ନୂଆଦିଲ୍ଲୀ,୫।୪(ପି.ଟି.): ଆଗାମୀ ଟୋକିଓ ଅଲିମ୍ପିକ୍ସ ପାଇଁ ଭାରତୀୟ ଶୁଟିଂ ଦଳରେ ବିଶ୍ୱର ଏକନମ୍ବର ଶୁଟର ଏଲାଭେନିଲ ଭାଲାରିଭାନଙ୍କୁ ସାମିଲ କରାଯାଇଛି। ସେ ୧୫ ଜଣିଆ ଅଲିମ୍ପିକ ଦଳରେ ସାମିଲ ହୋଇଛନ୍ତି। ସେହିପରି ତାରକା ମହିଳା ଶୁଟର ମନୁ ଭାକର ୩ଟି ଇଭେଣ୍ଟରେ ଭାରତ ପାଇଁ ପ୍ରତିନିଧିତ୍ୱ କରିବେ। ତେବେ ଅଲିମ୍ପିକ କୋଟା ହାସଲ କରିଥିବା ଚିଙ୍କି ଯାଦବ ଗତ ମାସରେ ଦିଲ୍ଲୀରେ ଅନୁଷ୍ଠିତ ହୋଇଥିବା ବିଶ୍ୱକପ୍ରେ ସ୍ବର୍ଣ୍ଣ ପଦକ ହାସଲ କରିଥିଲେ ମଧ୍ୟ ଅଲିମ୍ପିକ ଦଳରେ ସାମିଲ ହୋଇନାହାନ୍ତି।
କୋଭିଡ୍-୧୯ ମହାମାରୀକୁ ଦୃଷ୍ଟିରେ ରଖି ନ୍ୟାଶନାଲ ରାଇଫଲ ଆସୋସିଏଶନ ଅଫ୍ ଇଣ୍ଡିଆ (ଏନ୍ଆରଏଆଇ) ପ୍ରତ୍ୟେକ ବର୍ଗର ଇଭେଣ୍ଟ ପାଇଁ ଦୁଇଜଣ ଲେଖାଏ ରିଜର୍ଭ ଶୁଟରଙ୍କ ନାମ ଘୋଷଣା କରିଛି। ତେବେ ଅଲିମ୍ପିକ୍ସ ପାଇଁ କୋଟା ପ୍ଲେସ ହାସଲ କରିଥିବା ଖେଳାଳିମାନଙ୍କ ରିଜର୍ଭ ଖେଳାଳିଙ୍କ ନାମ ଘୋଷଣା କରାଯାଇଛି।
ଜୁଲାଇ ୨୩ରୁ ଅଗଷ୍ଟ ୮ ତାରିଖ ମଧ୍ୟରେ ଆୟୋଜନ ହେବାକୁ ଥିବା ଟୋକିଓ ଅଲିମ୍ପିକ୍ସ ପାଇଁ ଏନ୍ଆରଏଆଇ ଏକ ୧୫ ଜଣିଆ ଭାରତୀୟ ଦଳ ଘୋଷଣା କରିଛି। ଏଲାଭେନିଲ ମହିଳା ୧୦ ମିଟର ଏୟାର ରାଇଫଲ ଇଭେଣ୍ଟରେ ଅଂଶଗ୍ରହଣ କରିବେ। ଏଲାଭେନିଲଙ୍କ ସମେତ ଅପୂର୍ବୀ ଚାଣ୍ଡେଲା ମଧ୍ୟ ଏହି ଇଭେଣ୍ଟରେ ଭାଗ ନେବେ। ଉଲ୍ଲେଖଥାଉ କି କୋଟ ଦେଶକୁ ମିଳିଥାଏ ଓ ଏହା ଶୁଟରଙ୍କୁ ମିଳି ନ ଥାଏ। ସେହିପରି ମନୁଭାକର ଓ ରାହି ସର୍ନୋବତ ୨୫ ମି. ପିସ୍ତଲ ଇଭେଣ୍ଟରେ ଭାଗ ନେବେ। ଭାକର ଓ ଯଶସ୍ବିନୀ ସିଂ ଦେଶଓ୍ବାଲ ୧୦ମି. ଏୟାର ପିସ୍ତଲ ଇଭେଣ୍ଟରେ ମଧ୍ୟ ଅଂଶଗ୍ରହଣ କରିବେ। ଏହା ବ୍ୟତୀତ ଭାକର ୧୦ ମିଟର ଏୟାର ପିସ୍ତଲ ମିକ୍ସଡ ଇଭେଣ୍ଟରେ ମଧ୍ୟ ଭାଗନେବେ। ଏହି ଇଭେଣ୍ଟରେ ଭାକରଙ୍କ ପାର୍ଟନର ରହିଛନ୍ତି ପୁରୁଷ ତାରକା ଶୁଟର ସୌରଭ ଚୌଧୁରୀ।
ଏନ୍ଆରଏଆଇ ଅଲିମ୍ପିକ୍ସ ସାଇକେଲ୍ରେ ପ୍ରଦର୍ଶନକୁ ଭିତ୍ତିକରି ଶୁଟରମାନଙ୍କୁ ଚୟନ କରାଯାଇଛି। ଏହି ଅଲିମ୍ପିକ ସାଇକେଲ ୨୦୧୮ ଜାକର୍ତ୍ତା ଏସିଆନ ଗେମ୍ସରୁ ଆରମ୍ଭ ହୋଇଛି। ଏହାପରେ ୨୦୧୯ରେ ସମସ୍ତ ୪ଟି ବିଶ୍ୱକପ୍ ଓ ଏସିଆନ ଚାମ୍ପିୟନଶିପ୍ର ପ୍ରଦର୍ଶନକୁ ମଧ୍ୟ ଗୁରୁତ୍ୱ ଦିଆଯାଇଛି। ୫ଟି ଅନ୍ତର୍ଜାତୀୟ ପ୍ରତିଯୋଗିତାର ହାରାହାରି ଶ୍ରେଷ୍ଠ ପ୍ରଦର୍ଶନକୁ ଭିତ୍ତିକରି ଏନ୍ଆରଏଆଇ ଦଳ ଚୟନ କରିବାର ନିୟମ ରହିଛି।
