ଦାରିଙ୍ଗବାଡି,୧୯।୧(ଡି.ଏନ.ଏ): ଓଡିଶାର କଶ୍ମୀର କୁହାଯାଉଥିବା ଦାରିଙ୍ଗବାଡି ରାଜ୍ୟ ତଥା ରାଜ୍ୟ ବାହାରେ ଜଣାଶୁଣା। ଅନେକ ପର୍ଯ୍ୟଟନସ୍ଥଳୀ ତଥା ମିଡିୟୁନ୍ଦା ଜଳ ପ୍ରପାତ ସମେତ ନେଚର ଲଭର୍ସ ପଏଣ୍ଟ, ପାଟାନ୍ଧା ଜଳପ୍ରପାତ, ଶାନ୍ତି ଉପତ୍ୟକା, କଫି ବଗିଚା ଆଦି ପର୍ଯ୍ୟଟକଙ୍କୁ ଆକୃଷ୍ଟ କରୁଛି। ତେବେ ଏପରି କିଛି ସ୍ଥାନ ଏବେ ପର୍ଯ୍ୟଟକଙ୍କ ନଜରକୁ ଆସିଛି ଯାହା କେବଳ ଅନୁସୂଚିତ ଜନଜାତି ସାମ୍ପ୍ରଦାୟଙ୍କ ନିକଟରେ ଇତିହାସ ହୋଇରହିଛି। ଏଭଳି ଏକ ପାହାଡ଼ ରହିଛି, ଯାହା କିରିକୁଟି ପଞ୍ଚାୟତ ପାଟାଙ୍ଗି ଗ୍ରାମଠାରୁ ପ୍ରାୟ ୨ କି.ମି. ଜଙ୍ଗଲ ରାସ୍ତା ଦେଇ ଗଲେ ଟିଣ୍ଡିବାଲି ପାହାଡ଼ରେ ପହଞ୍ଚିବେ। ଟିଣ୍ଡିବାଲି ହେଉଛି ଜନଜାତିଙ୍କ କୁଇ ଭାଷା ଏହାର ଓଡ଼ିଆ ଅର୍ଥ ଘଣ୍ଟ ପାହାଡ଼ ବୋଲି କହନ୍ତି। ଉକ୍ତ ପାହାଡ଼ରେ ଥିବା ଏକ ପଥର ଉପରେ ଅନ୍ୟ ଏକ ପଥର ରହିଛି ଯାହା ପ୍ରାୟ ୫ ରୁ ୭ ଫୁଟ୍ ଲମ୍ବ ହେବ ତାହା ଅନ୍ୟ ପଥରଠାରୁ ଭିନ୍ନ ଶବ୍ଦ ବାହାରୁଛି ଯାହାକି ଏକ ଘଣ୍ଟ ବାଡେଇବା ଭଳି ଶବ୍ଦ ହେଉଛି। ଏବେ ସେହି ପଥରକୁ ଦେଖିବାକୁ ଏବଂ ଶବ୍ଦ ଶୁଣିବାକୁ ପର୍ଯ୍ୟଟକଙ୍କ ଯାତାୟତ ହେଉଥିବା ଗ୍ରାମବାସୀ କହିଛନ୍ତି। ଉକ୍ତ ପଥରର ସୁରକ୍ଷା ସମେତ ପାହାଡ଼ରେ ପାଦଚଲା ରାସ୍ତାଟିଏ କରିବାକୁ ଗ୍ରାମବାସୀ ସ୍ଥାନୀୟ ପ୍ରଶାସନ ନିକଟରେ ନିବେଦନ କରିଛନ୍ତି।