ମାଲକାନଗିରି, ୨୮।୮(ଡି.ଏନ୍.ଏ.): ଶୁକ୍ରବାର ଛତିଶଗଡ଼ ଓ ତେଲଙ୍ଗାନା ରାଜ୍ୟରେ ୫ ଟପ୍ କ୍ୟାଡର ମାଓବାଦୀ ଆତ୍ମସମର୍ପଣ କରିଛନ୍ତି। ସେମାନେ ହେଲେ ବୁଦୁରା ସୋଡି, ମନକି ଆଲାମୀ, ସୁନ୍ଦର ପାଦାମୀ, ମୋଟି ମାଣ୍ଡବୀ ଓ ସୀତାରାମ ରେଡ୍ଡି।
ମାଲକାନଗିରି ସୀମାନ୍ତ ଛତିଶଗଡ଼ର ଦନ୍ତଓ୍ବୋଡା ଜିଲାରେ ୪ ଜଣ ଟପ୍ କ୍ୟାଡର ମାଓବାଦୀ ବୁଦୁରା , ମନକି, ସୁନ୍ଦର ଓ ମୋଟି ଏସ୍ପି ଅଭିଷେକ ପଲ୍ଲବଙ୍କ ନିକଟରେ ଆତ୍ମସମର୍ପଣ କରିଛନ୍ତି। ଛତିଶଗଡ଼ରେ ପୋଲିସ ପକ୍ଷରୁ ଚାଲିଥିବା ‘ଘରକୁ ଫେରିଆସ’ ଅଭିଯାନରେ ପୂର୍ବରୁ ଅନେକ ମାଓବାଦୀ ଆତ୍ମସମର୍ପଣ କରିଥିବା ବେଳେ ଏବେ ଏହି ଅଭିଯାନରେ ୪ ମାଓବାଦୀ ଆତ୍ମସମର୍ପଣ କରିଥିବା ଜଣାପଡିଛି। ବୁଦୁରା ଏରିଆ କମିଟି ସଦସ୍ୟ ଭାବେ କାର୍ଯ୍ୟ କରୁଥିଲେ। ତାଙ୍କ ପାଇଁ ଛତିଶଗଡ଼ ସରକାର ୫ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରିଥିଲେ। ତାଙ୍କ ନାମରେ ବିଭିନ୍ନ ଥାନାରେ ଏକାଧିକ ମାମଲା ରହିଛି। ମନକି ସିଏନ୍ଏମ୍ର ଅଧ୍ୟକ୍ଷ ରୂପେ କାର୍ଯ୍ୟ କରୁଥିଲେ। ତାଙ୍କ ପାଇଁ ସରକାର ୧ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରିଥିଲେ। ମନକି, ସୁନ୍ଦର ଓ ମୋଟିଙ୍କ ନାମରେ ବିଭିନ୍ନ ଥାନାରେ ବହୁ ମାମଲା ରହିଛି।
ସେହିପରି ସ୍ବାଭିମାନ ଅଞ୍ଚଳର ମାଓବାଦୀ ନେତା ସୀତାରାମ ରେଡ୍ଡି ଓରଫ ଶିବାନ୍ନା ତେଲଙ୍ଗାନାର ଖମାମ ଏସ୍ପିଙ୍କ ନିକଟରେ ଶୁକ୍ରବାର ଆତ୍ମସମର୍ପଣ କରିଛନ୍ତି। ତାଙ୍କ ଘର କୋତାଗୁଡେମ ଜିଲାରେ। ୩୮ ବର୍ଷ ଧରି ସେ ମାଓବାଦୀ ସଙ୍ଗଠନରେ ଜଣେ ପ୍ରମୁଖ ମାଓବାଦୀ ନେତା ଭାବେ କାର୍ଯ୍ୟ କରୁଥିଲେ। ସେ ସଙ୍ଗଠନରେ କାର୍ଯ୍ୟ କରୁଥିବା ବେଳେ ଏକ ଲ୍ୟାଣ୍ଡମାଇନ ବିସ୍ଫୋରଣ କରିବା ବେଳେ ତାଙ୍କର ଗୋଟିଏ ହାତ ହରାଇଥିଲେ। ପରେ ବିଶାଖାପାଟଣା ପୋଲିସ ସୀତାରାମଙ୍କୁ ଗିରଫକରି ଜେଲ ପଠାଇଥିଲା। କିଛି ବର୍ଷ ପରେ ଜେଲରୁ ମୁକୁଳି ପୁଣି ଥରେ ସେ ମାଓବାଦୀ ସଙ୍ଗଠନରେ ଯୋଗଦେଇ ଚିତ୍ରକୋଣ୍ଡାର ସ୍ବାଭିମାନ ଅଞ୍ଚଳରେ ରହି ଆସୁଥିଲେ। ମାତ୍ର ସ୍ବାଭିମାନ ଅଞ୍ଚଳରେ ଏକାଧିକ ବିଏସ୍ଏଫ୍ କ୍ୟାମ୍ପ ସ୍ଥାପନ ହେବା ପରେ ସୀତାରାମ ଆଉ ସେଠାରେ ରହିବା କଷ୍ଟକର ହୋଇପଡ଼ିଲା। ଫଳରେ ସେ ଖମାମ ଆସି ପୋଲିସ ନିକଟରେ ଆତ୍ମସମର୍ପଣ କରିଛନ୍ତି। ସୀତାରାମଙ୍କ ନାମରେ ସରକାର ୫ ଲକ୍ଷ ଟଙ୍କାର ପୁରସ୍କାର ଘୋଷଣା କରିଥିଲେ। ସମସ୍ତଙ୍କୁ ସରକାରୀ ନିୟମ ଅନୁଯାୟୀ ସମସ୍ତ ସହାୟତା ପ୍ରଦାନ କରାଯିବ ବୋଲି ଉଭୟ ଜିଲା ପୋଲିସ ସୂଚନା ଦେଇଛି।