ଟୋକିଓ,୩।୮: ଟୋକିଓ ଅଲିମ୍ପିକ୍ସରେ ଭାରତୀୟ ପୁରୁଷ ହକି ଦଳର ସ୍ବର୍ଣ୍ଣ ଜିତିବା ଆଶା ଭାଙ୍ଗିଯାଇଛି। ବେଲଜିୟମ ପ୍ରଥମ ସେମିଫାଇନାଲରେ ଭାରତୀୟ ପୁରୁଷ ହକି ଦଳକୁ ୨-୫ରେ ପରାସ୍ତ କରିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଏହି ମ୍ୟାଚ ଦେଖୁଥିଲେ ଏବଂ ଏହି ପରାଜୟରୁ ସେ ଟିକେ ନିରାଶ ହୋଇଥିଲେ ମଧ୍ୟ ବ୍ରୋଞ୍ଜ ପଦକ ମ୍ୟାଚ ପାଇଁ ଦଳର ଉତ୍ସାହ ବଢାଇବାକୁ ସେ ପଛାଇ ନ ଥିଲେ। ସେମିଫାଇନାଲରେ ପରାଜୟ ପରେ ପିଏମ ମୋଦି ଭାରତୀୟ ହକି ଦଳର ଅଧିନାୟକ ମନପ୍ରୀତ ସିଂଙ୍କ ସହ କଥା ହୋଇଥିଲେ ଏବଂ ତାଙ୍କୁ ଉତ୍ସାହିତ କରିଥିଲେ ଏବଂ ବ୍ରୋଞ୍ଜ ପଦକ ମ୍ୟାଚ ପାଇଁ ତାଙ୍କୁ ଶୁଭେଚ୍ଛା ଜଣାଇଥିଲେ। ଦଳର ଉଦ୍ୟମକୁ ପ୍ରଧାନମନ୍ତ୍ରୀ ମଧ୍ୟ ପ୍ରଶଂସା କରିଥିଲେ॥
୧୯୮୦ ମସିହାରୁ ହକିରେ ଭାରତ ଅଲିମ୍ପିକ ପଦକ ଜିତି ନାହିଁ। ଭାରତୀୟ ପୁରୁଷ ହକି ଦଳ ସେମିଫାଇନାଲରେ ପହଞ୍ଚିବା ମାତ୍ରେ ସମଗ୍ର ଦେଶ ସ୍ବର୍ଣ୍ଣ ଆଶା କରୁଥିଲା। କିନ୍ତୁ ଏକ କଡା ମ୍ୟାଚରେ ଭାରତକୁ ବେଲଜିୟମଠାରୁ ପରାଜୟର ସାମ୍ନା କରିବାକୁ ପଡିଥିଲା। ତଥାପି ପଦକ ଆଶା ଅକ୍ଷୁର୍ଣ୍ଣ ରହିଛି। ବ୍ରୋଞ୍ଜ ପଦକ ପାଇଁ ଅଗଷ୍ଟ ୫ ତାରିଖରେ ଭାରତୀୟ ଦଳ ମ୍ୟାଚ୍ ଖେଳିବ।