ମହାକାଳପଡ଼ା,୭ା୩ (ଡି.ଏନ୍.ଏ.):କେନ୍ଦ୍ରାପଡ଼ା ଜିଲା ଉପକୂଳ ଅଞ୍ଚଳରେ ଗ୍ରୀଷ୍ମପ୍ରବାହ ଯୋଗୁ ଜନଜୀବନ ଓ ଜଙ୍ଗଲୀ ପ୍ରାଣୀ ପାଣି ପାଇଁ ଅସୁବିଧାର ସମ୍ମୁଖୀନ ହେଉଛନ୍ତି। ମୁନ୍ଦେ ପାଣି ପାଇଁ ସୋମବାର ମହାକାଳପଡ଼ା ବନାଞ୍ଚଳ ଅଧୀନ ଜମ୍ବୁ-ମାର୍ଶାଘାଇ ମୁଖ୍ୟ କେନାଲର ପାରେଶ୍ୱରପୁର (ବାଲିଗଣ୍ଡ) ଜେନାସାହି ନିକଟରେ ଏକ ହରିଣକୁ କେନାଲ ଦଳ ମଧ୍ୟରୁ ଗ୍ରାମବାସୀ ଉଦ୍ଧାର କରିଛନ୍ତି। ଖବରପାଇ ଜମ୍ବୁ ବନ ବିଭାଗ କର୍ମଚାରୀ ଫରେଷ୍ଟର ମହନ୍ତ କୁମାର ମଲିକ, ପ୍ରଶାନ୍ତ କୁମାର ମହାନ୍ତି, ରଞ୍ଜିତ ସ୍ବାଇଁ ଓ ସାଧନ ମଣ୍ଡଳ ପ୍ରମୁଖ ପହଞ୍ଚତ୍ ହରିଣକୁ ହେପାଜତକୁ ନେଇଥିଲେ। ଏହି ମା’ ହରିଣଟି ୩୦ କିଲୋରୁ ଅଧିକ ବୋଲି ବିଭାଗ ପକ୍ଷରୁ କୁହାଯାଇଛି। ପରେ ଜମ୍ବୁ ଘାଟରୁ କର୍ମଚାରୀମାନେ ଏକ ସ୍ବତନ୍ତ୍ର ବନ ବିଭାଗ ବୋଟ ଯୋଗେ ନିକଟ ଭିତର ଖରିନାସୀ ସଂରକ୍ଷିତ ଜଙ୍ଗଲରେ ହରିଣକୁ ଛଡ଼ି ଦେଇଛନ୍ତି।
ଚଳିତବର୍ଷ ଫେବୃୟାରୀ ଓ ମାର୍ଚ୍ଚ ଆରମ୍ଭରୁ ଗ୍ରୀଷ୍ମ ପ୍ରବାହ ବଢ଼ିବାରେ ଲାଗିଛି। ଫଳରେ ଜଙ୍ଗଲୀ ପ୍ରାଣୀମାନେ ଖାଦ୍ୟ ଓ ପାଣି ପାଇଁ ଜନବସତି ଅଭିମୁଖେ ପଳାଇ ଆସୁଛନ୍ତି। ଏଥିଯୋଗୁ ସେମାନଙ୍କ ଜୀବନ ପ୍ରତି ବିପଦ ଦେଖାଯାଇଛି ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି। ପରିବେଶବିତ୍ ସୁବାସ ସ୍ବାଇଁ କୁହନ୍ତି, ସଂରକ୍ଷିତ ଜଙ୍ଗଲରେ ପୋଖରୀ ଖନନ ପାଇଁ ବନ ବିଭାଗ ପକ୍ଷରୁ ତତ୍ପରତା ପ୍ରକାଶ ପାଉନି। ଯଦି ଜଙ୍ଗଲଗୁଡ଼ିକରେ ପୋଖରୀ ଖନନ କରାଯାନ୍ତା ତେବେ ବନ୍ୟପ୍ରାଣୀ ମଧୁର ପାଣି ପିଇ ଜୀବନ ବଞ୍ଚାଇ ପାରନ୍ତେ। ପରିବେଶବିତ୍ ସମରେନ୍ଦ୍ର ମାହାଳୀ କୁହନ୍ତି, ବନ ବିଭାଗ ପକ୍ଷରୁ କଂସାରଡିଆ ସଂରକ୍ଷିତ ଜଙ୍ଗଲ, ହେଟା ମୁଣ୍ଡିଆ ସଂରକ୍ଷିତ ଜଙ୍ଗଲ, କଣ୍ଟିଲୋ ସଂରକ୍ଷିତ ଜଙ୍ଗଲ, ଜମ୍ବୁ ଝାଉଁ ଜଙ୍ଗଲରେ ପୋଖରୀ ଖନନ କରାଗଲେ ଜଙ୍ଗଲୀ ପ୍ରାଣୀ ଗଁାକୁ ଆଉ ଆସନ୍ତେ ନାହିଁ। ତେଣୁ ବନ ବିଭାଗ ଏଥିପ୍ରତି ଦୃଷ୍ଟି ଦେଇ ପୋଖରୀ ଖୋଳିବାକୁ ସେ ଦାବି କରିଛନ୍ତି। ଏ ନେଇ ମହାକାଳପଡ଼ା ରେଞ୍ଜ ଅଧିକାରୀ ଚିତ୍ତରଞ୍ଜନ ବେଉରାଙ୍କୁ ପଚାରିବାରେ ଉଦ୍ଧାର ହୋଇଥିବା ହରିଣକୁ ନିକଟ ସଂରକ୍ଷିତ ଜଙ୍ଗଲରେ ମୁକ୍ତ କରଯାଇଛି। ଜଙ୍ଗଲରେ ପୋଖରୀ ଖନନ ନେଇ ବିଭାଗ ପକ୍ଷରୁ ଖୁବ୍ଶୀଘ୍ର ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି। ଏ ସମ୍ପର୍କରେ ରାଜନଗର ଡିଏଫ୍ଓ ସୁଦର୍ଶନ ଗୋପୀନାଥ ଯାଦବଙ୍କୁ ପଚାରିବାରେ ଚଳିତବର୍ଷ ଅଧିକ ଉତ୍ତାପ ହେଉଛି। ଚଳିତ ଖରାଦିନରେ ସଂରକ୍ଷିତ ଜଙ୍ଗଲ ମଧ୍ୟରେ ବନ୍ୟପ୍ରାଣୀ ତୃଷା ମେଣ୍ଟାଇବାକୁ ଅସ୍ଥାୟୀ ଭାବେ ଚୁଆ ଖୋଳିବା ପାଇଁ ବିଭାଗ ପକ୍ଷରୁ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି।