ହିଞ୍ଜିଳିକାଟୁ,୧୪।୨(ଡି.ଏନ୍.ଏ): କରୋନା ମହାମାରୀ ଯୋଗୁ ଛାତ୍ରୀଛାତ୍ରଙ୍କ ସୁରକ୍ଷାକୁ ଦୃଷ୍ଟିରେ ର଼ଖି ଗତ ୨ବର୍ଷ ହେଲା ରାଜ୍ୟରେ ସମସ୍ତ ସ୍କୁଲ ଓ କଲେଜ ବନ୍ଦ ରହିଥିଲା। ତେବେ କରୋନା ପ୍ରକୋପ ସାମାନ୍ୟ ହ୍ରାସ ହେବା ପରେ ପିଲାଙ୍କ ଭବିଷ୍ୟତକୁ ନଜରରେ ରଖି ରାଜ୍ୟ ସରକାର ପ୍ରଥମେ ଦଶମରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ସ୍କୁଲ ଖୋଲିବା ନିଷ୍ପତ୍ତି ନେଇଥିଲେ। ଏହାପରେ ଷଷ୍ଠ ଶ୍ରେଣୀଠାରୁ ବର୍ତ୍ତମାନ ସମସ୍ତ ସ୍କୁଲ ଖୋଲିବା ନେଇ ନୋଟିସ ଜାରି କରାଯାଇଛି। ଏଥିପାଇଁ ୧୪ ବର୍ଷରୁ ଉଦ୍ଧର୍ବ ପିଲାଙ୍କୁ ଟିକାକରଣ ନେଇ ସରକାର ନିଷ୍ପତି ନେଇଛନ୍ତି। ଏହିକ୍ରମରେ ହିଞ୍ଜିଳିକାଟୁ ସରକାରୀ ବୃନ୍ଦାବନ ବିଦ୍ୟାଳୟର ପ୍ରଧାନ ଶିକ୍ଷୟତ୍ରୀ ଶାନ୍ତିଲତା ମୁନୀଙ୍କ ଅଧ୍ୟକ୍ଷତାରେ ପ୍ରଥମ ଓ ଦ୍ବିତୀୟ ଟିକାକରଣ କାର୍ଯ୍ୟକ୍ରମ ଅନୁଷ୍ଠିତ ହୋଇଛି। ସୋମବାର ନବମ ଓ ଦଶମ ଶ୍ରେଣୀର ମୋଟ ୧୨୭ ଜଣ ଛାତ୍ରୀଛାତ୍ର ପ୍ରଥମ ଓ ଦ୍ବିତୀୟ ଟିକା ନେଇଛନ୍ତି। ପୁର୍ବରୁ ନେଇଥିବା ୭୧ଜଣ ବିଦ୍ୟାର୍ଥୀ ସୋମବାର ଦ୍ବିତୀୟ ଡୋଜ ନେଇଥିବା ବେଳେ ୫୬ ଜଣ ବିଦ୍ୟାର୍ଥୀ ପ୍ରଥମ ଟିକା ନେଇଛନ୍ତି। ଟିକାକରଣ କାର୍ଯ୍ୟକ୍ରମରେ ବିଦ୍ୟାଳୟର କିରାଣୀଙ୍କ ସମେତ ସମସ୍ତ ଶିକ୍ଷକ ଓ ଶିକ୍ଷୟତ୍ରୀ ସ୍ବାସ୍ଥ୍ୟ ବିଭାଗର କର୍ମକର୍ତ୍ତାଙ୍କୁ ସହଯୋଗ କରିଥିଲେ।
