ଖୋର୍ଦ୍ଧା ଅଫିସ,୨୫ା୧୦: ଖୋର୍ଦ୍ଧା ଜିଲାର ପ୍ରମୁଖ ପର୍ଯ୍ୟଟନସ୍ଥଳଗୁଡ଼ିକ ମଧ୍ୟରୁ ବରୁଣେଇ ପୀଠ ଅନ୍ୟତମ। ଏବେ ଏହି ପୀଠ ଅବହେଳିତ ହୋଇପଡ଼ିଛି। ବରୁଣେଇ ଜଙ୍ଗଲ କ୍ଷୟ ହେଉଥିବାବେଳେ ରାସ୍ତା, ପାନୀୟଜଳ ପ୍ରଭୃତି ବିଭିନ୍ନ ସମସ୍ୟା ଲାଗିରହିଛି। ଏଠାକାର ସମସ୍ୟା ପ୍ରତି ଦୃଷ୍ଟି ଦିଆଯାଉ ନାହିଁ। ଫଳରେ ପର୍ଯ୍ୟଟକ ଏଠାରୁ ମୁହଁ ଫେରାଇ ନେବାକୁ ବସିଲେଣି।
ଶୀତଋତୁରେ ଏହି ପୀଠରେ ପ୍ରବଳ ଭିଡ଼ ଜମେ। ପର୍ଯ୍ୟଟକମାନେ ମା’ ବରୁଣେଇ ଓ କରୁଣେଇଙ୍କ ଦର୍ଶନ କରିବା ସହ ଏଠାକାର ପ୍ରାକୃତିକ ସୌନ୍ଦର୍ଯ୍ୟ ଉପଭୋଗ କରିଥାନ୍ତି। ସେହିପରି ଏଠାରେ ବଣଭୋଜିର ସୁବଧା ରହିଛି। ତେବେ ଆବଶ୍ୟକ ରକ୍ଷଣାବେକ୍ଷଣ ଅଭାବରୁ ପାନୀୟଜଳ ଷ୍ଟାଣ୍ଡପୋଷ୍ଟ ଅଚଳ ହୋଇପଡ଼ିଥିବାବେଳେ ମନ୍ଦିର ପାହାଚ ଫାଟି ଆଁ କରିଛି। ଅନେକ ଗଛ ଭାଙ୍ଗି ପାହାଚରେ କାଠଗଣ୍ଡି ପଡ଼ିଛି। ଫଳରେ ପର୍ଯ୍ୟଟକ ଯାତାୟାତ ଲାଗି ହଇରାଣ ହେଉଛନ୍ତି। ବରୁଣେଇରୁ ବୋହି ଆସୁଥିବା ଜଳସ୍ରୋତ ଯୋଗୁ ରାସ୍ତାରେ ଶିଉଳି ଜମିଛି। ପୀଠକୁ ଯାଉଥିବା ପିଲା, ବୃଦ୍ଧାବୃଦ୍ଧଙ୍କ ଗୋଡ଼ ଖସି ଆହତ ହେଉଛନ୍ତି। ଅନେକ ସ୍ଥାନରେ ପ୍ଲାଷ୍ଟିକ, ପଲିଥିନ, ବୋତଲ ପଡ଼ିରହିଛି। ଏହି ପର୍ଯ୍ୟଟନ କ୍ଷେତ୍ରର ବିକାଶ ଓ ସ୍ବଚ୍ଛତା ପ୍ରତି ବିଶେଷ ଗୁରୁତ୍ୱ ଦିଆଯାଉ ନାହିଁ ବୋଲି ନୟାଗଡ଼ରୁ ଆସିଥିବା ପର୍ଯ୍ୟଟକ ପ୍ରଫୁଲ୍ଲ ଦାସ ଅଭିଯୋଗ କରିଛନ୍ତି। ଶିଳ୍ପାଞ୍ଚଳରୁ ସଂଯୋଗ କରୁଥିବା ଏହି ରାସ୍ତାର ଉଭୟ ପଟେ ଯାନବାହନ ପାର୍କିଂ ଯୋଗୁ ଟ୍ରାଫିକ ସମସ୍ୟା ସୃଷ୍ଟି ହେଉଛି। ସେହିପରି ବରୁଣେଇ ଜଙ୍ଗଲରୁ କାଠ ଚୋରାଚାଲାଣ ହେଉଛି। ପର୍ଯ୍ୟଟକଙ୍କୁ ମୌଳିକ ସୁବିଧା ମିଳୁ ନ ଥିବା ବେଳେ ମନୋରମ ପ୍ରାକୃତିକ ପରିବେଶ ନଷ୍ଟ ହେବାରେ ଲାଗିଛି। ପର୍ଯ୍ୟଟନ ବିଭାଗ କେବଳ ନାମଫଳକ ଟାଙ୍ଗିଦେଇ ଚୁପ୍ ବସିଛି। କରୋନା କଟକଣା ଯୋଗୁ ଏହି ପୀଠ ପ୍ରାୟ ୧୦ ମାସ ବନ୍ଦ ରହିଥିଲା। ଏବେ ଖୋଲିଥିଲେ ମଧ୍ୟ ପର୍ଯ୍ୟଟକଙ୍କ ବିଶେଷ ଆଗମନ ନାହିଁ। ପୀଠର ବିଭିନ୍ନ ସମସ୍ୟା ଯୋଗୁ ପର୍ଯ୍ୟଟକ ଏଠାକୁ ଆସିବାକୁ ଆଗ୍ରହ ପ୍ରକାଶ କରୁନାହାନ୍ତି ବୋଲି ସ୍ଥାନୀୟ ବ୍ୟବସାୟୀଙ୍କ ସମେତ କେତେଜଣ ପର୍ଯ୍ୟଟକ କହିଛନ୍ତି। ବର୍ତ୍ତମାନ କରୋନା କଟକଣା କୋହଳ ହୋଇଥିବାବେଳେ ପର୍ଯ୍ୟଟନ ଋତୁ ଆସିଲାଣି। ତେଣୁ ଏହି ପର୍ଯ୍ୟଟନସ୍ଥଳର ବିକାଶ ଓ ସ୍ବଚ୍ଛତା ଲାଗି ପଦକ୍ଷେପ ନିଆଯିବାକୁ ଦାବି ହେଉଛି। ଏ ନେଇ ନୂତନ ଜିଲାପାଳ ସଂଗ୍ରାମ କେଶରୀ ମହାପାତ୍ର କହିଛନ୍ତି, ବରୁଣେଇ ପୀଠ ସମେତ ଜିଲାର ସମସ୍ତ ପର୍ଯ୍ୟଟନସ୍ଥଳଗୁଡ଼ିକର ବିକାଶ ଉପରେ ଗୁରୁତ୍ୱ ଦିଆଯିବ।