ଇସ୍ଲାମାବାଦ, ୪ା୭: ପାକିସ୍ତାନରେ ଥିବା ମଦ୍ରାସାଗୁଡ଼ିକରେ ଦିନକୁ ଦିନ ଯୌନ ଶୋଷଣ ମାମଲା ବଢ଼ିବାରେ ଲାଗିଛି। ନିକଟରେ ଲାହୋରସ୍ଥିତ ଏକ ମଦ୍ରାସାରେ ସବୀର ଶାହା ନାମକ ଜଣେ ଛାତ୍ର ବର୍ଷେରୁ ଊର୍ଦ୍ଧ୍ୱ ସମୟ ଧରି ମୌଲବୀ ମୁଫ୍ତି ଅଜିଜ୍ ଉର୍ ରେହମାନଙ୍କ ଦ୍ୱାରା ଯୌନ ଉତ୍ପୀଡ଼ନର ଶିକାର ହୋଇଥିବା କଥା ସାମ୍ନାକୁ ଆଣିଥିଲେ। ଏବେ ଆଉ ଜଣେ ଛାତ୍ର ସମାନ ଅଭିଯୋଗ ଆଣିଛନ୍ତି। ଜଣେ ସିଆ ମୌଲବୀ ତାଙ୍କୁ ଯୌନ ଶୋଷଣ କରିଥିବା ଏକ ଭିଡିଓ ମାଧ୍ୟମରେ ଛାତ୍ର ଜଣକ କହିବା ପରେ ଏହା ଭାଇରାଲ ହେବାରେ ଲାଗିଛି। ପାକିସ୍ତାନରେ ଧାର୍ମିକ ନେତାଙ୍କ ମାତ୍ରାଧିକ ପ୍ରଭାବ ଯୋଗୁ ଅଧିକାଂଶ ଲୋକ ମୌଲବୀଙ୍କ ବିରୋଧରେ ମୁହଁ ଖୋଲୁ ନ ଥିବାରୁ ଏପରି ଆପରାଧିକ ମାମଲା ବଢ଼ିବାରେ ଲାଗିଛି। ଇସ୍ଲାମକୁ ବଦନାମ କରୁଥିବା ବ୍ୟକ୍ତିଙ୍କୁ ସର୍ବସାଧାରଣରେ ମୃତ୍ୟୁଦଣ୍ଡ ଦାବି କରୁଥିବା ଏହି ଧାର୍ମିକ ନେତାମାନେ ମଦ୍ରାସାରେ ଯୌନ ଉତ୍ପୀଡ଼ନ ଘଟଣାରେ ମୁହଁ ନ ଖୋଲିବାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।
ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ ଏକ ମନ୍ତବ୍ୟରେ କହିଥିଲେ, ଛୋଟ ପୋଷାକ ପିନ୍ଧୁଥିବା ମହିଳାମାନେ ପୁରୁଷଙ୍କଠାରେ ଯୌନାକାଂକ୍ଷା ସୃଷ୍ଟି କରିଥାନ୍ତି। ଅଧିକାଂଶ ପାକିସ୍ତାନୀ ମଧ୍ୟ ସର୍ବସାଧାରଣରେ ମହିଳାଙ୍କ ଛୋଟ ପୋଷାକ ପରିଧାନକୁ ଅନୁମତି ଦେଇ ନ ଥାନ୍ତି। ଇସ୍ଲାମିକ ନୀତି ଏହାକୁ ଗ୍ରହଣ କରେନାହିଁ ବୋଲି ସେମାନଙ୍କ ମତ। ମଦ୍ରାସାରେ ଛାତ୍ରଙ୍କୁ ଯୌନ ଶୋଷଣ ଘଟଣା ପରେ ଏବେ ଦେଶର ଏହି ଧାର୍ମିକ ସ୍କୁଲ, ମୌଲବୀ ଓ ସେଠାକାର ପରିବେଶ ଉପରେ ପ୍ରଶ୍ନ ଉଠିଛି। ୨୦୧୭ରେ ପାକିସ୍ତାନର ପଞ୍ଜାବ ପ୍ରଦେଶରେ ଜଣେ ୯ ବର୍ଷୀୟ ଛାତ୍ରଙ୍କୁ ଜଣେ ମୌଲବୀ ବଳାତ୍କାର କରିଥିଲେ। ୨୦୧୮ରେ ନାବାଳିକାଙ୍କୁ ବଳାତ୍କାର ମାମଲାରେ ଅନ୍ୟ ଜଣେ ମୌଲବୀ ଗିରଫ ହୋଇଥିଲେ। ୨୦୧୯ରେ ଜଣେ ୧୩ ବର୍ଷୀୟା ଦିବ୍ୟାଙ୍ଗ ବାଳିକାଙ୍କୁ ଜଣେ ମୌଲବୀ ଯୌନ ଶୋଷଣ କରିବା ଘଟଣା ସାମ୍ନାକୁ ଆସିଥିଲା। ମଦ୍ରାସା ଭଳି ଧାର୍ମିକ ଅନୁଷ୍ଠାନଗୁଡ଼ିକୁ ମୌଲବୀଙ୍କ ପରି ଧାର୍ମିକ ନେତାମାନେ ନିଜ ଯୌନପିପାସା ମେଣ୍ଟାଇବାକୁ ବ୍ୟବହାର କରୁଥିବା ଅଭିଯୋଗ ଆସିଛି।
ଆକଳନ ଅନୁସାରେ ୨୨ ଲକ୍ଷରୁ ଊର୍ଦ୍ଧ୍ୱ ପିଲା ପାକିସ୍ତାନରେ ଥିବା ପ୍ରାୟ ୩୬ ହଜାରରୁ ଅଧିକ ମଦ୍ରାସାରେ ଭର୍ତ୍ତି ହୋଇଛନ୍ତି। ସେଥିରୁ ଅଧିକାଂଶ ପିଲା ଗରିବ ଶ୍ରେଣୀର। ପିଲାମାନେ ମୁହଁ ଖୋଲିବା ସମ୍ଭାବନା କ୍ଷୀଣ ଥିବାରୁ ଏବଂ ସେମାନଙ୍କ କଥା ଖୁବ୍ କମ ସଂଖ୍ୟାରେ ଲୋକେ ବିଶ୍ୱାସ କରୁଥିବାରୁ ମଦ୍ରାସାରେ ଏଭଳି ଘଟଣାର ଘଟୁଥିବା ବିଶେଷଜ୍ଞମାନେ ମତ ପ୍ରକାଶ କରିଛନ୍ତି। ସେହିପରି କୌଣସି ମୌଲବୀଙ୍କ ବିରୋଧରେ କେହି ଅଭିଯୋଗ ଆଣିଲେ ତାହାକୁ ଇସ୍ଲାମ ଧର୍ମ ଉପରେ ଆକ୍ରମଣ ବୋଲି ବିବେଚନା କରାଯାଉଥିବାରୁ ଅନେକେ ଏ ନେଇ ମୁହଁ ଖୋଲୁ ନ ଥିବା ଦେଖାଯାଇଛି।