ଟୋକିଓ,୨୬।୭: ଟୋକିଓ ଅଲିମ୍ପିକ୍ସରେ ସୋମବାର ଚତୁର୍ଥ ଦିନ। କିନ୍ତୁ ପ୍ରତିଯୋଗିତା ଆଧାରରେ ଆଜି ତୃତୀୟ ଦିନ। ତେବେ ପ୍ରାରମ୍ଭିକ ମ୍ୟାଚ୍ ଗୁଡିକରେ ଭାରତୀୟ ଦଳ ଭଲ ପ୍ରଦର୍ଶନ କରିଥିଲେ ମଧ୍ୟ ପରାଜୟର ସାମ୍ନା କରିବାକୁ ପଡିଛି। ଭାରତୀୟ ମହିଳା ଫେସିଂ ଖେଳାଳି ଭବାନୀ ଦେବୀ ଆଜି ମ୍ୟାଚ୍ ହାରି ମଧ୍ୟ ଇତିହାସ ରଚିଛନ୍ତି। ଭବାନୀ ଭାରତ ପକ୍ଷରୁ ଅଲିମ୍ପିକ୍ସରେ ଭାଗ ନେଇଥିବା ପ୍ରଥମ ଫେନ୍ସିଂ ଖେଳାଳି ହୋଇଥିଲେ। ସୋମବାର ନିଜର ପ୍ରଥମ ଅଲିମ୍ପିକ ଅଭିଯାନରେ ଚମତ୍କାର ଆରମ୍ଭ କରି ମହିଳା ବ୍ୟକ୍ତିଗତ ସାବ୍ରେରେ ପ୍ରଥମ ରାଉଣ୍ଡ ମ୍ୟାଚ ଜିତି ଇତିହାସ ସୃଷ୍ଟି କରିଥିଲେ। କିନ୍ତୁ ଦ୍ୱିତୀୟ ମୁକାବିଲାରେ ପରାସ୍ତ ହେବା ସହ ତାଙ୍କର ଅଭିଯାନ ଶେଷ ହୋଇଥିଲା। ୨୭ ବର୍ଷୀୟା ଭବାନୀ ଦେବୀ ଟ୍ୟୁନିସିଆର ନାଡିଆଆ ବେନ ଅଜିଜିଙ୍କୁ ୧୫-୩ରେ ପରାସ୍ତ କରି ଟେବୁଲ୍ ଅଫ୍ ୩୨ ରାଉଣ୍ଡରେ ପ୍ରବେଶ କରିଥିଲେ ଏବଂ ଅଲିମ୍ପିକ୍ସରେ ଫେନ୍ସିଂରେ ଏକ ମ୍ୟାଚ ଜିତିବାରେ ପ୍ରଥମ ଭାରତୀୟ ହୋଇଥିଲେ। ଦ୍ୱିତୀୟ ରାଉଣ୍ଡରେ ଭବାନୀ ଫ୍ରାନ୍ସର ମେନନ ବ୍ରୁନେଟଙ୍କଠାରୁ ୭-୧୫ରେ ହାରିଥିଲେ। ତାମିଲନାଡୁ ରାଜଧାନୀ ଚେନ୍ନାଇରେ ଜନ୍ମଗ୍ରହଣ କରିଥିବା ଭବାନୀ ଫେନ୍ସିଂ ବିଶ୍ୱ ର଼୍ୟାଙ୍କିଂରେ ୪୨ତମ ସ୍ଥାନରେ ଅଛନ୍ତି।
