ଦାରିଙ୍ଗବାଡି,୨୮/୪(ଡି.ଏନ.ଏ): ଓଡିଶାର କଶ୍ମୀର କୁହାଯାଉଥିବା କନ୍ଧମାଳ ଜିଲାର ଦାରିଙ୍ଗବାଡି ଠାରେ ଥିବା ହିଲଭିୟୁ ପାର୍କର ବିକାଶରେ ବାଧା ସୃଷ୍ଟି ହୋଇଛି। ଏବେ ଗ୍ରୀଷ୍ମ ପ୍ରବାହ ରହିଥିଲେ ମଧ୍ୟ ମଝିରେ ମଝିରେ ବର୍ଷା ସହ କୋହଲା ପବନ ଯୋଗୁ ତାପମାତ୍ରା ସେତେଟା ବୃଦ୍ଧି ପାଉନି। ଫଳରେ ଏଠାକାର ପ୍ରଦୁଷଣ ମୁକ୍ତ , ଜଙ୍ଗଲ, ନଦୀନାଳ ଓ ଜଳପ୍ରପାତ ସହ ବିଭିନ୍ନ ପର୍ଯ୍ୟଟନକ୍ଷେତ୍ର ଦେଖିବାକୁ ଦୈନିକ ଶହ ଶହ ପର୍ଯ୍ୟଟକ ବୁଲିବାକୁ ଆସୁଛନ୍ତି। ତେବେ ସେପ୍ଟେମ୍ବର ଠାରୁ ଫେବୃଆରୀ ପର୍ଯ୍ୟନ୍ତ ଦୈନିକ ହଜାର ସଂଖ୍ୟାରେ ପର୍ଯ୍ୟଟକ ଏଠାକୁ ଆସୁଥିଲେ। କିନ୍ତୁ ଏବେ ତାହାର ସଂଖ୍ୟା କମିଛି। ଦାରିଙ୍ଗବାଡିର ଅନେକ ପର୍ଯ୍ୟଟନ କ୍ଷେତ୍ର ରହିଥିବା ବେଳେ ଏକ ପାହାଡ଼ ଉପରେ କରାଯାଇଥିବା ହିଲଭିୟୁ ପାର୍କର ବିକାଶ ଦିଗରେ ପ୍ରଶାସନର ଅହେତୁକ ଅବହେଳା ପର୍ଯ୍ୟଟକଙ୍କୁ ନିରାଶ କରିଛି। ଦାରିଙ୍ଗବାଡି଼କୁ ଆସୁଥିବା ପର୍ଯ୍ୟଟକଙ୍କ ସମେତ ସ୍ଥାନୀୟ ଲୋକ ଏହି ହିଲଭିୟୁ ପାର୍କ ଉପରେ ନିର୍ଭର କରନ୍ତି। ଏଥିପାଇଁ ଅନେକ ଯୋଜନା କରାଯାଉଛି ବିଶେଷ କରି ପର୍ଯ୍ୟଟନ କ୍ଷେତ୍ରର ବିକାଶ ପାଇଁ ହିଲଭିୟୁ ପାର୍କକୁ ରୂପାନ୍ତିକରଣ କାର୍ଯ୍ୟ କରାଯାଉଛି ହେଲେ ୪୦ ଫୁଟ ଉଚ୍ଚତା ୱାଚ ଟାୱାର ନିର୍ମାଣ ଅଧପନ୍ତରିଆ ହୋଇ ରହିଛି। ଦୀର୍ଘଦିନ ହେଲା ଶିଶୁ ପର୍ଯ୍ୟଟକଙ୍କ ପାଇଁ ରହିଥିବା ଟୟ ଟ୍ରେନ ଅଚଳ ହୋଇ ରହିଥିଲେ ସୁଦ୍ଧା ଆଜି ପର୍ଯ୍ୟନ୍ତ ତାକୁ ମରାମତି କରାଯାଇପାରୁନି। ସେହିପରି ଉକ୍ତ ପାର୍କରେ ଲୋକଙ୍କ ସାମାଜିକ ସୁରକ୍ଷା ପାଇଁ ସିସିଟିଭି କ୍ୟାମେରା ଖଞ୍ଜା ଯାଇଥିବା ବେଳେ ତାହା ମଧ୍ୟ ଅଚଳ ହୋଇ ପଡି ରହିଛି। ସିସିଟିଭି