ଟୋକିଓ, ୧।୮: କୋଭିଡ୍-୧୯ର ଡେଲ୍ଟା ଭାରିଆଣ୍ଟ ଯୋଗୁ ଏସିଆ ମହାଦେଶରେ ପୁଣିଥରେ ସଂକ୍ରମଣ ବଢ଼ିବା ଆରମ୍ଭ କରିଛି। ଅଲିମ୍ପିକ୍ସ ଆୟୋଜନ କରୁଥିବା ଟୋକିଓ ସହର ସମେତ ମାଲେସିଆ ଏବଂ ଥାଇଲାଣ୍ଡରେ ଶନିବାର ସର୍ବାଧିକ ସଂକ୍ରମିତ ଚିହ୍ନଟ ହୋଇଛନ୍ତି। ପୂର୍ବରୁ ସଂକ୍ରମଣ ରୋକିବାରେ ସକ୍ଷମ ହୋଇଥିବା କେତେକ ଦେଶରେ ଡେଲ୍ଟା ଭାରିଆଣ୍ଟ ଯୋଗୁ ପୁଣି ଆକ୍ରାନ୍ତଙ୍କ ସଂଖ୍ୟା ବଢ଼ିବା ଆରମ୍ଭ ହୋଇଛି। ସେଥିପାଇଁ ଭିଏତନାମ ସୋମବାରଠାରୁ ପୁଣିଥରେ ବିଭିନ୍ନ ସହର ଓ ପ୍ରଦେଶରେ କଟକଣା କଡ଼ାକଡ଼ି କରିବାକୁ ନିଷ୍ପତ୍ତି ନେଇଛି। ଶନିବାର ଟୋକିଓରେ ୪,୦୫୮ ପଜିଟିଭ୍ ଚିହ୍ନଟ ହୋଇଛନ୍ତି। ସେହିପରି ମାଲେସିଆରେ ଗୋଟିଏ ଦିନରେ ସର୍ବାଧିକ ୧୭,୭୮୬ ସଂକ୍ରମିତ ହୋଇଥିବା ଜଣାପଡ଼ିଛି। ଥାଇଲାଣ୍ଡରେ ଶନିବାର ୧୮,୯୧୨ ନୂଆ ସଂକ୍ରମିତଙ୍କୁ ମିଶାଇ ସେଠାରେ ମୋଟ ମାମଲା ସଂଖ୍ୟା ୫,୯୭,୨୮୭ରେ ପହଞ୍ଚିଛି। ଡେଲ୍ଟା ଭାରିଆଣ୍ଟ ଯୋଗୁ ସଂକ୍ରମଣ ୬୦ ପ୍ରତିଶତ ବଢ଼ିଥିବା ସରକାରଙ୍କ ପକ୍ଷରୁ କୁହାଯାଇଛି। ଡେଲ୍ଟା ଭାରିଆଣ୍ଟ ଯୋଗୁ ଚାଇନାର ନାଞ୍ଜିଙ୍ଗ୍ ସହରରେ ସଂକ୍ରମଣ ବଢ଼ିଛି।
