ଟୋକିଓ,୨୯।୬ (ଏପି): ଜୁଲାଇ ୨୩ରେ ଆରମ୍ଭ ହେବାକୁ ଯାଉଥିବା ଟୋକିଓ ଅଲିମ୍ପିକ୍ସରେ ଆୟୋଜକ ଜାପାନ ୩୦ଟି ସ୍ବର୍ଣ୍ଣ ପଦକ ହାସଲ କରିବ ବୋଲି ପୂର୍ବରୁ ଦାବି କରିଆସୁଥିଲା। ତେବେ ବର୍ତ୍ତମାନ ଏହି ଦାବିରୁ ଜାପାନ ଓହରିଯାଇଛି। ଏତେ ସଂଖ୍ୟକ ସ୍ବର୍ଣ୍ଣ ହାସଲ କରିବା କଷ୍ଟକର ବୋଲି ଜାପାନ ସ୍ବୀକାର କରିଛି। ଜାପାନ ସମେତ ପ୍ରାୟ ସବୁ ଦେଶ ପାଇଁ ପଦକ ସଂଖ୍ୟାର ପୂର୍ବାନୁମାନ କଷ୍ଟକର ହୋଇପଡିଛି। କୋଭିଡ୍-୧୯ ମହାମାରୀ କାରଣରୁ ଅଲିମ୍ପିକ୍ସ କ୍ୱାଲିଫାଇଙ୍ଗ୍ ଇଭେଣ୍ଟଗୁଡିକ ପ୍ରଭାବିତ ହୋଇଛି ଓ ଆଥଲେଟମାନଙ୍କ ଟ୍ରେନିଂରେ ମଧ୍ୟ ବ୍ୟାଘାତ ସୃଷ୍ଟି ହୋଇଛି।
କିଛିମାସ ତଳେ ମହାମାରୀର ପ୍ରଭାବ ପୂର୍ବରୁ ଜାପାନ ଅଲିମ୍ପିକ କମିଟି (ଜେଓସି) ୩୦ଟି ସ୍ବର୍ଣ୍ଣ ପଦକ ହାସଲ କରିବ ବୋଲି ଦାବି କରିଥିଲା। ଏବେ ଆମେ ୩୦ ସ୍ବର୍ଣ୍ଣ ପଦକ ହାସଲ କରିବୁ ବୋଲି ଟାର୍ଗେଟ ରଖିନାହୁଁ ବୋଲି କମିଟି ଅଧ୍ୟକ୍ଷ ୟାସୁହିରୋ ୟମାସିଟା କହିଛନ୍ତି। ଏବେ ପଦକ ସଂଖ୍ୟା ଉପରେ ଆମେ ଫୋକସ କରୁନାହୁଁ ବୋଲି ସେ ସ୍ପଷ୍ଟ କରିଛନ୍ତି। ତେବେ ଆମର ସବୁ ଆଥଲେଟ୍ ଶ୍ରେଷ୍ଠ ପ୍ରଦର୍ଶନ କରନ୍ତୁ ବୋଲି ଆଶା ରଖିଛୁ। ରିଓ ଓ ଲଣ୍ଡନ ଅଲିମ୍ପିକ୍ସ ଭଳି ଆମେରିକା ଓ ଜାପାନ ଏଥର ମଧ୍ୟ ସ୍ବର୍ଣ୍ଣ ପଦକ ହାସଲ କରିବାରେ ପ୍ରଥମ ଓ ଦ୍ୱିତୀୟ ସ୍ଥାନରେ ରହିବେ। କିନ୍ତୁ ୨୦୦୮ ବେଜିଂ ଅଲିମ୍ପିକ୍ସରେ ଆୟୋଜକ ଚାଇନା ଘରୋଇ ପରିବେଶରୁ ଫାଇଦା ଉଠାଇ ସର୍ବାଧିକ ସ୍ବର୍ଣ୍ଣ ହାସଲ କରି ଶୀର୍ଷସ୍ଥାନରେ ରହିଥିଲା।
୫ ବର୍ଷ ତଳେ ରିଓ ଅଲିମ୍ପିକ୍ସରେ ଜାପାନ ୧୨ ସ୍ବର୍ଣ୍ଣ ଜିତିଥିଲା। ୨୦୦୪ ଏଥେନ୍ସ ଓ ୧୯୬୪ ଟୋକିଓ ଅଲିମ୍ପିକ୍ସରେ ଜାପାନ ୧୬ଟି ସ୍ବର୍ଣ୍ଣ ଜିତି ଶ୍ରେଷ୍ଠ ପ୍ରଦର୍ଶନ କରିଥିଲା। ସାଧରଣତଃ ଆୟୋଜକ ଭାବେ ବିଭିନ୍ନ ଦେଶ ପୂର୍ବାପେକ୍ଷା ଭଲ ପ୍ରଦର୍ଶନ କରି ଅଧିକରୁ ଅଧିକ ସ୍ବର୍ଣ୍ଣ ଜିତିଥାନ୍ତି। ଜାପାନ ମଧ୍ୟ ଏଥର ଅଧିକ ପଦକ ଜିତିବ। କିନ୍ତୁ ୩୦ ସ୍ବର୍ଣ୍ଣ ପଦକ ହାସଲ କରିବ ବୋଲି ଆଶାକରିବା ଭୁଲ୍ ହେବ।