଼ିଥିଲା। ଘର ପୁରୁଣା ହୋଇଥିବାରୁ ଭାଙ୍ଗିଯାଇଥିଲା। ଏହାପରେ ଦୁଇ ଛାତ୍ରୀଛାତ୍ର ଏବଂ ମା’ ଗୀତା ନିରାଶ୍ରୟ ହୋଇଯାଇଥିଲେ। ଗୀତା ସେ ସମୟରେ ଘର ନିର୍ମାଣ ପାଇଁ କାୟୁର ଚେମେନି ପଞ୍ଚାୟତର ସହାୟତା ଲୋଡ଼ିଥିଲେ। କିନ୍ତୁ କୌଣସି ସୁଫଳ ମିଳିପାରି ନ ଥିଲା। ତେବେ ୨୦୧୯ରେ ଓନମ୍ ପୂର୍ବରୁ ଝିଅ ନିବେଦିୟାଙ୍କ ସ୍କୁଲର ପ୍ରଧାନ ଶିକ୍ଷକ କେ.ଏମ୍. ଅନୀଲ କୁମାର ଘର ପରିଦର୍ଶନରେ ଆସିଥିଲେ। ଏହି ସମୟରେ ଛାତ୍ରୀଙ୍କ ଘର ଅବସ୍ଥା ଦେଖି ଆଶ୍ଚର୍ଯ୍ୟ ହୋଇଥିଲେ। ସମସ୍ତ ବିଷୟ ଜାଣିବା ପରେ ପଞ୍ଚାୟତରୁ କୌଣସି ସାହାଯ୍ୟ ନ ମିଳିଲେ ସ୍କୁଲ କର୍ତ୍ତୃପକ୍ଷ ଏ ନେଇ ପଦକ୍ଷେପ ନେବା ଉଚିତ ବୋଲି ସେ ଚିନ୍ତା କରିଥିଲେ। ଘର ତିଆରି ପାଇଁ ସ୍କୁଲ କର୍ତ୍ତୃପକ୍ଷ ମଧ୍ୟ ରାଜି ହୋଇଥିଲେ। ଗୀତା ୧.୨୫ ଲକ୍ଷ ଟଙ୍କା ସଞ୍ଚୟ କରିଥିବାବେଳେ ଅଷ୍ଟ୍ରେଲିଆରେ ରହୁଥିବା ପୋଡାଭୋର୍ ସ୍କୁଲର ଜଣେ ପୂର୍ବତନ ଛାତ୍ର ୧ଲକ୍ଷ ଟଙ୍କା ସାହାଯ୍ୟ କରିଥିଲେ। ପରେ ନିବେଦିୟା ଏବଂ ସୁଜିତ୍ଙ୍କ ସ୍କୁଲ କର୍ତ୍ତୃପକ୍ଷଙ୍କ ପ୍ରଚେଷ୍ଟାରେ ମୋଟ ୬ଲକ୍ଷ ଟଙ୍କା ବ୍ୟୟରେ ନିବେଦିୟା ଏବଂ ସୁଜିତ୍ଙ୍କ ପାଇଁ ଘର ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। ୨୦୧୯ ସେପ୍ଟେମ୍ବରରେ ଘର କାମ ଆରମ୍ଭ ହୋଇଥିବାବେଳେ ଇତିମଧ୍ୟରେ ସମ୍ପୂର୍ଣ୍ଣ ହୋଇଛି। ନିର୍ମାଣ କାର୍ଯ୍ୟ ଚାଲିଥିବା ସମୟରେ ରାଜ୍ୟ ଶିକ୍ଷାମନ୍ତ୍ରୀ ସି. ରବୀନ୍ଦ୍ରନାଥ ସୋସିଆଲ ମିଡିଆରେ ଏକ ଭିଡିଓ ଶେୟାରକରି ୨ ସ୍କୁଲର ପ୍ରଚେଷ୍ଟାକୁ ପ୍ରଶଂସା କରିଥିଲେ। ସେ ଆହୁରି ମଧ୍ୟ କହିଥିଲେ, ସେମାନେ କେବଳ ଏକ ଘର ତିଆରି କରିନାହାନ୍ତି ବରଂ ଏକତା ଓ ସ୍ନେହର ପରିଚୟ ଦେଇଛନ୍ତି। ତେଣୁ ପିଲାମାନଙ୍କ ମଧ୍ୟରେ ‘ମୁଁ’ ମନୋଭାବ ଦୂରକରି ‘ଆମେ’ ଚିନ୍ତାଧାରା ସୃଷ୍ଟିକରିବା ପାଇଁ ଆମେ ପ୍ରଚେଷ୍ଟା କରିବା ଆବଶ୍ୟକ ବୋଲି ସେ କହିଛନ୍ତି। ନିକଟରେ ଏକ କାର୍ଯ୍ୟକ୍ରମରେ ପଞ୍ଚାୟତ ସଭାପତି ଶକୁନ୍ତଳା ଏବଂ କେ.ଏମ୍. ଭୋକେସନାଲ ହାୟର ସେକେଣ୍ଡାରି ସ୍କୁଲର ପ୍ରଧାନ ଶିକ୍ଷୟିତ୍ରୀ ଏ. ବିମଳା କୁମାରୀଙ୍କ ଉପସ୍ଥିତିରେ ତ୍ରିକାରିପୁର ବିଧାୟକ ଏମ୍. ରାଜଗୋପାଳ ନିବେଦିୟା ଏବଂ ସୁଜିତ୍ଙ୍କୁ ନୂତନ ଘରର ଚାବି ହସ୍ତାନ୍ତର କରିଛନ୍ତି। ଉଲ୍ଲେଖଯୋଗ୍ୟ, ଗୀତା ମଧ୍ୟ ପୋଡାଭୋର୍ସ୍ଥିତ ଅନୁଦାନପ୍ରାପ୍ତ ୟୁପି ସ୍କୁଲର ପୂର୍ବତନ ଛାତ୍ରୀ।