କାଶିମା, ୫।୭: ଜାପାନର କାଶିମା ସହରରେ ଅନୁଷ୍ଠିତ ଅଲିମ୍ପିକ ମଶାଲ ରାଲିରେ ସାମିଲ ହୋଇଛନ୍ତି କିମ୍ବଦନ୍ତୀ ବ୍ରାଜିଲ ଫୁଟବଲର ଜିକୋ। ସେ ଅନ୍ୟତମ ଅନ୍ତିମ ମଶାଲ ବାହକ ଭାବେ କାଶିମା ସହରର ଇବାରାକି ପ୍ରାନ୍ତରେ ରବିବାର ଅନୁଷ୍ଠିତ ମଶାଲ ରାଲିରେ ଦୌଡ଼ିଛନ୍ତି।
ଜଣେ ଆଟାକିଂ ମିଡ୍ଫିଲ୍ଡର ଭାବେ ବେଶ୍ ଜଣାଥିବା ଜିକୋ ନିଜର ରଚନାତ୍ମକ ଖେଳିବା ଶୈଳୀ, ଟେକ୍ନିକାଲ ସ୍କିଲ୍ ଓ ଗୋଲ ସ୍କୋର କରିବାର କ୍ଷମତା ପାଇଁ ବେଶ୍ ଲୋକପ୍ରିୟ ଥିଲେ। ବ୍ରାଜିଲ ପାଇଁ ଜିକୋ ୩ଟି ଫିଫା ବିଶ୍ୱକପ୍ ଖେଳିଛନ୍ତି। ସେ ୧୯୮୨ ଦଳର ସଦସ୍ୟ ଥିଲେ ଓ ଏହି ଦଳ ବିଶ୍ୱର ସର୍ବଶ୍ରେଷ୍ଠ ବୋଲି ମାନ୍ୟତା ପାଇଥିଲା। ଜଣେ ଖେଳାଳି ଭାବେ ସେ କାଶିମା ଆଣ୍ଟଲେର୍ସ କ୍ଲବରେ ୧୯୯୧ରେ ଯୋଗ ଦେଇଥିଲେ ଓ ୧୯୯୪ ପର୍ଯ୍ୟନ୍ତ କ୍ଲବ ସହିତ ଜଡିତ ଥିଲେ। ୨୦୦୨ରେ ସେ ଜାପାନ ଜାତୀୟ ଦଳର କୋଚ୍ ନିଯୁକ୍ତ ହୋଇଥିଲେ ଓ ଜର୍ମାନୀରେ ଅନୁଷ୍ଠିତ ୨୦୦୬ ବିଶ୍ୱକପ୍ରେ ଦଳର ଦାୟିତ୍ୱରେ ଥିଲେ। ଏବେ ସେ କାଶିମା ଆଣ୍ଟଲେର୍ସର ଟେକ୍ନିକାଲ ଡାଇରେକ୍ଟର ଭାବେ ଦାୟିତ୍ୱରେ ରହିଛନ୍ତି। ୧୨୧ ଦିନ ମଧ୍ୟରେ ଅଲିମ୍ପିକ୍ ମଶାଲ ରାଲି ଜାପାନର ୪୭ଟି ପ୍ରାନ୍ତରେ ଭ୍ରମଣ କରିବାର କାର୍ଯ୍ୟକ୍ରମ ଥିଲା। ଜୁଲାଇ ୨୩ ତାରିଖ ଉଦ୍ଘାଟନୀ ଦିବସରେ ମଶାଲ ରାଲି ଶେଷ ହେବ।
