ନୂଆଦିଲ୍ଲୀ, ୧୨।୧୨: ଆସନ୍ତାବର୍ଷ ଜାନୁୟାରୀରେ ଭାରତ ଓ ଘରୋଇ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯିବ ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ। ଏଥିଲାଗି ଏବେଠାରୁ ଭାରତୀୟ ଦଳର କମ୍ବିନେଶନ କ’ଣ ହେବ ସେ ନେଇ ଅଙ୍କକଷା ଆରମ୍ଭ ହୋଇଛି। ଅବଶ୍ୟ ଏବେ ଚାଲିଥିବା ବିଜୟ ହଜାରେ ଟ୍ରଫିରେ ଖେଳାଳିଙ୍କ ପ୍ରଦର୍ଶନ ଉପରେ ସମସ୍ତଙ୍କ ନଜର ରହିଛି। ବିଜୟ ହଜାରେ ଟ୍ରଫିରେ ଅଭିଜ୍ଞ ଓପନର ଶିଖର ଧାଓ୍ବନ ସଂଘର୍ଷ କରୁଥିବା ବେଳେ ତାଙ୍କୁ କଡ଼ା ଚ୍ୟାଲେଞ୍ଜ ଦେଉଛନ୍ତି ଯୁବ ଓପନର ଋତୁରାଜ ଗାଏକ୍ୱାଡ। ବହୁ ପ୍ରତୀକ୍ଷିତ ଏହି ସିରିଜରେ ଭେଙ୍କଟେଶ ଆୟାର ଖେଳିବା ମଧ୍ୟ ଏକପ୍ରକାର ନିଶ୍ଚିତ ମନେହେଉଛି।
ଇତିମଧ୍ୟରେ ଓପନର ରୋହିତ ଶର୍ମା ଭାରତୀୟ ଦିନିକିଆ ଦଳର ଅଧିନାୟକ ମନୋନୀତ ହୋଇଛନ୍ତି ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଘୋଷଣା କରିସାରିଛି। ତେବେ ଏହି ସିରିଜ ପାଇଁ ଦଳ ଘୋଷଣା କରାଯାଇନାହିଁ। ଚୟନକର୍ତ୍ତାମାନେ ଏବେ ବିଜୟ ହଜାରେ ଟ୍ରଫିରେ ଯୁବ ଖେଳାଳିଙ୍କ ପ୍ରଦର୍ଶନ ଉପରେ ନଜର ରଖିଛନ୍ତି। ବିଜୟ ହଜାରେ ଟ୍ରଫି ଚାଲୁ ରହିଥିବା ବେଳେ ଋତୁରାଜ ଓ ଆୟାରକୁ ନେଇ ବେଶ୍ ଚର୍ଚ୍ଚା ହେଉଛି। ଋତୁରାଜ କ୍ରମାଗତ ୩ଟି ଶତକ ହାସଲ କରିଥିବା ବେଳେ ଆୟାର ଦୁଇଟି ଶତକ ଅର୍ଜନ କରିଛନ୍ତି। ଭଲ ବ୍ୟାଟିଂ କରିବା ସହ ସେ ଉଇକେଟ ମଧ୍ୟ ନେଉଛନ୍ତି। ଫଳରେ ସେ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କ ବିକଳ୍ପ ଭାବେ ଉଭା ହୋଇଛନ୍ତି। ତେବେ ଦଳରେ ଲୋକେଶ ରାହୁଲ ଓ ରୋହିତଙ୍କ ଉପସ୍ଥିତିରେ ଟପ୍ ଅର୍ଡରରେ ଋତୁରାଜଙ୍କୁ ସ୍ଥାନ ମିଳିବା କଷ୍ଟକର ମନେହେଉଛି। ଏଭଳି ପରିସ୍ଥିତିରେ ଆୟରଙ୍କୁ ୫ କିମ୍ବା ୬ ନମ୍ବରରେ ସୁଯୋଗ ଦିଆଯାଇପାରେ। ଦଳ ପାଇଁ ସେ ଫିନିଶରର ଭୂମିକା ନିର୍ବାହ କରିବେ।
ଗତ ଦିନିକିଆ ସିରିଜରେ ଧାଓ୍ବନ ଭାରତର ନେତୃତ୍ୱ ନେଇଥିଲେ ଓ ଶ୍ରୀଲଙ୍କା ବିପକ୍ଷ ଗୋଟିଏ ମ୍ୟାଚ୍ ବିଜୟୀ ଇନିଂସ ଖେଳିଥିଲେ। ବଡ଼ ବଡ଼ ଆଇସିସି ଇଭେଣ୍ଟରେ ଧାଓ୍ବନ ବଡ଼ ଇନିଂସ ଖେଳିବାରେ ଅଭ୍ୟସ୍ତ ରହିଛନ୍ତି। ତେଣୁ ଧାଓ୍ବନଙ୍କୁ ଏକ ଶେଷ ସୁଯୋଗ ଦେବାକୁ ଚୟନକର୍ତ୍ତାମାନେ ଲକ୍ଷ୍ୟ ରଖିଥିଲେ। ତାଙ୍କୁ ଗୋଟିଏ କିମ୍ବା ୨ଟି ମ୍ୟାଚ୍ରେ ଖେଳାଯାଇପାରେ। ତେଣୁ ଦକ୍ଷିଣ ଆଫ୍ରିକା ସିରିଜ ଉପରେ ସମସ୍ତଙ୍କ ନଜର ରହିଛି।
