କେନ୍ଦୁଝର,୨୩ା୫ (ସ୍ବ.ପ୍ର.): ଲୋକଙ୍କୁ ପାଇପ ଦ୍ୱାରା ସ୍ବଚ୍ଛ ଓ ବିଶୁଦ୍ଧଜଳ ଯୋଗାଣ ପାଇଁ ସରକାର ବ୍ୟବସ୍ଥା କରିଛନ୍ତି। କିନ୍ତୁ ନିମ୍ନମାନର ପାଇପ ବିଛା କାମ ହେଉଥିବାରୁ ଏବଂ ଉପଯୁକ୍ତ ତଦାରଖ ଅଭାବରୁ କେନ୍ଦୁଝର ସହରରେ ବିଭିନ୍ନ ସ୍ଥାନରେ ପାଇପ ଫାଟି ପାଣିି ନଷ୍ଟ ହେଉଛି। ଏଥିସହ ଉକ୍ତ ସ୍ଥାନରେ ବାହାର ମଇଳା ପଶି ପାଣି ଦୂଷିତ ହେଉଛି। ଏହି ପାଣିକୁ ଲୋକମାନେ ଶୁ୍ଦ୍ଧ ପାଣି ଭାବି ପିଇଥାନ୍ତି।
ପ୍ରକାଶ ଯେ, ଏସ୍ପି ଅଫିସ୍ ନିକଟ ଫୁଟ୍ପାଥ୍ (ଯେଉଁଠି ବେପାରୀ ବସି ପରିବା ବିକୁଛନ୍ତି)ରେ ଏକ ମୁଖ୍ୟ ପାଇପ ଫାଟିଯାଇଥିବାରୁ ପାଣି ବୋହୁଛି। ସେଠାରେ ବେପାରୀମାନେ ମୁହଁ ଧୋଇବା ସହ ପାଣି ବ୍ୟବହାର କରୁଛନ୍ତି। ତେବେ ଉକ୍ତ ସ୍ଥାନଟି ଅପରିଷ୍କାର ହୋଇଥିବାରୁ ବାହାର ମଇଳା ଆବର୍ଜନା ପାଣି ସଂସ୍ପର୍ଶରେ ଆସୁଥିବାରୁ ମଇଳା ଆବର୍ଜନା ପଶୁଥିବା ସମ୍ଭାବନା ଅଧିକ ରହିଛି। ଫଳରେ ପାଇପ ଭିତରେ ପ୍ରବାହିତ ପିଇବା ପାଣି ସଂକ୍ରମିତ ହେବା ଆଶଙ୍କା ରହୁଛି। ସେହିପରି ଧର୍ମଶାଳା ରାସ୍ତାରେ ମଧ୍ୟ ପାଇପ ଫାଟି ପାଣି ବାହାରୁଥିଲେ ହେଁ କାହାରିକୁ ଦେଖାଯାଉନାହିଁ। ସେହିପରି ସହରରେ ବିଭିନ୍ନ ସ୍ଥାନରେ ଏଭଳି ପାଇପ ଫାଟୁଥିଲେ ହେଁ ଦେଖିବାକୁ କେହି ନାହିଁ। ପାଇପ ଫାଟି ଅଧିକ ପାଣି ବାହାରିଲେ କିମ୍ବା ଅଭିଯୋଗ ମିଳିଲେ ତାହାର ମରାମତି କରାଯାଉଛି। କିନ୍ତୁ ସହରରେ ବିଛାଯାଇଥିବା ପାଇପର ଅବସ୍ଥା ନିୟମିତ ଅନୁଧ୍ୟାନ କରାଯାଉ ନ ଥିବାରୁ ଏଭଳି ସମସ୍ୟା ଉପୁଜୁଥିବା ଅଭିଯୋଗ ହେଉଛି। ଅନେକ ସମୟରେ ପାଇପ ଫାଟିବା ଫଳରେ ପ୍ରେସର ହୁଏନାହିଁ। ଫଳରେ ପାଣି ପ୍ରବାହ କମିଯାଏ ଏବଂ ତଳ ଅଞ୍ଚଳରେ ଲୋକେ ପାଣି ପାଇପାରନ୍ତିନାହିଁ। ଜୁନିୟର ଆସିଷ୍ଟାଣ୍ଟ ମ୍ୟାନେଜର ସୁବିର ମାଇତି କହିଛନ୍ତି, ସେ ଜାଣି ନ ଥିଲେ। ଏବେ ସଜାଡ଼ି ଦିଆଯିବ।
ପାଇପଗୁଡ଼ିକ ରାସ୍ତା ଉପରେ ରହିଥିବାରୁ ବର୍ଷାପାଣି ପଡ଼ି କଳଙ୍କି ଲାଗି ନଷ୍ଟହେବା ସହ ବଡ଼ ଗାଡ଼ି ଚଳପ୍ରଚଳ ଯୋଗୁ ଭାଙ୍ଗିଯାଇଥାଏ। ପାଇପ ଯୋଡ଼ା ଯାଉଥିବା ସ୍ଥାନଗୁଡ଼ିକ ନିୟମିତ ଯାଞ୍ଚ ହେଉ ନ ଥିବାରୁ ସେଠାରୁ ମଧ୍ୟ ପାଣି ଲିକ୍ କରିଥାଏ। ବର୍ତ୍ତମାନ ସମୟରେ ପାଣି ସମସ୍ୟା ଲାଗି ରହୁଥିବାରୁ ସମସ୍ୟା ସମାଧାନ କରିବା ଦିଗରେ ପଦକ୍ଷେପ ନେବାକୁ ସହରବାସୀ କହିଛନ୍ତି।