ନୂଆଦିଲ୍ଲୀ: ସବୁଠାରୁ ବେଶି ଅତିଧନୀ ବସବାସ କରୁଥିବା ଦେଶଗୁଡିକୁ ନେଇ ଫୋର୍ବସ ପକ୍ଷରୁ ବୁଧବାର ଏକ ତାଲିକା ପ୍ରକାଶ ପାଇଛି। ବିଲିୟନେୟାରଙ୍କ କଥା ବିଚାରକୁ ନେଲେ ଭାରତ ତୃତୀୟ ସ୍ଥାନରେ ରହିଛି। ୨୦୨୦ରେ ଦେଶର ୧୯ ଜଣ ବ୍ୟକ୍ତି ବିଶେଷ ବିଲିୟନେୟାର ତାଲିକାରେ ଯୋଡି ହୋଇଥିବା ଫୋର୍ବସ ପକ୍ଷରୁ ପ୍ରକାଶିତ ରିପୋର୍ଟରୁ ସାମ୍ନାକୁ ଆସିଛି। ଗତ ବର୍ଷ ଏହି ତାଲିକାରେ ୧୦୨ ବ୍ୟକ୍ତି ଥିବା ବେଳେ ଚଳିତ ବର୍ଷ ପ୍ରାୟ ୧୪୦ ଛୁଇଁଛି। ସେମାନଙ୍କ ମିଳିତ ସମ୍ପତ୍ତି ୨ ଗୁଣ ବୃଦ୍ଧି ଘଟି ୫୯୬ ବିଲିୟନ ଡଲାର ଛୁଇଁଥିବା ଜଣାପଡିଛି।
ସର୍ବାଧିକ ଅତିଧନୀ ବାସ କରୁଥିବା ଦେଶଗୁଡିକ ମଧ୍ୟରେ ଆମେରିକା ପ୍ରଥମ ସ୍ଥାନରେ ଥିବା ବେଳେ ଚାଇନା ଦ୍ୱିତୀୟ, ତୃତୀୟରେ ଭାରତ ଏବଂ ଚତୁର୍ଥରେ ଜର୍ମାନୀ ଏବଂ ପଞ୍ଚମରେ ଯୁକ୍ତ ରୁଷିଆ ରହିଛି। ଆମେରିକାରେ ସର୍ବାଧିକ ୭୨୪ ବିଲିୟନେୟାର ରହିଥିବା ବେଳେ ଚାଇନାରେ ୬୯୮, ଭାରତରେ ୧୪୦, ଜର୍ମାନୀରେ ୧୩୬ ଏବଂ ରୁଷିଆରେ ୧୧୭ ଜଣ ଅତିଧନୀ ବ୍ୟକ୍ତି ବସବାସ କରୁଥିବା ଫୋର୍ବସ ପକ୍ଷରୁ ସୂଚନା ମିଳିଛି। ଆମାଜନର ଜେଫ୍ ବେଜୋସ ଲଗାତର ୪ର୍ଥ ବର୍ଷ ଲାଗି ତାଲିକାର ପ୍ରଥମ ସ୍ଥାନରେ ରହିଛନ୍ତି। ତାଲିକାର ୧୦ ନମ୍ବର ସ୍ଥାନରେ ରିଲାଏନ୍ସ ଇଣ୍ଡଷ୍ଟ୍ରିଜର ଅଧ୍ୟକ୍ଷ ମୁକେଶ ଅମ୍ବାନୀ ରହିଛନ୍ତି। ସେ ଏସିଆର ସବୁଠାରୁ ଧନୀ ବ୍ୟକ୍ତି ସ୍ଥାନ ହାସଲ କରିଛନ୍ତି। ଭାରତର ୩ ଅତିଧନୀ ୧୦୦ ବିଲିୟନ ଡଲାରରୁ ଅଧିକ ସମ୍ପତ୍ତି ଯୋଡି ପାରିଛନ୍ତି। ୮୪.୫ ବିଲିୟନ ଡଲାର ସମ୍ପତ୍ତି ସହିତ ମୁକେଶ ଏସିଆର ସବୁଠାରୁ ଧନୀ ବ୍ୟକ୍ତି ଥିବା ଜ୍ୟାକ୍ ମାଙ୍କୁ ପଛରେ ପକାଇ ଦେଇଛନ୍ତି। ଗତ ବର୍ଷ ମୁକେଶଙ୍କ ସମ୍ପତ୍ତିରେ ୪୮ ବିଲିୟନ ଡଲାର ବୃଦ୍ଧି ଘଟିଛି। ସେହିଭଳି ଆଦାନୀ ଗ୍ରୁପ୍ ଅଧ୍ୟକ୍ଷ ଗୌତମ ଆଦାନୀଙ୍କ ସମ୍ପତ୍ତି ୫ ଗୁଣ ବଢିଛି। ସେ ଭାରତର ଦ୍ୱିତୀୟ ଧନୀ ବ୍ୟକ୍ତି ଭାବେ ବିବେଚିତ ହୋଇଛନ୍ତି। ତାଙ୍କ ନିକଟରେ ୫୦.୫ ବିଲିୟନ ଡଲାର ସମ୍ପତ୍ତି ଥିବା ବେଳେ ବିଶ୍ୱ ବିଲିୟନେୟାର ତାଲିକାରେ ୨୪ତମ ସ୍ଥାନରେ ରହିଛନ୍ତି। ଆଦାନୀ ଏଣ୍ଟରପ୍ରାଇଜେସ ଏବଂ ଆଦାନୀ ଏନର୍ଜିର କାରବାର ବଢିବାରୁ ସେ ୪୨ ବିଲିୟନ ସମ୍ପତ୍ତି ଯୋଡିବାକୁ ସକ୍ଷମ ହୋଇଛନ୍ତି। ଭାରତର ତୃତୀୟ ଅତିଧନଶାଳୀ ଭାବେ ଏଚ୍ସିଏଲ୍ ଟେକ୍ନୋଲୋଜିର ପ୍ରତିଷ୍ଠାତା ଶିବ ନାଦାର ରହିଛନ୍ତି। ତାଙ୍କ ନିକଟରେ ୨୩.୫ ବିଲିୟନ ଡଲାର ସମ୍ପତ୍ତି ଥିବା ବେଳେ ସାରା ବିଶ୍ୱରେ ସେ ୭୧ ତମ ସ୍ଥାନରେ ରହିଛନ୍ତି।