ନୁଆଦିଲ୍ଲୀ,୧୫।୧୦ (ପି.ଟି.): ଆସନ୍ତାବର୍ଷ ଟୋକିଓରେ ଆୟୋଜନ ହେବାକୁ ଥିବା ଅଲିମ୍ପିକ୍ସର ଫୁଲ୍ କୋଟା ହାସଲ କରିବା ପାଇଁ ଭାରତୀୟ ମହିଳା ତୀରନ୍ଦାଜ ବଡ଼ ଚ୍ୟାଲେଞ୍ଜ ତଥା କଷ୍ଟକର ପରିସ୍ଥିତର ସମ୍ମୁଖୀନ ହେଉଛନ୍ତି। ଏ ନେଇ ରାଜ୍ୟଗୋଷ୍ଠୀ କ୍ରୀଡ଼ା ସ୍ବର୍ଣ୍ଣ ପଦକ ବିଜୟିନୀ ତଥା ବିଶ୍ୱର ପୂର୍ବତନ ୧ ନମ୍ବର ମହିଳା ତୀରନ୍ଦାଜ ଦୀପିକା କୁମାରୀ କହିଛନ୍ତି। କୋଭିଡ୍ କାରଣରୁ ନିର୍ଦ୍ଧାରିତ ହୋଇଥିବା କେତେକ ଟୁର୍ନାମେଣ୍ଟ ବାତିଲ ହେବା ଫଳରେ ଏଭଳି ପରିସ୍ଥିତି ସୃଷ୍ଟି ହୋଇଛି ବୋଲି ସେ କହିଛନ୍ତି। ଅଲିମ୍ପିକ୍ସ ପାଇଁ ଯୋଗ୍ୟତା ହାସଲ କରିବାକୁ ଅର୍ଥାତ୍ ଦୁଇଟି କୋଟା ପ୍ଲେସ୍ ପାଇଁ ଭାରତୀୟ ମହିଳା ଆର୍ଚରଙ୍କ ପାଇଁ ଏବେ ମାତ୍ର ଗୋଟିଏ ଟୁର୍ନାମେଣ୍ଟ ବାକି ରହିଯାଇଛି। ତେଣୁ ଆମ ପାଇଁ କଷ୍ଟକର ପରିସ୍ଥିତି ସୃଷ୍ଟି ହୋଇଛି ବୋଲି ଦୀପିକା ଏକ ଅନ୍ ଲାଇନ୍ ଶୋ’ରେ ଅଂଶଗ୍ରହଣ କରି ଏହା କହିଛନ୍ତି।
ଭାରତୀୟ ମହିଳା ତୀରନ୍ଦାଜମାନେ କଠିନ ପରିଶ୍ରମ କରିଥିଲେ ଓ ଅଲିମ୍ପିକ୍ସ ପାଇଁ ଯୋଗ୍ୟତା ହାସଲ କରିବାକୁ ଆଶାବାଦୀ ଥିଲେ। କିନ୍ତୁ ଏବେ ପରିସ୍ଥିତି ଅଲଗା ହୋଇଛି। ଏବେ ମହିଳା ବର୍ଗ ପାଇଁ ଏକମାତ୍ର କୋଟା ପ୍ଲେସ୍ ରହିଛି। ଅନ୍ୟ ଦୁଇ କୋଟା ପ୍ଲେସ ପାଇଁ ଆଉ ମାତ୍ର ଗୋଟିଏ କ୍ୱାଲିଫାୟର ରହିଛି। ସାଧାରଣତଃ ଆମେ ଏହି ସମୟରେ ଫୁଲ୍ କୋଟା ହାସଲ କରିଥାଉ। କିନ୍ତୁ ଏଥର ସ୍ଥିତି ବଦଳିଯାଇଛି ବୋଲି ସେ କହିଛନ୍ତି। ଆସନ୍ତା ବର୍ଷ ଜୁନ୍ରେ ବିଶ୍ୱକପ୍ ଆୟୋଜନ ହେବାକୁ ପୂର୍ବରୁ ପ୍ୟାରିସ୍ରେ ଏକ ସ୍ବତନ୍ତ୍ର ଟୁର୍ନାମେଣ୍ଟ ଆୟୋଜନ ହେବ। ଏଥିରେ ଭାରତୀୟ ଆର୍ଚେରି ଟିମ ଅଂଶଗ୍ରହଣ କରିବ। ଅଲିମ୍ପିକ୍ସ ଯୋଗ୍ୟତା ହାସଲ କରିବାକୁ ଏହି ଟୁର୍ନାମେଣ୍ଟହିଁ ଭାରତୀୟ ଦଳ ପାଇଁ ଅନ୍ତିମ ସୁଯୋଗ ସୃଷ୍ଟି କରିଛି।
ଦୀପିକା ଏକମାତ୍ର ମହିଳା ଆର୍ଚର ଭାବେ ଅଲିମ୍ପିକ୍ସ ଯୋଗ୍ୟତା ହାସଲ କରିଛନ୍ତି। ଗତବର୍ଷ ବ୍ୟାଙ୍କକ୍ରେ ଅନୁଷ୍ଠିତ ଏସିଆନ୍ କଣ୍ଟିନେଣ୍ଟାଲ କ୍ୱାଲିଫିକେଶନ ଟୁର୍ନାମେଣ୍ଟରେ ସ୍ବର୍ଣ୍ଣ ପଦକ ଜିତି ଦୀପିକା ଯୋଗ୍ୟତା ହାସଲ କରିଥିଲେ। ୨୦୦୭ରେ ଦୀପିକା ତୀରନ୍ଦାଜୀରେ ପାଦ ଦେଇଥିଲେ। ସେ ଏବେ ବିଶ୍ୱ ର଼୍ୟାଙ୍କିଙ୍ଗ୍ର ନବମ ସ୍ଥାନରେ ରହିଛନ୍ତି। ପୁଣେରେ ଚାଲିଥିବା ଜାତୀୟ ପ୍ରଶିକ୍ଷଣ ଶିବିରରେ ସେ ଅଂଶଗ୍ରହଣ କରିଛନ୍ତି।
