ଓ୍ବାଶିଂଟନ,୧୯।୪ : ନିବେଶ ସ୍ଥାନାନ୍ତରଣ ସଂସ୍ଥା ହେନଲି ଆଣ୍ଡ ପାର୍ଟନର୍ସଙ୍କ ଏକ ରିପୋର୍ଟରେ ପୃଥିବୀର ସବୁଠାରୁ ଧନୀ ସହରଗୁଡିକର ଏକ ତାଲିକା ପ୍ରକାଶ ପାଇଛି। ଏହି ତାଲିକାରେ ପ୍ରଥମ ୧୦ ଧନୀ ସହୀ ମଧ୍ୟରେ ଆମେରିକାର ୪ ଏବଂ ଚାଇନାର ୨ ସହର ରହିଛି। ତେବେ ତାଲିକାରେ ଭାରତର କୌଣସି ସହର ସ୍ଥାନ ପାଇ ନାହିଁ। ତାଲିକା ଅନୁଯାୟୀ, ଆମେରିକାର ନ୍ୟୁୟର୍କ ସିଟି ହେଉଛି ୫୮ ବିଲିୟନେୟାରଙ୍କ ସହ ବିଶ୍ୱର ସବୁଠାରୁ ଧନୀ ସହର। ତା’ପରେ ଜାପାନର ରାଜଧାନୀ ଟୋକିଓ ଏବଂ ଆମେରିକାର କାଲିଫର୍ନିଆ ସହର ସାନ ଫ୍ରାନ୍ସିସ୍କୋ ବେ ଏରିଆ ଯଥାକ୍ରମେ ଦ୍ୱିତୀୟ ଏବଂ ତୃତୀୟ ସ୍ଥାନରେ ରହିଛି।
୧ ମିଲିୟନ ଡଲାରରୁ ଅଧିକ ପୁଞ୍ଜି ବିନିଯୋଗ ଯୋଗ୍ୟ ସମ୍ପତ୍ତି ସହିତ ହାଇ-ନେଟ-ୱର୍ଥ ବ୍ୟକ୍ତିବିଶେଷଙ୍କର ବିଶ୍ଳେଷଣ କରାଯାଇ ଏହି ତାଲିକା ପ୍ରସ୍ତୁତ କରାଯାଇଛି। ତାଲିକାରେ, ଦୁନିଆର ୧୦ଟି ଧନୀ ସହର ମଧ୍ୟରୁ ୪ ଟି ଆମେରିକାରେ ଅଛି । ସେ ସବୂ ସହର ମଧ୍ୟରେ ନ୍ୟୁୟର୍କ ସିଟି, ବାଇ ଏରିଆ, ଲସ ଆଞ୍ଜେଲସ ଏବଂ ସିକାଗୋ ରହିଛି। ଚାଇନାର ଦୁଇଟି ସହର ବେଜିଂ ଏବଂ ସାଂଘାଇ ମଧ୍ୟ ଶ୍ରେଷ୍ଠ ୧୦ରେ ଅନ୍ତର୍ଭୁକ୍ତ। ବ୍ରିଟେନର ରାଜଧାନୀ ଲଣ୍ଡନ ଏହି ତାଲିକାରେ ଚତୁର୍ଥ ସ୍ଥାନରେ ରହିଛି। ସିଙ୍ଗାପୁର ବିଶ୍ୱର ସବୁଠାରୁ ଧନୀ ସହର ତାଲିକାରେ ୫ମ ସ୍ଥାନରେ ଥିବାବେଳେ ଅଷ୍ଟ୍ରେଲୀୟ ସହର ସିଡନୀ ଦଶମ ସ୍ଥାନରେ ରହିଛି।
ଭାରତର ମୁମ୍ବାଇ ଏହି ତାଲିକାରେ ଆଗୁଆ ରହିଛି। ମୁମ୍ବାଇରେ ୨୯ ବିଲିୟନେୟାର ଅଛନ୍ତି। ଏହା ୨୧ତମ ସ୍ଥାନରେ ରହିଛି। ଦିଲ୍ଲୀରେ ୧୬ ବିଲିୟନେୟାର, ୮ କୋଟିପତି ବେଙ୍ଗାଲୁରୁରେ ,କୋଲକାତାରେ ୭ ଏବଂ ହାଇଦ୍ରାବାଦରେ ୫ ଏହି ତାଲିକାରେ ସ୍ଥାନ ପାଇବାରେ ସଫଳ ହୋଇଛନ୍ତି। ଏସବୁ ସହରର ସ୍ଥାନ ତାଲିକାରେ ଯଥାକ୍ରମେ ୩୬,୬୦, ୬୩ ଏବଂ ୬୫ତମ ସ୍ଥାନରେ ରହିଛି।
