ମୟୂରଭଞ୍ଜ ଜିଲା ଶିମିଳିପାଳ ଜାତୀୟ ଉଦ୍ୟାନର ସବୁଜ ସୁନ୍ଦର ଓ ପ୍ରାକୃତିକ ଶୋଭା ଅନେକ ପର୍ଯ୍ୟଟକଙ୍କୁ ଆକର୍ଷିତ କରିଥାଏ। ସୁଉଚ୍ଚ ପାହାଡ଼ରୁ ଝରୁଥିବା ଜଳ ସାଙ୍ଗକୁ ପଶୁପକ୍ଷୀଙ୍କ କଳରବ ପରିବେଶକୁ କରେ ଆନନ୍ଦମୁଖର। ଏଇଥି ପାଇଁ ହଜାର ହଜାର ଦର୍ଶକଙ୍କ ଭିଡ଼ ଜମେ ଶିମିଳିପାଳ ସଂଲଗ୍ନ ବିଭିନ୍ନ ପିକିନିକ୍ ସ୍ପଟ୍ରେ। ଖୁଣ୍ଟା ବ୍ଲକ ଭୋଳାଗଡ଼ିଆ ପଞ୍ଚାୟତର ଡବକ ନୂଆଗାଁ ନିକଟସ୍ଥ ଶିମିଳିପାଳ କୋର୍ ଅଞ୍ଚଳରେ ରହିଛି ‘ଟୁଙ୍କି ଜଳପ୍ରପାତ’। ଏହାକୁ ବନବାସୀମାନେ ‘ଟୁଙ୍କି ବୁରୁ’ ବୋଲି ନାମକରଣ କରିଛନ୍ତି। ଆଦିବାସୀ ସମ୍ପ୍ରଦାୟର ଲୋକେ ବଣ, ପାହାଡ଼, ଗଛଲତାକୁ ଭଗବାନ ସଦୃଶ ପୂଜା କରିଥାନ୍ତି। ପାହାଡ଼ର ଶୀର୍ଷଟି ପ୍ରଭୁ ମହାଦେବଙ୍କ ପ୍ରତିକୃତି ସଦୃଶ ହୋଇଥିବାରୁ ଅଞ୍ଚଳବାସୀ ଏଭଳି ନାମକରଣ କରିଛନ୍ତି। ଏଠାରେ ବର୍ଷସାରା ପାଣି ଝରୁଥିବା ବେଳେ ପାହାଡ଼ ଚଢ଼ିବାର ମଜା ନିଆରା। ଲୁକ୍କାୟିତ ହୋଇ ରହିଥିବା ଏହି ମନୋରମ ଜଳପ୍ରପାତ ପାଖକୁ ଯିବାକୁ ରହିଛି ଚଲାପଥ। ପାହାଡ଼ ଚଢ଼ିଲେ ଗୋଟିଏ ସ୍ଥାନରେ ଥିବା ଦୁଇଟି ଜଳପ୍ରପାତ ଦେଖିବାକୁ ମିଳିବ। ଏହି ସ୍ଥାନଟି ପରିଷ୍କାର ପରିଚ୍ଛନ ରହିବା ସହିତ ପର୍ଯ୍ୟଟକଙ୍କୁ ସହଯୋଗ କରିବା ପାଇଁ ଟୁଙ୍କି କମିଟି ନାମକ ଯୁବକ ସଂଘ କାର୍ଯ୍ୟ କରୁଛି। କୌଣସି ପର୍ଯ୍ୟଟକ ଅସୁବିଧାରେ ପଡ଼ିଲେ କମିଟି ପକ୍ଷରୁ ତୁରନ୍ତ ସେବା ଯୋଗାଇ ଦିଆଯାଉଛି।
କେମିତି ଯିବେ
ଉଦଳା-ବାରିପଦା ରାସ୍ତାର ଖୁଣ୍ଟା କଲେଜ ଛକରୁ ୧୩ କି.ମି. ଦୂରରେ ଏହା ଅବସ୍ଥିତ। ପ୍ରଧାନମନ୍ତ୍ରୀ ସଡ଼କ ଦେଇ ୧୦ କି.ମି. ଯିବା ପରେ ଅବଶିଷ୍ଟ ମାଟି ମୋରମ ରାସ୍ତାରେ ଯିବାକୁ ପଡ଼ିବ। ଚାରିଚକିଆ ଯାନ, ମୋଟରସାଇକେଲ ଓ ବସ୍ଗୁଡ଼ିକ ରଖିବା ପାଇଁ ବିସ୍ତୀର୍ଣ୍ଣ ପଡ଼ିଆ ରହିଛି।
– ରିପୋର୍ଟ: ନୀଳାଦ୍ରି ବିହାରୀ ଦଣ୍ଡପାଟ, ବାରିପଦା ଅଫିସ