ଅଚଳ ଯୋଗୁଁ କୌଣସି ରେକର୍ଡ ରହି ପାରୁନି ଫଳରେ ସୁରକ୍ଷା ପ୍ରତି ବିପଦ ବୋଲି କୁହାଯାଉଛି। ପାର୍କକୁ ଜିଲା ତଥା ଜିଲା ବାହାରୁ ଅନେକ ପ୍ରେମୀ ଯୁଗଳଙ୍କ ଭିଡ଼ ରହୁଥିବା ବେଳେ ମହିଳା, ଶିଶୁ ପର୍ଯ୍ୟଟକଙ୍କ ମଧ୍ୟ ଭିଡ଼ ରହୁଛି। ସେହିପରି ଗ୍ରୀଷ୍ମ ପାଇଁ ଫୁଲଗଛ ଗୁଡିକ ନଷ୍ଟ ହେବାକୁ ବସିଲାଣି। ପ୍ରକାଶଯୋଗ୍ୟ ସାଞ୍ଜା ସରୁ ଉନ୍ନୟନ ଟ୍ରଷ୍ଟ କରାଯାଇ ଏହାର ଦାୟିତ୍ୱରେ ଅଧ୍ୟକ୍ଷ ଭାବେ ବାଲିଗୁଡା ଉପଜିଲାପାଳ ରହିଥିବା ବେଳେ ସମ୍ପାଦକ ଭାବେ ସ୍ଥାନୀୟ ବିଡ଼ିଓ ରହିଛନ୍ତି ସେହିପରି ଟ୍ରଷ୍ଟରେ ବିଭିନ୍ନ ସରକାରୀ ଓ ବେସରକାରୀ ଅନୁଷ୍ଠାନର କର୍ମକର୍ତ୍ତାମାନେ ସଦସ୍ୟ ଭାବେ ରହିଛନ୍ତି। ତେବେ ପ୍ରତିମାସରେ ଏହାର ସମୀକ୍ଷା ବୈଠକ କରାଯାଉଥିଲା। ଏବେ କିଛି ବର୍ଷ ହେଲା ନିୟମିତ ବୈଠକ ହେଉନଥିବା ଯୋଗୁ ପାର୍କର ଟିକେଟ ସଂଗ୍ରହ, ଖର୍ଚ୍ଚ ଆଦିର ହିସାବ କୌଣସି ସଦସ୍ୟଙ୍କୁ ଜଣା ପଡୁନାହିଁ। ପୂର୍ବ ଭଳି ପ୍ରତିମାସରେ ସମୀକ୍ଷା ସହ ପାର୍କର ଅଟକି ରହିଥିବା ବିକାଶକୁ ତ୍ୱରାନ୍ବିତ କରାଯିବାକୁ ଅଞ୍ଚଳବାସୀ ଦାବି କରିଛନ୍ତି। ପାର୍କ ଭଲ ରୋଜଗାର ଦେଉଛି କିନ୍ତୁ ତାର ରକ୍ଷାଣବେକ୍ଷଣ ପ୍ରତି ପ୍ରଶାସନ ଯତ୍ନବାନ ହେବା ଜରୁରୀ ବୋଲି ପର୍ଯ୍ୟଟକ ମାନେ କହିଛନ୍ତି। ଏନେଇ ସାଞ୍ଜାସରୁ ଉନ୍ନୟନ ଟ୍ରଷ୍ଟର ସମ୍ପାଦକ ତଥା ଦାରିଙ୍ଗବାଡି ବିଡ଼ିଓ ଗଦାଧର ପାତ୍ରଙ୍କ ସହ ଯୋଗାଯୋଗ କରାଯିବାରୁ ସେ କହିଛନ୍ତି ଯେ ଖୁବ ଶୀଘ୍ର ଟ୍ରଷ୍ଟର ବୈଠକ ଡକାଯିବ ଏବଂ ଅଟକି ରହିଥିବା ରୂପାନ୍ତିକରଣ କାର୍ଯ୍ୟକୁ ତ୍ୱରାନ୍ବିତ କରାଯିବାକୁ ପ୍ରୟାସ କରାଯିବ। ସେହିପରି ଅଚଳ ଥିବା ଟୟ ଟ୍ରେନକୁ ଶୀଘ୍ର ମରାମତି କରାଯିବ ବୋଲି ସେ କହିଛନ୍ତି