ପାରାଦୀପ,୨୯ା୧୨(ସ୍ବ.ପ୍ର.): ୨୦୨୨ ବର୍ଷର ଶେଷ ବୁଧବାର ପାରାଦୀପ ଦୁଇଟି ଘଟଣା ପାଇଁ ଚର୍ଚ୍ଚାର ପରିସରକୁ ଆସିଛି। ପାରାଦୀପରେ ରେକର୍ଡ ସଂଖ୍ୟକ ପର୍ଯ୍ୟଟକଙ୍କ ଭିଡ ଦେଖିବାକୁ ମିଳିଛି। ବିଶେଷକରି ନେହେରୁ ବଙ୍ଗଳା ମହାନଦୀ ମୁହାଣ ଅଞ୍ଚଳରେ ହଜାରରୁ ଅଧିକ ପର୍ଯ୍ୟଟକ ଭୋଜି କରିଛନ୍ତି। ନିକଟସ୍ଥ ମନ୍ମଦ ଉଦ୍ୟାନରେ ୫୦୦ରୁ ଅଧିକ ସ୍ଥାନରେ ଭୋଜି ହୋଇଛି। ଏହାବ୍ୟତୀତ ସମୁଦ୍ର ବେଳାଭୂମି, ସାମୁଦ୍ରିକ ଜଳଜୀବ ସଂଗ୍ରହାଳୟ, ୫ ନଂ. ଗେଟ୍ ପାଖ ବନ୍ଦର ନିଷିଦ୍ଧାଞ୍ଚଳର ପଣ୍ୟବାହୀ ଜାହାଜ ଦେଖିବା ପାଇଁ ପର୍ଯ୍ୟଟକ ରାତି ପର୍ଯ୍ୟନ୍ତ ଭିଡ ଲଗାଇଥିବା ଦେଖିବାକୁ ମିଳିଛି। ଅପରପକ୍ଷେ ପାରାଦୀପର ଅଠରବାଙ୍କିଠାରୁ ଦୋଛକି ଏବଂ ଅଠରବାଙ୍କିଠାରୁ ନେହେରୁ ବଙ୍ଗଳା ରାସ୍ତା ପଣ୍ୟବାହୀ ଭାରୀଯାନ ଯୋଗୁ ଦିନ ତମାମ ଟ୍ରାଫିକ ବ୍ୟବସ୍ଥା ଅନିୟନ୍ତ୍ରିତ ହୋଇପଡିଥିଲା। ବିଶେଷକରି ଅଠରବାଙ୍କି ଦୋଛକି ୩ ଥାକିଆ ରାସ୍ତାର ୨ ରାସ୍ତା ମଙ୍ଗଳବାର ରାତି ୧୧ଟାରୁ ବୁଧବାର ସକାଳ ଯାଏ ସମ୍ପୂର୍ଣ୍ଣ ଜାମ୍ ହୋଇଥିଲା। ସେହି ରାସ୍ତାରେ ଫଶିଥିବା ଅନେକ ଲୋକ ରାତିତମାମ ଗାଡିରେ ରହିଥିଲେ ବୋଲି ପାରାଦୀପର ଶ୍ରୀକାନ୍ତ ପରିଡା ଅଭିଯୋଗ କରିଛନ୍ତି। ମଙ୍ଗଳବାର ରାତିରେ କେତେଗୋଟି ଭାରୀଯାନ ଓଭରଟେକ୍ କରି ମଝି ରାସ୍ତାରେ ପଶିଯିବାରୁ ରାସ୍ତା ଜାମ୍ ହୋଇଯାଇଥିଲା ବୋଲି ଲକ୍ ଥାନା ଅଧିକାରୀ ଭାବଗ୍ରାହୀ ରାଉତ କୁହଛନ୍ତି।