ସାଉଥାମ୍ପଟନ, ୨୮।୭ (ପି.ଟି.)-
ଦୀର୍ଘ ୪ ବର୍ଷ ପରେ ଇଂଲଣ୍ଡ କ୍ରିକେଟ ଦଳକୁ ପ୍ରତ୍ୟାବର୍ତ୍ତନ କରିଛନ୍ତି ବାମହାତୀ ପେସ୍ ବୋଲର ରିଷି ଟୋପ୍ଲେ। ଆୟର୍ଲାଣ୍ଡ ବିପକ୍ଷ ସିରିଜ ପାଇଁ ସୋମବାର ଘୋଷିତ ୧୪ ଜଣିଆ ଇଂଲଣ୍ଡ ଦଳରେ ଟୋପ୍ଲେଙ୍କୁ ସାମିଲ କରାଯାଇଛି। ଆସନ୍ତା ଗୁରୁବାରଠାରୁ ଏହି ସିରିଜ ଆରମ୍ଭ ହେବ। ଇଅନ ମୋର୍ଗାନ ଅଧିନାୟକ ଓ ମୋଇନ୍ ଅଲୀଙ୍କୁ ଉପ-ଅଧିନାୟକ ମନୋନୀତ କରାଯାଇଛି। ୩ ଖେଳାଳିଙ୍କୁ ରିଜର୍ଭ ରଖା ଯାଇଛି। ୨୬ ବର୍ଷୀୟ ଟୋପ୍ଲେ ୧୦ଟି ଦିନିକିଆ ଖେଳି ୧୬ଟି ଉଇକେଟ ନେଇଛନ୍ତି। ଶେଷଥରପାଇଁ ସେ ୨୦୧୬ ଟି୨୦ ବିଶ୍ୱକପରେ ଇଂଲଣ୍ଡ ପକ୍ଷରୁ ପ୍ରତିନିଧିତ୍ୱ କରିଥିଲେ। ପିଠିରେ ସମସ୍ୟା ଯୋଗୁ ସେ ୨୦୧୮ରେ ଅସ୍ତ୍ରୋପଚାର କରାଇଥିଲେ। ଗତବର୍ଷ ସେ ସସେକ୍ସର ଅଗ୍ରଣୀ ଉଇକେଟ ହାସଲକାରୀ ଥିଲେ। ସାମ୍ ବିଲିଙ୍ଗ୍ସ, ଲିଆମ ଡସନ ଓ ଡେଭିଡ ଓ୍ବଲି ମଧ୍ୟ ଦଳକୁ ପ୍ରତ୍ୟାବର୍ତ୍ତନ କରିଛନ୍ତି। ଏକ ଜୈବ-ସୁରକ୍ଷିତ ବାତାବରଣରେ ଏହି ସିରିଜ ବିନା ଦର୍ଶକରେ ଅନୁଷ୍ଠିତ ହେବ। ଓ୍ବେଷ୍ଟଇଣ୍ଡିଜ ବିପକ୍ଷରେ ଟେଷ୍ଟ ସିରିଜ ଖେଳୁଥିବାରୁ ଜୋ ରୁଟ୍, ବେନ୍ ଷ୍ଟୋକ୍ସ, ଜୋଫ୍ରା ଆର୍ଚର, କ୍ରିସ୍ ଓ୍ବକ୍ସ ଓ ମାର୍କ ଉଡ୍ଙ୍କ ନାମ ବିଚାରକୁ ନିଆ ଯାଇ ନ ଥିଲା। ଫଳରେ ବିଶ୍ୱକପ ବିଜେତା ଜନି ବେୟାରଷ୍ଟୋ, ଟମ୍ କୁରାନ, ଲିଆମ ଡସନ, ଆଡିଲ ରଶିଦ, ଜାସନ ରୟ ଏବଂ ଜେମ୍ସ ଭିନ୍ସ ପ୍ରମୁଖ ସ୍ଥାନ ପାଇଛନ୍ତି। କରୋନା ଭାଇରସ ସଂକ୍ରମଣ ଜନିତ ବ୍ରେକ୍ ପରେ ଏହା ହେବ ପ୍ରଥମ ଦିନିକିଆ ସିରିଜ। ଏହାର ଦ୍ୱିତୀୟ ଓ ତୃତୀୟ ଦିନିକିଆ ସେହି ସାଉଥାମ୍ପଟନଠାରେ ଯଥାକ୍ରମେ ଅଗଷ୍ଟ ୧ ଓ ୪ରେ ଅନୁଷ୍ଠିତ ହେବ।
ଇଂଲଣ୍ଡ ଦଳ: ଇଅନ ମୋର୍ଗାନ(ଅଧିନାୟକ), ମୋଇନ ଅଲୀ, ଜନି ବେୟାରଷ୍ଟୋ, ଟମ୍ ବାଣ୍ଟନ, ସାମ୍ ବିଲିଙ୍ଗ୍ସ, ଟମ୍ କୁରାନ, ଲିଆମ ଡସନ, ଜୋ ଡେନଲି, ଶାକିବ ମେହମୁଦ, ଆଡିଲ ରଶିଦ, ଜାସନ ରୟ, ରିଷି ଟୋପ୍ଲେ, ଜେମ୍ସ ଭିନ୍ସ, ଡେଭିଡ ଓ୍ବିଲି।