ନୂଆଦିଲ୍ଲୀ, ୧୯।୯: କରୋନା ଭାଇରସ୍ର ପ୍ରଭାବ ମଧ୍ୟରେ ଶନିବାରଠାରୁ ବିଶ୍ୱର ସବୁଠାରୁ ବ୍ୟୟବହୁଳ ଟି୨୦ କ୍ରିକେଟ୍ ଟୁର୍ନାମେଣ୍ଟ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ୧୩ତମ ସଂସ୍କରଣ ଆରମ୍ଭ ହେବାକୁ ଯାଉଛି। ଗତଥରର ଚାମ୍ପିୟନ ଓ ରନର୍ସଅପ୍ ଟିମ୍ ମୁମ୍ବାଇ ଇଣ୍ଡିଆନ୍ସ ଓ ଚେନ୍ନାଇ ସୁପର୍ କିଙ୍ଗ୍ସ ଉଦ୍ଘାଟନୀ ମ୍ୟାଚ୍ରେ ପରସ୍ପରକୁ ଭେଟିବେ। ଆଇପିଏଲ୍ର ଚଳିତ ସିଜନରେ ଅନେକ ନୂଆ ରେକର୍ଡ ସ୍ଥାପନ ହେବାର ସମ୍ଭାବନା ରହିଛି। ଏହି ଅବସରରେ ଆସନ୍ତୁ ଜାଣିବା ଆଇପିଏଲ୍ ଇତିହାସର ୧୦ ବଡ଼ ରେକର୍ଡ ସମ୍ବନ୍ଧରେ।
୧- ଆଇପିଏଲ୍ ଇତିହାସର ସର୍ବାଧିକ ଦଳଗତ ସ୍କୋର ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋର ନାମରେ ରହିଛି। ୨୦୧୩ରେ ଗୁଜରାଟ ଲାୟନ୍ସ ବିପକ୍ଷରେ ବାଙ୍ଗାଲୋର ୫ ଉଇକେଟ୍ରେ ୨୬୩ ରନ୍ ସଂଗ୍ରହ କରିଥିଲା।
୨- ଆଇପିଏଲ୍ରେ ସର୍ବନିମ୍ନ ଦଳଗତ ସ୍କୋର ମଧ୍ୟ ବାଙ୍ଗାଲୋର ନାମରେ ରହିଛି। ୨୦୧୭ରେ କୋଲକାତା ନାଇଟ୍ ରାଇଡର୍ସ ବିପକ୍ଷରେ ବାଙ୍ଗାଲୋର ୪୯ ରନ୍ କରିବାକୁ ସକ୍ଷମ ହୋଇଥିଲା।
୩- ରନ୍ ବ୍ୟବଧାନରେ ସର୍ବବୃହତ୍ ବିଜୟ ମୁମ୍ବାଇ ଇଣ୍ଡିଆନ୍ସ ହାସଲ କରିଛି। ୨୦୧୭ରେ ମୁମ୍ବାଇ ୧୪୬ ରନରେ ଦିଲ୍ଲୀକୁ ପରାସ୍ତ କରିଥିଲା।
୪- ଗୋଟିଏ ମ୍ୟାଚ୍ରେ ସବୁଠାରୁ ଅଧିକ ଅତିରିକ୍ତ ରନ୍ ବ୍ୟୟ କରିବାର ଅଲୋଡ଼ା ରେକର୍ଡ କୋଲକାତା ନାମରେ ରହିଛି। ୨୦୦୮ରେ ଡେକାନ ଚାଜର୍ସ ବିପକ୍ଷରେ କୋଲକାତା ୨୮ ରନ୍ ଅତିରିକ୍ତ ଆକାରରେ ବ୍ୟୟ କରିଥିଲା।
୫- ଆଇପିଏଲ୍ରେ ସର୍ବାଧିକ ରନ୍ ସଂଗ୍ରହକାରୀ ବ୍ୟାଟ୍ସମ୍ୟାନ ହେବାର ସୌଭାଗ୍ୟ ଲାଭ କରିଛନ୍ତି ବିରାଟ କୋହଲି (୫,୪୧୨)।
୬- ଆଇପିଏଲ୍ରେ ସର୍ବାଧିକ ୬ ମାରିବାର କିର୍ତ୍ତୀମାନ କ୍ରିସ୍ ଗେଲ୍ (୩୨୬)ଙ୍କ ନାମରେ ରହିଛି।
୭- ଗୋଟିଏ ମ୍ୟାଚ୍ରେ ସର୍ବାଧିକ ବ୍ୟକ୍ତିଗତ ସ୍କୋରର ମଧ୍ୟ ଗେଲ୍ ରହିଛନ୍ତି। ୨୦୧୩ରେ ଗେଲ୍ ପୁନେ ଓ୍ବାରିୟର୍ସ ବିପକ୍ଷରେ ୬୬ ବଲରୁ ୧୭୫ ରନ୍ ସଂଗ୍ରହ କରିଥିଲେ।
୮- ଆଇପିଏଲ୍ରେ ସବୁଠାରୁ ଅଧିକ ଶତକ ହାସଲକାରୀ ବ୍ୟାଟ୍ସମ୍ୟାନ ତାଲିକାରେ ମଧ୍ୟ କ୍ରିସ୍ ଗେଲ୍ (୬ଟି) ଶୀର୍ଷରେ ରହିଛନ୍ତି।
୯- କିଙ୍ଗ୍ସ ଇଲେଭେନ ପଞ୍ଜାବର ଲୋକେଶ ରାହୁଲ ଦ୍ରୁତତମ ଅର୍ଦ୍ଧଶତକ ହାସଲକାରୀ ବ୍ୟାଟ୍ସମ୍ୟାନ ହେବାର ସୌଭାଗ୍ୟ ଲାଭ କରିଛନ୍ତି। ୨୦୧୮ରେ ସେ ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ୧୪ ବଲରୁ ୫୧ ରନ୍ ସଂଗ୍ରହ କରିଥିଲେ।
୧୦- ଆଇପିଏଲ୍ରେ ସବୁଠାରୁ ସଫଳ ବୋଲର ରହିଛନ୍ତି ମୁମ୍ବାଇ ଇଣ୍ଡିଆନ୍ସର ଲସିଥ୍ ମାଲିଙ୍ଗା। ମାଲିଙ୍ଗା ୧୨୨ ମ୍ୟାଚ୍ରୁ ମୋଟ୍ ୧୭୦ ଉଇକେଟ୍ ନେଇଛନ୍ତି।
