ସମ୍ବଲପୁର,୧ା୧୨(ବ୍ୟୁରୋ): ସମ୍ବଲପୁର ହୀରାକୁଦ ଜଳଭଣ୍ଡାର ପାର୍ଶ୍ୱ ଜମାଦାରପାଲିଠାରେ ଗୁରୁବାର ହୀରାକୁଦ ଇକୋ ରିଟ୍ରିଟ୍ ଉଦ୍ଘାଟିତ ହୋଇଯାଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭର୍ଚୁଆଲ୍ ମୋଡ୍ରେ ହୀରାକୁଦ ସମେତ ଓଡ଼ିଶାର ୬ଟି ସ୍ଥାନରେ ଇକୋ ରିଟ୍ରିଟର ଉଦ୍ଘାଟନ କରିଛନ୍ତି।
ଉଦ୍ଘାଟନୀ ଉତ୍ସବରେ ଉତ୍ତରାଞ୍ଚଳ ରାଜସ୍ବ କମିଶନର ଡ. ସୁରେଶ ଚନ୍ଦ୍ର ଦଳେଇ, ଜିଲାପାଳ ଅନନ୍ୟା ଦାସ, ଏସ୍ପି ବି. ଗଙ୍ଗାଧର, ଜିଲାପରିଷଦ ମୁଖ୍ୟ ଉନ୍ନୟନ ଅଧିକାରୀ ଦିଲୀପ କୁମାର ବଳ, ମହାନଗର ନିଗମ କମିଶନର ପ୍ରଦୀପ କୁମାର ସାହୁଙ୍କ ସମେତ ଜିଲାସ୍ତରୀୟ ଅଧିକାରୀ ଉପସ୍ଥିତ ଥିଲେ।
ଆର୍ଡିସି ଡ. ଦଳେଇ କହିଛନ୍ତି, ରାଜ୍ୟରେ ପର୍ଯ୍ୟଟକଙ୍କୁ ଆକୃଷ୍ଟ କରିବା ଲାଗି ଏହା ଏକ ବଡ଼ ପଦକ୍ଷେପ। ଦେଶର ବିଭିନ୍ନ ରାଜ୍ୟରୁ ପର୍ଯ୍ୟଟକଙ୍କ ସମାଗମ ହୋଇ ଭାବର ଆଦାନ ପ୍ରଦାନ ହେବ। ସ୍ଥାନୀୟ ଅଞ୍ଚଳବାସୀଙ୍କ ସାମାଜିକ, ଆର୍ଥିକ ସ୍ଥିତିରେ ଅଭିବୃଦ୍ଧି ଘଟିବ। ୨ବର୍ଷ ହେଲା କୋଭିଡ୍ ଯୋଗୁ ଇକୋ ରିଟ୍ରିଟରେ ବାଧା ସୃଷ୍ଟି ହୋଇଥିଲା। ହେଲେ ଏବର୍ଷ ଅଧିକ ସଂଖ୍ୟାରେ ପର୍ଯ୍ୟଟକ ଆସିବେ ବୋଲି ଆଶା କରାଯାଉଛି। ଜିଲାପାଳ ଦାସ କହିଛନ୍ତି, ଚଳିତବର୍ଷ ଆକର୍ଷଣୀୟ ଭାବେ ଇକୋ ରିଟ୍ରିଟ କରାଯାଇଛି। ପର୍ଯ୍ୟଟକଙ୍କ ପାଇଁ ସମସ୍ତ ସୁବିଧା ମଧ୍ୟ ରହିଛି। ଅଧିକ ପର୍ଯ୍ୟଟକ ଆସି ଏହାର ଲାଭ ନେଇପାରିବେ ବୋଲି ଆଶା ବ୍ୟକ୍ତି କରିଛନ୍ତି।
ସୂଚନାଯୋଗ୍ୟ, ହୀରାକୁଦ ଜଳଭଣ୍ଡାର ସହିତ ପର୍ଯ୍ୟଟକମାନେ ଡେବ୍ରିଗଡ଼, ଘଣ୍ଟେଶ୍ୱରୀ ମନ୍ଦିର, ଜିରୋ ପଏଣ୍ଟ, ହୁମା ବକ୍ର ମନ୍ଦିର, ସମଲେଶ୍ୱରୀ ମନ୍ଦିର ଭଳି ବିଭିନ୍ନ ଶକ୍ତିପୀଠ ଓ ପର୍ଯ୍ୟଟନ ସ୍ଥଳ ଦେଖିପାରିବେ। ପର୍ଯ୍ୟଟକ ଇକୋ ରିଟ୍ରିଟରେ ରହିବା ସହ ପର୍ଯ୍ୟଟନସ୍ଥଳ ବୁଲି ମଜା ନେଇପାରିବେ। ଚଳିତଥର ଇକୋ ରିଟ୍ରିଟରେ ପର୍ଯ୍ୟଟକଙ୍କ ପାଇଁ ୨୫ଟି ବିଳାସପୂର୍ଣ୍ଣ କଟେଜ ରହିଛି। ସକାଳ ଜଳଖିଆଠାରୁ ଆରମ୍ଭ କରି ରାତ୍ରି ଭୋଜନ ପର୍ଯ୍ୟନ୍ତ ମେନୁରେ ସୁସ୍ବାଦୁ ବ୍ୟଞ୍ଜନ ଗୁଡ଼ିକ ରହିଛି। ଓଟିଡିସି ପକ୍ଷରୁ ଏହାକୁ ପରିଚାଳନା କରାଯାଉଛି।
