ନୂଆଦିଲ୍ଲୀ,୧୪।୮(ପି.ଟି.): ଆଗମୀ ଟୋକିଓ ଅଲିମ୍ପିକ୍ସରେ ଆଇନକ୍ସ ଗ୍ରୁପ୍ ଭାରତୀୟ ଦଳର ପ୍ରାୟୋଜକ ହେବ। ଏ ନେଇ ଗୁରୁବାର ଭାରତୀୟ ଅଲିମ୍ପିକ୍ ଆସୋସିଏଶନ (ଆଇଓଏ) ତରଫରୁ ଘୋଷଣା କରାଯାଇଛି। କୋଭିଡ୍-୧୯ ମହାମାରୀ ପାଇଁ ଟୋକିଓ ଅଲିମ୍ପିକ୍ସକୁ ଆସନ୍ତା ବର୍ଷକୁ ଘୁଞ୍ଚାଇ ଦିଆଯାଇଥିଲା। ଅଲିମ୍ପିକ୍ସ ଏବେ ୨୦୨୧ ଜୁଲାଇ ୨୩ରୁ ଅଗଷ୍ଟ ୮ ତାରିଖ ମଧ୍ୟରେ ଆୟୋଜନ ହେବ।
ଭାଗୀଦାରି ସ୍ବରୂପ ଏହି ଗ୍ରୁପ୍ ମନୋରଞ୍ଜନ ଧର୍ମୀ କମ୍ପାନୀ ଆଇନକ୍ସ ଲିଜର ଲିମିଟେଡ ଦ୍ୱାରା ଭାରତୀୟ ଦଳର ପ୍ରମୋଶନ କରିବ। ସାରା ଦେଶରେ ଆଇନୋକ୍ସର ବହୁ ସଂଖ୍ୟାରେ ମଲ୍ଟିପ୍ଲେକ୍ସ ବା ପ୍ରେକ୍ଷାଳୟ ରହିଛି। ଭାରତର ପ୍ରଗତି ପାଇଁ ଆଇନକ୍ସ ଗ୍ରୁପ୍ ସବୁବେଳେ ପ୍ରାଧାନ୍ୟ ଦେଇଆସିଛି ଓ ଭାରତୀୟ ଦଳର ପ୍ରାୟୋଜକ ହୋଇ ଆମେ ଗୌରବାନ୍ବିତ ମନେ କରୁଛୁ ବୋଲି ଆଇନକ୍ସ ଗ୍ରୁପ୍ ଡାଇରେକ୍ଟର ସିଦ୍ଧାର୍ଥ ଜୈନ କହିଛନ୍ତି। ଆଇନକ୍ସ ଗ୍ରୁପ୍ ସହ ପାର୍ଟନଶିପ୍ ନେଇ ଆମେ ଘୋଷଣା କରୁଛୁ ଓ ଏହା ଦ୍ୱାରା ସବୁ ଆଥଲେଟ୍ ଲାଭବାନ ହୋଇପାରିବେ ବୋଲି ଆଇଓଏ ସାଧାରଣ ସମ୍ପାଦକ ରାଜୀବ ମେହେଟା କହିଛନ୍ତି। ବର୍ତ୍ତମାନ ପରିସ୍ଥିତିରେ ଭାରତୀୟ ଦଳକୁ ସମର୍ଥନ କରିଥିବାରୁ ଜୈନ ଆଇନକ୍ସ ଗ୍ରୁପ୍କୁ ଧନ୍ୟବାଦ ଜଣାଇଛନ୍ତି। ପୂର୍ବରୁ ଆଇନକ୍ସ ଗ୍ରୁପ୍ ଟେବୁଲ ଟେନିସ, ଫୁଟବଲ, ବ୍ୟାଡମିଣ୍ଟନ, ରନିଂ, ବାସ୍କେଟବଲ ଓ କ୍ରକେଟ ଭଳି ସ୍ପୋର୍ଟିଂ ଇଭେଣ୍ଟରେ ସମର୍ଥନ କରିଆସିଛି। ବିଭିନ୍ନ କାର୍ଯ୍ୟକ୍ରମର ଆୟୋଜନ କରି କ୍ରୀଡ଼ା ନେଇ ଏହି ଗ୍ରୁପ୍ ଜନ ଜାଗରଣ ସୃଷ୍ଟି କରିଛି। ଭାରତ ଅଲିମ୍ପିକ୍ସରେ ସଫଳତାର ଶୀର୍ଷକୁ ଛୁଇଁବ ବୋଲି ଜୈନ ଆଶା ପ୍ରକାଶ କରିଛନ୍ତି।