ରାଉରକେଲା ଅଫିସ,୪।୨: ରାଉରକେଲା ମହାନଗର ନିଗମ ଅଧୀନ ପାନପୋଷ ବଜାରରେ ଥିବା ସାର୍ବଜନୀନ ଶୌଚାଳୟ ଏବେ ବ୍ୟବହାର ଅନୁପଯୋଗୀ ହୋଇପଡିଛି। ଫଳରେ ବଜାରକୁ ଆସୁଥିବା ଗ୍ରାହକ ଏବଂ ବ୍ୟବସାୟୀମାନେ ଅସୁବିଧା ଭୋଗୁଛନ୍ତି।
ପାନପୋଷ ବଜାର ରାଉରକେଲାର ସର୍ବପୁରାତନ ବଜାର। ୯ଏକର ପରିମିତ ଜାଗାରେ ଏହି ବଜାର ରହିଛି। ଏଠାରେ ୧୫୦ରୁ ଊର୍ଦ୍ଧ୍ୱ ଦୋକାନ ରହିଛି। ବଜାରର ଆୟକୁ ଦେଖି କିଛି ମାସ ତଳେ ରାଉରକେଲା ମହାନଗର ନିଗମ ତରଫରୁ ବଜାର ପରିସରରେ ଲକ୍ଷାଧିକ ଟଙ୍କା ବ୍ୟୟରେ ଏକ ସାର୍ବଜନୀନ ଶୌଚାଳୟ ନିର୍ମାଣ କରାଯାଇଥିଲା। ମାତ୍ର ବର୍ତ୍ତମାନ ସୁଦ୍ଧା ଏହା ଦୋକାନୀ ଏବଂ ଗ୍ରାହକଙ୍କ କାମରେ ଆସିପାରିନାହିଁ। ନବନିର୍ମିତ ଶୌଚାଳୟଟି ଆବର୍ଜନା ପରିପୂର୍ଣ୍ଣ ହୋଇପଡିଛି। ମହିଳା ପୁରୁଷଙ୍କ ପାଇଁ ଉଦ୍ଦିଷ୍ଟ ପାଇଖାନା ଭାଙ୍ଗିରୁଜି ଗଲାଣି। ଭିତର ଏବଂ ବାହାର ବେଶିନରେ ଆବର୍ଜନା ଭର୍ତ୍ତି ହୋଇଛି। ଶୌଚାଳୟରେ ଲାଗିଥିବା ଉପକରଣ ମଧ୍ୟ ଚୋରି ହୋଇଗଲାଣି। ଅନ୍ୟପଟେ ପାନପୋଷ ବଜାରର ରାସ୍ତାଘାଟ, ଡ୍ରେନେଜ୍ ଅବସ୍ଥା ମଧ୍ୟ ଦୟନୀୟ ହୋଇପଡିଛି। ଏତେବଡ ବଜାରରେ ପାନୀୟ ବ୍ୟବସ୍ଥା ପାଇଁ କେବଳ ମାତ୍ର ଗୋଟିଏ ଓ୍ବାଟର ଟ୍ୟାଙ୍କର ରହିଛି। ଯାହାକି ଦୋକାନୀ, ଗ୍ରାହକଙ୍କ ପାନୀୟ ଆବଶ୍ୟକତାକୁ ମେଣ୍ଟାଇ ପାରୁନାହିଁ। ଏ ଦିଗରେ ସ୍ଥାନୀୟ ପ୍ରଶାସନର ଉଦାସୀନତା ଯୋଗୁ ଏଭଳି ସମସ୍ୟା ସୃଷ୍ଟି ହୋଇଛି ବୋଲି କିଛି ବ୍ୟବସାୟୀ କହିଛନ୍ତି। ଏ ନେଇ ମହାନଗର ନିଗମର ମୁଖ୍ୟ କିରାଣୀ ବିଜୟ କୁମାର ବେହେରା କୁହନ୍ତି, ବଜାରର ବ୍ୟବସାୟୀମାନଙ୍କ ଅଭିଯୋଗ ଭିତ୍ତିହୀନ। ନବନିର୍ମିତ ଶୌଚାଳୟରୁ ଦାମିକିଆ ଉପକରଣା ଚୋରି ହେଲା ପରେ ବି କେହି ଆମକୁ ଅବଗତ କଲେ ନାହିଁ। ୫୦ ଦିନ ମଧ୍ୟରେ ଉକ୍ତ ଦୋକାନୀମାନଙ୍କୁ ଅନ୍ୟତ୍ର ସ୍ଥାନାନ୍ତର କରାଯିବ। ଯେଉଁଠି ନୂତନ ଭାବେ ପାନପୋଷ ବଜାର ନିମନ୍ତେ ଉପଯୁକ୍ତ ଭିତ୍ତିଭୂମି ପ୍ରସ୍ତୁତ ହୋଇସାରିଛି ବୋଲି ସେ କହିଥିଲେ। ଏ ସମ୍ପର୍କରେ ରାଉରକେଲା ମହାନଗର ନିଗମ କମିଶନର ଡା. ଶୁଭଙ୍କର ମହାପାତ୍ରଙ୍କୁ ପଚାରିବାରୁ ପାନପୋଷ ବଜାରର ସାର୍ବଜନିକ ଶୌଚାଳୟକୁ ସୁବ୍ୟବସ୍ଥିତ କରିବା ଦିଗରେ ତୁରନ୍ତ ପଦକ୍ଷେପ ନିଆଯିବ ବୋଲି ସେ କହିଥିଲେ।