ନୂଆଦିଲ୍ଲୀ,୨।୧୦: କଂଗ୍ରେସ ଅଧ୍ୟକ୍ଷ ନିର୍ବାଚନରେ ପ୍ରାର୍ଥୀ ଥିବା ମଲ୍ଲିକାର୍ଜୁନ ଖାର୍ଗେ ରବିବାର ଏକ ବଡ଼ ବୟାନ ଦେଇଛନ୍ତି। ଦଳର ସର୍ବସହମତିରେ ପ୍ରାର୍ଥୀ ହେବା ଭଲ ବୋଲି ସେ କହିଛନ୍ତି। ଏପରି କି କଂଗ୍ରେସ ଅଧ୍ୟକ୍ଷ ଲାଗି ରାହୁଲ ଗାନ୍ଧୀ, ସୋନିଆ ଗାନ୍ଧୀ କି ପ୍ରିୟଙ୍କା ଗାନ୍ଧୀ ନିର୍ବାଚନ ଲଢ଼ିବାକୁ ଚାହୁଁନାହାନ୍ତି। ତେଣୁ ମୋର ବରିଷ୍ଠ ସହକର୍ମୀମାନେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ମୋତେ କହିଥିଲେ। ଏ ନେଇ ଦଳର ବରିଷ୍ଠ ନେତାଙ୍କ ସହମତିରେ ନିର୍ବାଚନ ଲଢୁଥିବା ସେ କହିଛନ୍ତି।
କଂଗ୍ରେସ ନେତା ଶଶୀ ଥରୁର ଯେଉଁ ସ୍ଥିତି ଓ ପରିବର୍ତ୍ତନ ବିଷୟରେ କହୁଛନ୍ତି ତାହା ପ୍ରତିନିଧି ତଥା ଅଲ୍ ଇଣ୍ଡିଆ କଂଗ୍ରେସ କମିଟି ନିଷ୍ପତ୍ତି ନେବ। ମହାତ୍ମା ଗାନ୍ଧୀ ଏବଂ ଲାଲ୍ ବାହାଦୁର ଶାସ୍ତ୍ରୀଙ୍କ ଜନ୍ମ ବାର୍ଷିକୀରେ ମୋର ନିର୍ବାଚନ ପ୍ରଚାର ଆରମ୍ଭ କରୁଛି। ଆଦର୍ଶ ଏବଂ ନୈତିକତା ପାଇଁ ସର୍ବଦା ସଂଘର୍ଷ କରିଆସୁଛି। ମୁଁ ବିରୋଧୀ ଦଳର ନେତା, ମନ୍ତ୍ରୀ ଏବଂ ବିଧାୟକ ଭାବେ କାର୍ଯ୍ୟ କରିଆସିଛି। ବର୍ତ୍ତମାନ ପୁନର୍ବାର ଯୁଦ୍ଧ କରିବାକୁ ଚାହୁଁଛି ଏବଂ ସେହି ନୈତିକତା, ଆଦର୍ଶକୁ ଆଗକୁ ନେବାକୁ ଚାହୁଁଛି। କେବଳ ଦଳିତ ନେତା ଭାବେ ପ୍ରତିଦ୍ୱନ୍ଦ୍ୱିତା କରୁନାହିଁ ବରଂ କଂଗ୍ରେସ ନେତା ରୂପେ ପ୍ରତିଦ୍ୱନ୍ଦ୍ୱିତା କରୁଛି ଏବଂ ଏହା ଜାରି ରଖିବି ବୋଲି ଖାର୍ଗେ କହିଛନ୍ତି।
