ନୂଆଦିଲ୍ଲୀ, ୧୩।୯ : ଦିଲ୍ଲୀରେ ଟମାଟୋ ଦର ଆକାଶ ଛୁଆଁ ହୋଇଛି। ଏଠାରେ ଟମାଟୋର ଖୁଚୁରା ଦର ୮୦ରୁ ୮୫ ଟଙ୍କା ଛୁଇଁଥିବା ଜଣାପଡିଛି। ଜୁନ ମାସ ପରଠାରୁ ଟମାଟୋ କିଲୋ ପ୍ରତି ଦର ୫୦ରୁ ୬୦ ଟଙ୍କା ମଧ୍ୟରେ ବିକ୍ରି ହେଉଥିଲା। କିନ୍ତୁ ଅଚାନକ ଏହାର ଦରରେ ପରିବର୍ତ୍ତନ ଆସିଛି। ମାତ୍ର ସରକାର ରିପୋର୍ଟ ମୁତାବକ ଦିଲ୍ଲୀରେ ଟମାଟୋ କିଲୋ ପ୍ରତି ଦର ୬୦ଟଙ୍କା ରହିଛି। ମଦର ଡେରୀର ସଫଲ ଆଉଟଲେଟଗୁଡିକରେ ଏହା କିଲୋ ପ୍ରତି ୭୮ ଟଙ୍କାରେ ବିକ୍ରି ହେଉଛି। ସେହିଭଳି ଇ-ରିଟେଲର ଗ୍ରୋଫର୍ସ ୭୪ରୁ ୭୫ ଟଙ୍କା ଏବଂ ବିଗ୍ ବାସ୍କେଟରେ କିଲୋ ପ୍ରତି ଟମାଟୋ ଦର ୬୦ ଟଙ୍କା ରହିଛି। ବର୍ଷା ଯୋଗୁ ଫସଲ ନଷ୍ଟ ହେଉଥିବାରୁ ଏହାର ପ୍ରଭାବ ଦର ଉପରେ ପଡିଛି। ଯୋଗାଣ ପ୍ରଭାବିତ ହେଉଥିବାରୁ ବଜାରରେ ଏହାର ପ୍ରଭାବ ପରିଲକ୍ଷିତ ହେଉଥିବା ଜଣାପଡିଛି। ଉତ୍ତରପ୍ରଦେଶ, ରାଜସ୍ଥାନ, ଝାଡଖଣ୍ଡ, ପଞ୍ଜାବ, ତାମିଲନାଡୁ, କେରଳ, ଜମ୍ମୁ ଏବଂ କଶ୍ମୀର ଭଳି ରାଜ୍ୟରେ ଟମାଟୋ ଉତ୍ପାଦନ କମିଛି।