ଟୋକିଓ,୧୪।୪(ଏପି): କୋଭିଡ୍-୧୯ର ପ୍ରଭାବ ଆଗାମୀ ଟୋକିଓ ଅଲିମ୍ପିକ୍ସ ଉପରେ ପଡିବାର ଆଶଙ୍କା ସୃଷ୍ଟି ହୋଇଛି। ମହମାରୀ କାରଣରୁ ଅଲିମ୍ପିକ୍ସର ମଶାଲ ରାଲି ଓସାକା ସହରର ଶୂନ୍ୟ ପାର୍କରେ ମଙ୍ଗଳବାର ଆୟୋଜନ କରାଯାଇଛି। ଓସାକାର ‘୭୦ କମେମୋରେଟିଭ୍ ପାର୍କ’ରେ ରନରମାନେ ବସ୍ରେ ଆସି ପହଞ୍ଚିଥିଲେ। ମଶାଲ ଧରି ଧାବକମାନେ ସ୍ବଳ୍ପ ଦୂରତା ବିଶିଷ୍ଟ ଅବଧି ଅତିକ୍ରମ କରିଥିଲେ। ସାଥୀରେ ସୁରକ୍ଷାକର୍ମୀମାନେ ମଧ୍ୟ ଦୌଡିଥିଲେ।
ଏହି ଦିନ ଓସାକାରେ କରୋନା ଭାଇରସ ସଂକ୍ରମଣ ୧,୦୯୯ରେ ପହଞ୍ଚିଛି। ଜାପାନର ଏହି ଦ୍ୱିତୀୟ ବୃହତମ ମେଟ୍ରୋପଲିଟାନରେ ଏହା ସିଙ୍ଗଲ ଡେ ରେକର୍ଡ ସାବ୍ୟସ୍ତ ହୋଇଛି। ୩ ଦିନ ତଳେ ଜାପାନର ଉତ୍ତରପୂର୍ବାଞ୍ଚଳରେ ମଶାଲ ରାଲି ୧୦,୦୦୦ ରନରଙ୍କୁ ନେଇ ଆରମ୍ଭ ହୋଇଥିଲା। ଜୁଲାଇ ୨୩ରେ ଟୋକିଓରେ ଆୟୋଜନ ହେବାକୁ ଥିବା ଉଦ୍ଘାଟନୀ ଉତ୍ସବରେ ଏହା ଶେଷ ହେବାର କାର୍ଯ୍ୟକ୍ରମ ଥିଲା। ଗତ ସପ୍ତାହର ଓସାକାର ସର୍ବସାଧାରଣ ରାସ୍ତାରୁ ରାଲିକୁ ବାତିଲ କରାଯାଇ ପାର୍କରେ ଆୟୋଜନ କରିବାକୁ ନିଷ୍ପତ୍ତି ନିଆଯାଇଥିଲା। ବୁଧବାର ଅଲିମ୍ପିକ୍ସର ୧୦୦ ଦିନିଆ କାଉଣ୍ଟଡାଉନ ଆରମ୍ଭ ହେବ। ଏହା ମଧ୍ୟ ଏହି ପାର୍କରେ ରୁଦ୍ଧଦ୍ୱାରରେ ଆରମ୍ଭ ହେବ।
କୋଭିଡ୍-୧୯ର ନୂଆ ମାମଲା ଜାପାନରେ ବୃଦ୍ଧିପାଇବାରେ ଲାଗିଛି। ୧ ପ୍ରତିଶତରୁ ସାମାନ୍ୟ କିଛି କମ୍ ଲୋକ ଟିକା ନେଇଛନ୍ତି। ଏହି ମହାମାରୀରେ ଜାପାନରେ ଏ ପର୍ଯ୍ୟନ୍ତ ୯,୫୦୦ ମୃତ୍ୟୁବରଣ କରିଛନ୍ତି। ଓସାକା, ଟୋକିଓ ଓ ଜାପାନର ଅନ୍ୟାନ୍ୟ ଅଞ୍ଚଳରେ ଜରୁରିକାଳୀନ ପରିସ୍ଥିତି ଘୋଷଣା କରାଯାଇଛି। ଜାପାନରେ ଅଲିମ୍ପିକ ଆୟୋଜନକୁ ମଧ୍ୟ ମହାମାରୀ ପାଇଁ ବିରୋଧ କରାଯାଉଛି। ୮୦ ପ୍ରତିଶତ ଜାପାନ ଅଧିବାସୀ ଅଲିମ୍ପିକ ବାତିଲ ହେବା ଚାହୁଁଛନ୍ତି। ଅଲିମ୍ପିକ ଓ ପାରା ଅଲିମ୍ପିକ ପାଇଁ ୧୫,୪୦୦ ଆଥ୍ଲେଟଙ୍କ ସହ ୧୦,୦୦୦ ଅଫିସିଆଲ, ଜଜ୍, ମିଡିଆ ଓ ବ୍ରଡ୍କାଷ୍ଟର୍ସ ଜାପାନ ଆସିବେ।