କଟକ ଅଫିସ, ୧୩।୧:ଖାଦ୍ୟକୁ ସ୍ବାଦିଷ୍ଟ କରିବା ପାଇଁ ହୋଟେଲ, ଫାଷ୍ଟ ଷୁଡ ଦୋକାନ ଏବଂ ଘରେ ବ୍ୟବହୃତ ହେଉଛି ଟମାଟୋ ଓ ଚିଲି ସସ୍। ହେଲେ ଏହା ପଚା କଖାରୁ, ହାନିକାରକ ରଙ୍ଗ ଏବଂ ବିଭିନ୍ନ କେମିକାଲର ମିଶ୍ରଣରେ ପ୍ରସ୍ତୁତ କରାଯାଉଛି। ଏଭଳି ଏକ ସସ୍ କାରଖାନା କଟକରୁ ଠାବ ହୋଇଛି।
ଗୁରୁବାର ପୋଲିସ ଓ ସିଏମ୍ସି ପକ୍ଷରୁ ମାଲଗୋଦାମର ଏକ ଦୋକାନ ଏବଂ ୪୨ ମଉଜାରରେ ଏକ ସସ୍ ପସ୍ତୁତ କାରଖାନା ଉପରେ ଚଢାଉ କରାଯାଇଥିଲା। ଦୋକାନରୁ ୧୩ ପେଟି ନକଲି ଟମାଟୋ ଏବଂ ଚିଲି ସସ୍ ଜବତ କରାଯାଇଛି । ସସ୍ ବୋତଲରେ ପ୍ରସ୍ତୁତି ତାରିଖ କିମ୍ବା ଏଫ୍ଏସ୍ଏସ୍ଆଇର କୌଣସି ଟ୍ୟାଗ ନ ଥିବା ଦେଖିବାକୁ ମିଳିଛି। ଏହି ଘଟଣାରେ ପୋଲିସ ଦୋକାନୀଙ୍କୁ ଅଟକ ରଖି ପଚରାଉଚରା କରୁଛି। ଦୋକାନୀ ଜଣକ ଏହି ସସ୍ ୪୨ ମଉଜାର ଏକ କରାଖାନରେ ପ୍ରସ୍ତୁତ ହେଉଥିବା ପୋଲିସକୁ କହିଥିଲେ। ପରେ ପୋଲିସ ୪୨ ମଉଜାର ସସ୍ କରାଖାନାରେ ଚଢାଉ କରିଥିଲା।
କାରଖାନାରୁ ୧୦ ପେଟି ନକଲି ସସ, ୧୫ ଶହ ଲିଟର ସସ୍, ବିପୁଳ ପରିମାଣରେ ପଚା କଖାରୁ, ରଙ୍ଗ, ଏସିଡ, କେମିକାଲ ଆଦି ଜବତ କରାଯାଇଛି। ଏଥସହ କାରଖାନା ମାଲିକକୁ ଅଟକ ରଖି ଘଟଣାର ଅଧିକ ତଦନ୍ତ ଚାଲିଥିବା ମାଲଗୋଦାମ ଥାନା ଅଧିକାରୀ ତୃପ୍ତିରଞ୍ଜନ ନାୟକ ସୂଚନା ଦେଇଛନ୍ତି।
କରାଖାନାରେ କଖାରୁକୁ ବ୍ୟବହରା କରି ରଙ୍ଗ ଏବଂ କେମିକାଲ ମିଶାଇ ସସ୍ ପ୍ରସ୍ତୁତ କରାଯାଉଥିଲା। ପରେ ଉକ୍ତ ସସକୁ ବଜାରରେ ବିକ୍ରି କରାଯାଉଥିଲା। ଲିଟର ପିଛା ଏହାକୁ ୨୭ ଟଙ୍କାରେ ବିକ୍ରି କରାଯାଉଥିବା ଜଣାପଡିଛି। ତେବେ ଏହି କାରଖାନା ଦିର୍ଘ ଦିନରୁ ଚାଲିଥିବା ସୂଚନା ମିଳିଛି। ଚଢାଉ ପରେ କାରଖାନାକୁ ବନ୍ଦ କରାଯାଇଛି। ସେହିପରି ସିଏମ୍ସି ଖାଦ୍ୟ ସୁରକ୍ଷା ଅଧିକାରୀ ପ୍ରତିକ୍ଷା ଦାସ ମହାପାତ୍ର କହିଛନ୍ତି, ଏହି ସସ୍ ଖାଦ୍ୟ ଉପେଯୋଗୀ ନୁହେଁ। କାରଣ ଏଥିରେ ଅତ୍ୟାଧିକ ରଙ୍ଗ ଏବଂ କେମିକାଲ ମିଶ୍ରଣ କରାଯାଇଛି। ସସ୍ର ନମୁନା ସଂଗ୍ରହ କରି ପରୀକ୍ଷା ପାଇଁ ପଠାଯାଇଛି ବୋଲି ସେ କହିଛନ୍ତି।