ଢେଙ୍କାନାଳ ଅଫିସ, ୨୬।୧୨:ସମସ୍ତଙ୍କ ମନରେ ଭରି ରହିଥିଲା ଉତ୍ସାହ। ଶୀତର ସ୍ପର୍ଶରେ ପ୍ରକୃତିରାଣୀ ହସି ଉଠିଥିବାବେଳେ କିଛି ସମୟ ସବୁଜିମାମୟ ପରିବେଶରେ ବିତାଇବାକୁ ଢେର ଦିନରୁ ହୋଇଥିଲା ଯୋଜନା। ଏକା ଦିନରେ ରବିବାର ଆଉ ବଡ଼ଦିନ ପଡ଼ିଥିବାରୁ ଏଭଳି ସୁଯୋଗକୁ ହାତଛଡ଼ା ନ କରି ପରିବାର, ସାଙ୍ଗସାଥୀଙ୍କ ସହ ପ୍ରକୃତି କୋଳରେ ମଜ୍ଜିଯାଇଥିଲେ ପର୍ଯ୍ୟଟକ, ଯାହାକୁ ନେଇ ମୁଖରିତ ହୋଇଉଠିଥିଲା ଢେଙ୍କାନାଳ ଜିଲାର ପ୍ରମୁଖ ପର୍ଯ୍ୟଟନସ୍ଥଳୀ।
ସପ୍ତଶଯ୍ୟାରେ ବଡ଼ଦିନ ଉପଲକ୍ଷେ ଜମିଥିଲା ଅସମ୍ଭାଳ ଭିଡ଼। ରାଜ୍ୟ ତଥା ରାଜ୍ୟ ବାହାରୁ ୪୦,୦୦୦ ପର୍ଯ୍ୟଟକ ସମାଗମରେ ସକାଳୁ ସନ୍ଧ୍ୟା ଯାଏ ଚଳଚଞ୍ଚଳ ହୋଇଉଠିଥିଲା ଏହି ପର୍ଯ୍ୟଟନସ୍ଥଳୀ। ‘କରୋନା’ କଟକଣା ହଟିବା ପରେ ଦୁଇବର୍ଷ ଅନ୍ତରାଳରେ ପିକ୍ନିକ୍ ପାଇଁ ଏଠାରେ ପିଲାଙ୍କଠାରୁ ବୟସ୍କ ଯାଏ ପ୍ରବଳ ଉତ୍ସାହ ପରିଲକ୍ଷିତ ହୋଇଥିଲା। ଭୁବନେଶ୍ୱର, କଟକ, ଚୌଦ୍ୱାର, ଖୋର୍ଦ୍ଧା, ବେଗୁନିଆ, ଆଠଗଡ଼, ନରସିଂହପୁର, ବଡ଼ମ୍ବା, ଯାଜପୁର, ଯାଜପୁର ରୋଡ୍, ଅନୁଗୋଳ, ତାଳଚେର, କେନ୍ଦ୍ରାପଡ଼ା, ଜଗତ୍ସିଂହପୁର ଅଞ୍ଚଳରୁ ବହୁ ସଂଖ୍ୟାରେ ପର୍ଯ୍ୟଟକ ଆସିଥିଲେ। ବହୁ ଯାତ୍ରୀ କପିଳାସର ପ୍ରସିଦ୍ଧ ଶୈବପୀଠରେ ମହାପ୍ରଭୁ ଶ୍ରୀ ଚନ୍ଦ୍ରଶେଖରଜୀଉ, ମା’ ପାର୍ବତୀ, ମହାପ୍ରଭୁ ଶ୍ରୀଜଗନ୍ନାଥଙ୍କ ଦର୍ଶନ କରିବା ପରେ ନିକଟବର୍ତ୍ତୀ ପ୍ରାଣୀ ଉଦ୍ୟାନ ବୁଲିବା ସୁଯୋଗ ହାତଛଡ଼ା କରି ନ ଥିଲେ। ଯୋରନ୍ଦା ମହିମାଗାଦି, ସପ୍ତଶଯ୍ୟାସ୍ଥିତ ଶ୍ରୀରାମଚନ୍ଦ୍ର ପୀଠ, ମା’ ଜେନାଦେଈ ଠାକୁରାଣୀଙ୍କ ଆସ୍ଥାନ, ଅନନ୍ତଶୟନ, କୁଆଳୋ ଅଷ୍ଟଶମ୍ଭୁ ପୀଠରେ ମଧ୍ୟ ପ୍ରବଳ ଭିଡ଼ କରିଲକ୍ଷିତ ହୋଇଥିଲା। ସେହିପରି କପିଳାସ ପାଦଦେଶରେ ପ୍ରାୟ ୩୦,୦୦୦ ପର୍ଯ୍ୟଟକ ବଣଭୋଜିର ମଜା ନେଇଥିଲେ।
ଅଡୁଆ କଲା ପାଣି ଅଭାବ
‘ସପ୍ତଶଯ୍ୟା’ରେ ପ୍ରବାହିତ ପ୍ରାକୃତିକ ବନଝରଣା ଶୁଖିଯାଉଛି। ପ୍ରଦୂଷିତ ହୋଇପଡ଼ିଥିବା ପାଣି ବ୍ୟବହାର ଉପଯୋଗୀ ହେଉନାହିଁ। ଗ୍ରାମ୍ୟ ଜଳଯୋଗାଣ ବିଭାଗ ପକ୍ଷରୁ ଖନନ କରାଯାଇଥିବା ନଳକୂପ ଅଚଳ ହୋଇପଡ଼ିଛି। ଫଳରେ ବଡ଼ଦିନ ଛୁଟି କାଟିବାକୁ ଏଠାକୁ ଆସିଥିବା ପର୍ଯ୍ୟଟକମାନେ ପିଇବା ପାଣି ପାଇଁ ଅଡୁଆରେ ପଡ଼ିଥିଲେ। ମହିଳାଙ୍କ ବ୍ୟବହାର ଲାଗି ଶୌଚାଳୟ, ପାର୍କିଂ ବ୍ୟବସ୍ଥା କରାଯାଉ ନ ଥିବାରୁ ଅସନ୍ତୋଷ ଦେଖାଦେଇଥିଲା। ମୋବାଇଲ ନେଟ୍ଓ୍ବର୍କ ନ ଥିବାରୁ ଯୋଗାଯୋଗ ହୋଇପାରି ନ ଥିଲା। ଏଭଳି ଅବ୍ୟବସ୍ଥା ଲାଗି ପ୍ରଶାସନକୁ ଦାୟୀ କରିଛନ୍ତି କଟକର ଶୁଭଲକ୍ଷ୍ମୀ ସାହୁ, ଚୌଦ୍ୱାରର ସୁମନ୍ତ ସାହୁ ଏବଂ ଢେଙ୍କାନାଳର ରଶ୍ମିତା ସାହୁ। ଆଗକୁ ଇଂଲିଶ ନବବର୍ଷ ଆସୁଥିବାରୁ ତୁରନ୍ତ ସମସ୍ୟାର ସମାଧାନ କରିବାକୁ ବୁଦ୍ଧିଜୀବୀ ଦାବି କରିଛନ୍ତି।