ସୋନପୁର/ବିନିକା,୧୨।୪(ନି.ପ୍ର./ଡି.ଏନ.ଏ.): ସୁବର୍ଣ୍ଣପୁର ବନଖଣ୍ଡ ବିନିକା ରେଞ୍ଜ ବାରଡୁଙ୍ଗୁରି ସଂରକ୍ଷିତ ଜଙ୍ଗଲରେ ମଙ୍ଗଳବାର ସକାଳେ ଏକ ଦନ୍ତାହାତୀର ମୃତଦେହ ଜବତ ହୋଇଛି। ବିଦ୍ୟୁତ୍ ତାର ସଂସ୍ପର୍ଶରେ ଆସି ହାତୀର ମୃତ୍ୟୁ ହୋଇଥିବା ଅନୁମାନ କରାଯାଉଛି। ବାର୍ହା ଶିକାର ପାଇଁ ଶିକାରୀମାନେ ପାର୍ଶ୍ୱରେ ଯାଇଥିବା ବିଦ୍ୟୁତ୍ ତାରରୁ ହୁକ ପକାଇ ଜଙ୍ଗଲରେ ବିଛାଇଥିଲେ। ହାତୀ ଏହି ତାର ସଂସ୍ପର୍ଶରେ ଆସିଯାଇଥିଲା। ମୃତ ହାତୀର ବୟସ ପ୍ରାୟ ୧୫ ବର୍ଷ ହେବ। ଖବରପାଇ ସୁବର୍ଣ୍ଣପୁର ବନଖଣ୍ଡ ଅଧିକାରୀ ମଦନଲାଲ ଶର୍ମା, ସହକାରୀ ବନସଂରକ୍ଷକ ପ୍ରଫୁଲ୍ଲ କୁମାର ଧରୁଆ ଓ ବିନିକା ବନକ୍ଷେତ୍ରାଧିକାରୀ ଡମ୍ବରୁଧର ପଧାନ ଘଟଣାସ୍ଥଳରେ ପହଞ୍ଚତ୍ଥିଲେ। ଅଢେଇ ଫୁଟ ଲମ୍ବର ହାତୀର ଦାନ୍ତକୁ କାଟି ବାହାର କରାଯାଇଛି। ଏ ସମ୍ପର୍କରେ ବିନିକା ବନବିଭାଗ ପକ୍ଷରୁ ଏକ ମାମଲା(୧/୨୩) ରୁଜୁ ହୋଇଛି। ଅଭିଯୁକ୍ତଙ୍କୁ ଧରିବା ପାଇଁ ବନବିଭାଗ ପକ୍ଷରୁ ତନାଘନା ଆରମ୍ଭ ହୋଇଛି। ବିନିକା ଗୋଷ୍ଠୀ ପ୍ରାଣୀ ଚିକିତ୍ସା ଅଧିକାରୀ ଡାକ୍ତର ନୃସିଂହ ଚରଣ ସାହୁ, ବିନିକା ଅତିରିକ୍ତ ପ୍ରାଣୀ ଚିକିତ୍ସା ଅଧିକାରୀ ଡାକ୍ତର କମଲ ପଧାନ ଓ ରାମପୁର ପ୍ରାଣୀ ଚିକିତ୍ସକ ଡାକ୍ତର ଆଲୋକ କୁମାର ସାହୁ ହାତୀର ଶବ ବ୍ୟବଚ୍ଛେଦ କରିଥିଲେ। ପରେ ଗାତ ଖୋଳି ଜଙ୍ଗଲରେ ହାତୀକୁ ପୋତି ଦିଆଯାଇଛି ।
ସୋମବାର ରାତିରେ ଉକ୍ତ ହାତୀ ଦଳରୁ ଅଲଗା ହୋଇଯାଇଥିଲା। ବଲାଙ୍ଗୀର ଜିଲା ଲୋଇସିଂହା ଅଞ୍ଚଳରୁ ହାତୀ ଅଙ୍ଗନଦୀ ଅତିକ୍ରମ କରି ସୁବର୍ଣ୍ଣପୁର ଜିଲା ବାରଡୁଙ୍ଗୁରି ସଂରକ୍ଷିତ ଜଙ୍ଗଲକୁ ଚାଲି ଆସିଥିଲା। ବଲାଙ୍ଗୀର କି ସୁବର୍ଣ୍ଣପୁର ଜିଲାର ବନବିଭାଗ କର୍ମଚାରୀ ଏହା ଜାଣି ପାରି ନ ଥିଲେ। ହାତୀଙ୍କ ଗତିବିଧି ଅନୁଧ୍ୟାନ ପାଇଁ ଏଲିଫ୍ୟାଣ୍ଟ ଟ୍ରାକିଂ ସ୍କ୍ବାଡ ରହିଛନ୍ତି । ମାତ୍ର ସେମାନେ ହାତୀର ଗତିବିଧି ଜାଣି ନ ପାରିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ବନ ବିଭାଗ ହାତୀ ଚଳପ୍ରଚଳ ସମ୍ପର୍କରେ ବିଦ୍ୟୁତ୍ ବିଭାଗକୁ ଅବଗତ କରି ନ ଥିଲା। ସମ୍ପୃକ୍ତ ଅଞ୍ଚଳରେ ସୋମବାର ରାତିରେ ବିଦ୍ୟୁତ୍ କାଟ୍ ହୋଇ ନ ଥିଲା। ଫଳରେ ହାତୀର ମୃତ୍ୟୁ ହେଲା ବୋଲି ଅଭିଯୋଗ ହେଉଛି।