ଟୋକିଓ,୬।୮: ଟୋକିଓ ଅଳିମ୍ପିକ୍ସରେ ଏକ ଅଭାବନୀୟ ଘଟଣା ଘଟିଛି। ଭାରତୀୟ ରେସଲର ଦୀପକ ପୁନିଆ ୮୬ କେଜି ଫ୍ରିଷ୍ଟାଇଲ ବ୍ରୋଞ୍ଜ ପଦକ ମ୍ୟାଚ୍ରେ ସାନ ମାରିନୋର ମାଇଲ ନାଜିମ ଆମିନେଙ୍କ ଠାରୁ ୪-୨ରେ ପରାସ୍ତ ହୋଇଥିଲେ। ମାତ୍ର କିଛି ସେକେଣ୍ଡ୍ରେ ଦୀପକଙ୍କ ହାତରୁ ଚାଲିଯାଇଥିଲା ବ୍ରୋଞ୍ଜ ପଦକ। କାରଣ ଅନ୍ତିମ କିଛି ସେକେଣ୍ଡ୍ ପର୍ଯ୍ୟନ୍ତ ୨-୧ରେ ଆଗୁଆ ଥିଲେ ପୁନିଆ।
ପରାଜୟ ପରେ ପୁନିଆଙ୍କ ବିଦେଶୀ କୋଚ୍ ମୁରାଦ ଗାଇଦାରୋଭ ଉକ୍ତ ମ୍ୟାଚ୍ର ରେଫରିଙ୍କ ରୁମ୍ରେ ତାଙ୍କୁ ଆକ୍ରମଣ କରିଥିଲେ। ଏ ସମ୍ପର୍କରେ ଅନ୍ତର୍ଜାତୀୟ ଅଲିମ୍ପିକ୍ କମିଟି (ଆଇଓସି) ଓ ଭାରତୀୟ ଅଲିମ୍ପିକ୍ ଫେଡେରେଶନ (ଡବ୍ଲ୍ୟୁଏଫ୍ଆଇ)କୁ ତୁରନ୍ତ ସୂଚନା ଦେଇଥିଲା ବିଶ୍ୱ ରେସଲିଂ ସଂଘ (ଫିଲା)। ରୁଷିଆନ କୋଚ୍ଙ୍କ କାର୍ଯ୍ୟ ଲାଗି ଚେତାବନୀ ମିଳିବା ପରେ କ୍ଷମାପ୍ରାର୍ଥନା କରିଥିଲା ଡବ୍ଲ୍ୟୁଏଫ୍ଆଇ। ଏହାପରେ ବିଦେଶୀ କୋଚ୍ଙ୍କ ଚୁକ୍ତିକୁ ବାତିଲ କରି ଦିଆଯାଇଛି।
ମୁରାଦ ୨୦୦୮ ବେଜିଂ ଅଲିମ୍ପିକ୍ସରେ ୭୪ କେଜି ବର୍ଗରେ ରୌପ୍ୟ ପଦକ ଜିତିଥିଲେ। କିନ୍ତୁ ୨୦୦୪ରେ ଏଥେନ୍ସ ଗେମ୍ସର କ୍ୱାର୍ଟର ଫାଇନାଲରେ ହାରିବା ପରେ ମ୍ୟାଟ ଉପରେ ପ୍ରତିପକ୍ଷ ରେସଲରଙ୍କୁ ଆକ୍ରମଣ କରିଥିଲେ। ଏଥି ଯୋଗୁ ତାଙ୍କୁ ଡିକ୍ୱାଲିଫାଏ କରି ଦିଆଯାଇଥିଲା।
ଆଇଓସି ମୁରାଦଙ୍କ ଆକ୍ରେଡିଟେଶନ ବାତିଲ କରିଥିବା ବେଳେ ତୁରନ୍ତ ଅଲିମ୍ପିକ୍ସ ଭିଲେଜ ଛାଡ଼ି ଚାଲିଯିବାକୁ ଭାରତୀୟ ପ୍ରତିନିଧିଙ୍କ ପକ୍ଷରୁ କୁହାଯାଇଛି। ତେବେ ବିଦେଶୀ କୋଚ୍ଙ୍କ ଏଭଳି ଆଚରଣ ଯୋଗୁ ଭାରତୀୟ ଫେଡେରେଶନକୁ ବାସନ୍ଦ କରାଯାଇପାରେ ବୋଲି ଡବ୍ଲ୍ୟୁଏଫ୍ଆଇ ସଭାପତି ବ୍ରିଜ ଭୁଷଣ ଶରନ ସିଂ ଚିନ୍ତା ପ୍ରକାଟ କରିଛନ୍ତି।
